२७ कार्तिक , विराटनगर ।
कोशी प्रदेशका पूर्वआन्तरिक मामिला तथा कानूनमन्त्री लिलाबल्लभ अधिकारी मुछिएको मानव तस्करी प्रकरणमा थप दुई जना पक्राउ परेका छन् । पक्राउ पर्नेमा ओखलढुंगाका ३२ वर्षीया गुढी राई र ४१ वर्षीय नविन राई छन् ।
यससँगै यो घटनामा पक्राउ पर्नेको सङ्ख्या ९ पुगेको छ । उनीहरूले जापान जानलाई तीन युवाका लागि नक्कली सरकारी कागजात बनाइदिएको पाइएको जिल्ला प्रहरी परिसर काठमाडौंका एसपी नवराज अधिकारीले बताएका छन् ।
नवीन र गुड्डीले बागबजारमा खोटाङस्थित ऐशेलुखर्क गाउँपालिका वडा नम्बर–२ को वडा सदस्य र कोशीको आन्तरिक मामिला तथा कानून मन्त्रालयको सहायकको परिचयपत्र बनाइदिएको अनुसन्धानबाट खुलेको छ ।
यसअघि यस प्रकरणमा पूर्वमन्त्री अधिकारी, खोटाङका ३६ वर्षीय दावा शेर्पा, खोटाङकै जनक राई, रसुवा घर भएका २२ वर्षीय कञ्चन देवकोटा, नुवाकोटका २२ वर्षीय जुगल रिजाल, दोलखाका ३० वर्षीय वीरबहादुर सुनुवार र धादिङको त्रिपुरा सुन्दरी गाउँपालिकाका ३४ वर्षीय महेश पाण्डे पक्राउ परेका छन् ।
यो घटनामा कोशी प्रदेश सरकारका आन्तरिक मामिला तथा कानून मन्त्रीनै जालोमा परेको खुलेको छ । कोशी प्रदेशका मुख्यमन्त्री र संघीय सरकारलाई समेत कुनै जानकारी नदिइ जापानका लागि उडेका कोशी प्रदेश सरकारका आन्तरिक मामिला मन्त्री लिलाबल्लभ अधिकारी फर्किएपछि मानव तस्करको योजना खुलेको हो ।
मानवतस्करको गम्भिर विषय बाहिरिएपछि अधिकारीले मन्त्री पदबाट आज राजीनामा दिएका थिए । अधिकारीलाई जापानमा हुने सांस्कृतिक कार्यक्रममा अतिथिका रुपमा बोलाइएकोथियो । अधिकारीले आफूलाई थाहै नदिई अन्य तीन जनालाई सचिवालय कर्मचारी बनाएर जापान लैजान खोजिएको पत्रकार सम्मेलन गर्दै दावी गरेका छन् ।
आफूसँगै अन्य नचिनेका तीन जनालाई सचिवालयका सदस्य बनाएर जापान लैजान खोजेको थाहा पाएपछि आफू हङकङ एयरपोर्टबाटै फर्किएको अधिकारीको भनाइ छ ।अधिकारीका अनुसार नक्कली कागजात बनाएर मानव तस्करले तीन जनालाई हङ्ककङ्ग ट्रान्जिटबाट जापान उडाउन खोजेका थिए ।
हङ्ककङ्ग एयरपोर्टमा पुगेपछि आफूले सबै कुरा थाहा पाएको उनले बताउका छन् । प्रदेश सरकार र मुख्यमन्त्रीलाई जानकारी समेत नदिई कात्तिक १३ गते जापान उडेका मन्त्री अधिकारी १७ गते फर्किएका थिए ।
मानव तस्करीको आरोपमा पक्राउ परेका कोशी प्रदेशका पूर्वमन्त्री लिलाबल्लभ अधिकारीलाई २ दिन हिरासतमा राख्न प्रहरीले अनुमति पाएको छ । उनीमाथि सरकारी कागजात कीर्ते र मानव तस्करीको आरोपमा अनुसन्धान गर्न हिरासतमा राख्नुपर्ने भन्दै प्रहरीले जिल्ला अदालत काठमाडौंमा पेश गरेको थियो ।
अधिकारीलाई प्रहरीले आइतबार नै मोरङको विराटनगरबाट काठमाडौं लगेको थियो । उनलाई विराटनगरस्थित निवासबाटै पक्राउ गरिएको थियो । जिल्ला प्रहरी परिसर काठमाडौँले मन्त्री अधिकारीलाई नियन्त्रणमा लिएर उपस्थित गराउन पत्राचार गरेपछि उनलाई विमानमार्फत काठमाडौँ लगिएको थियो ।
अधिकारी एमालेको तर्फबाट मोरङ जिल्लाको प्रतिनिधिसभा निर्वाचन क्षेत्र नं २ को प्रदेशसभा निर्वाचन क्षेत्र (ख) बाट निर्वाचित प्रदेशसभा सदस्य हुन् । जापान भ्रमणका क्रममा मानव तस्करी गरेको आरोप लगत्तै उनले मन्त्री र पार्टी संसदीय दलको नेताबाट राजीनामा समेत दिइसकेका छन् ।
साथै, उनलाई एमालेले पार्टीको सबै जिम्मेवारीबाट निलम्बन समेत गरिसकेको छ । पक्राउ परेकाहरूले आफूहरूले जापान जानका लागि १० देखि १३ लाख रूपैयाँसम्म बुझाएको प्रहरीलाई बताएका छन् ।
डिपोर्ट भएका दुई जनाको साथबाट प्रहरीले मन्त्रालयको नक्कली परिचय पत्रसमेत बरामद गरेको थियो । जसमा निमित्त कार्यालय प्रमुख भनेर तत्कालीन मन्त्री लिलाबल्लभ अधिकारीको नै हस्ताक्षर छ ।
यसबाट अधिकारी मुख्य कर्ता रहेको बुझ्न सकिन्छ । आरोपीहरू विरुद्ध प्रहरीले लिखत किर्ते र मानव बेचबिखन तथा ओसारपसार (नियन्त्रण) ऐन, २०६४ अन्तर्गतको कसुरमा अदालतबाट म्याद लिएर अनुसन्धान गरिरहेको छ ।
