२६ कार्तिक, एजेन्सी ।
रुस र युक्रेनबीचको जारी युद्धमा हालसम्मकै घातक ड्रोन आक्रमण भएको छ । दुवै पक्षले एक–अर्को देशका संवेदनशील क्षेत्रहरुलाई निशाना बनाएर ड्रोन आक्रमण गरेका हुन्। युक्रेनले पठाएका ड्रोन विभिन्न ६ ठाउँमा आफूहरूले रोकेको रुसी रक्षा मन्त्रालयले दाबी गरेको छ ।
उसले युक्रेनले विभिन्न विमानस्थल लक्षित ड्रोन आक्रमण गर्दा विमानहरूलाई नै डाइभर्ट गरेर सुरक्षित स्थलतर्फ लगिएको आफ्नो वक्तव्यमा उल्लेख गरेको छ । यता युक्रेनको वायु सेनाले रुसले शनिबार देशका कयौँ संवेदनशील क्षेत्रलक्षित १४५ वटा घातक ड्रोन आक्रमण गरेको दाबी गरेको छ ।
कैयौँ ड्रोन आफूहरूले खसालेको युक्रेनको भनाइ छ । अमेरिकामा राष्ट्रपतीय निर्वाचन सम्पन्न भएलगत्तै यी दुई देशबीच घातक ड्रोन आक्रमण भएको हो । यसैबीच अमेरिकाको राष्ट्रपतिमा निर्वाचित भएका डोनाल्ड ट्रम्पको आगामी प्रशासनले युक्रेनलाई रुसले कब्जा गरेको भूभाग फिर्ता लिनभन्दा पनि देशमा शान्ति स्थापना गर्न सघाउने ट्रम्पका एक पूर्व सल्लाहकारले भनेका छन् ।
ट्रम्पको पछिल्लो चुनावी अभियानमा काम गरेका ब्रायन लान्जाले भने । ट्रम्पको आगामी प्रशासनले युक्रेनी राष्ट्रपति भोलोदिमिर जेलेन्स्कीलाई शान्तिको वास्तविक भिजनबारे उनको धारणा सोधिने उनले बताए ।
जेलेन्स्की वार्ताको टेबलसम्म आए भने शान्ति मात्रै हुने र क्रिमियाका कुरा उठाए भने उनी गम्भीर छैनन् भन्ने बुझिने पनि उनले बताए । क्रिमिया युक्रेनको हातबाट फुत्किसकेको र यो फर्केर नआउने पनि उनले बताए ।
ट्रम्पका एक प्रवक्ताले भने लान्जाले बोलेको कुरा उनको निजी राय भएको र यो ट्रम्पको बोली नभएको बताएका छन् । रुसले सन् २०१४ मा क्रिमियालाई अलग्याएको थियो । ८ वर्षपछि यसले युक्रेनमाथि पूर्ण स्तरको हमला ग¥यो र पूर्वी युक्रेनको केही भूभाग आफ्नो कब्जामा लिएको छ ।
ट्रम्पले आफ्नो प्राथमिकता युद्ध अन्त्य गर्ने भएको बताइरहेका छन् । तर युद्ध कसरी अन्त्य गर्ने भन्नेबारे उनको ठोस योजना आइसकेको छैन । यसैबीच यता रुसी राष्ट्रपति भ्लादिमिर पुटिनले उत्तर कोरियासँगको ऐतिहासिक रक्षा सन्धिमा हस्ताक्षर गरेका छन् ।
यो सम्झौता प्योङयाङले युक्रेनविरुद्ध लड्न हजारौँ सैनिक पठाएको खबरका बीच आएको छ । पुटिनले जुन महिनामा उत्तर कोरियाको भ्रमणका क्रममा यो सम्झौता गरेका थिए तर लागू हुनका लागि रुसको संसद्बाट पारित हुनुपर्ने र उनीबाट हस्ताक्षर गरिनुपर्ने थियो ।
क्रेमलिनले शनिबार साँझ आफ्नो वेबसाइटमा सन्धि अनुमोदन गर्ने हस्ताक्षर गरिएको कानून प्रकाशित गरेको छ । यो सम्झौताले शीतयुद्धभरि कम्युनिस्ट सहयोगी रहेका दुई राष्ट्रबीच महिनौँदेखिको गहिरो सुरक्षा सहयोगलाई औपचारिक रूप दिएको छ ।
उत्तर कोरिया युक्रेनमाथि रुसको पूर्ण–स्तरीय आक्रमणको सबैभन्दा मुखर र महत्त्वपूर्ण समर्थकहरू मध्ये एक बनेको छ । हस्ताक्षरित सम्झौताले दुवै मुलुकलाई अर्को देशमाथि आक्रमण भएको खण्डमा ‘ढिलाइ नगरी’ सैन्य सहायता प्रदान गर्न बाध्य बनाउँछ ।
यो सम्झौताले अब रुसमाथि कुनैपनि आक्रमण भए त्यसको जवाफ उत्तरले दिने छ। त्यो जवाफ दिन ततकाल उत्तरका सेना र हतियार रुस पुग्नेछन् । यसैले अब युक्रेन युद्धलाई लिएर पश्चिमा राष्ट्र र नेटोको तैनाथीलाई उत्तर कोरियाले समेत जवाफ दिनेछ ।
यसले रुसमाथिको कुनै गम्भिर कदमले विश्वलाई भयानक युद्धतर्फ धकेल्ने डर पैदा भएको छ । उत्तर र रुसको सम्झौतालाई नेटो सदस्य राष्ट्रहरु बीच भएको सम्झौता अनुरुपकै रुपमा हेरिएको छ ।
नेटो सदस्य राष्ट्रहरु बीच पनि कुनै पनि देशमा आक्रमण भए सबै सदस्य राष्ट्रका सेनाहरुले आक्रमणमा सहयोग गर्नसक्ने व्यवस्था गरिएको छ । अब उत्तर रुसबीचको सम्झौताले उनीहरूलाई पश्चिमी प्रतिबन्धहरूको विरोध गर्न र संयुक्त राष्ट्रसङ्घमा आफ्ना स्थितिहरू समन्वय गर्न अन्तर्राष्ट्रियस्तरमा सहकार्य गर्न पनि प्रतिबद्ध गर्दछ ।
पुटिनले जुनमा यसलाई ‘महत्त्वपूर्ण दस्तावेज’ का रूपमा प्रशंसा गरेका थिए । गुप्तचर रिपोर्टहरूलाई उद्धृत गर्दै दक्षिण कोरिया, युक्रेन र पश्चिमी देशहरूले उत्तर कोरियाले युक्रेनविरुद्ध लड्न रुसमा लगभग १० हजार सैनिक तैनाथ गरेको बताएका छन् ।
गत महिना तैनाथीका बारेमा सार्वजनिक रूपमा सोधिएको बेला पुटिनले यसलाई अस्वीकार गरेनन्, बरु युक्रेनलाई पश्चिमको समर्थनबारेको प्रश्नलाई बेवास्ता गरेका थिए ।
