२९ कार्तिक ,एजेन्सी ।
अमेरिकी राष्ट्रपति जो बाइडन र नवनिर्वाचित राष्ट्रपति डोनाल्ड ट्रम्पबीच ह्वाइटहाउसमा भेटवार्ता भएको छ । बाइडनले ट्रम्पलाई सत्ता हस्तान्तरण गर्नुअघि बुधबार साँझ भेटवार्ता भएको हो । भेटमा बाइडनले हात मिलाएर ट्रम्पलाई बधाइ दिएका थिए ।
दुवैजना शान्तिपूर्ण सत्ता हस्तान्तरणमा सहमत भएको बीबीसीले जनाएको छ । बाइडनले कुराकानीको क्रममा ट्रम्पलाई कुनै समस्या नहुने गरी सत्ता हस्तान्तरण गर्ने बताएका थिए । ट्रम्पले राजनीति कठिन तर धेरै कुरामा राम्रो पनि भएको बताउँदै पछि पनि राम्रो हुने बताएका थिए ।
साथै आतिथ्यताको निम्तो दिएको भन्दै बाइडेनको सह्राना गरेका थिए । भेटमा उपराष्ट्रपति र डोनाल्ड ट्रम्पकी प्रतिस्पर्धी कमला ह्यारिस भने उपस्थित थिएनन् । ट्रम्प राष्ट्रपतिमा निर्वाचित भएपछि बाइडेनले ह्वाइटहाउसमा निम्तो पठाएका थिए ।
तर सन् २०२० मा बाइडनले जित्दा ट्रम्पले ह्वाइटहाउसमा बोलाएका थिएनन् । यहाँसम्मकी ट्रम्पले बाइडनको शपथ ग्रहण समारोह नै बहिस्कार गरेका थिए । त्यतिमात्रै होइन निर्वाचन परिणाम अस्वीकार गर्दै उनका समर्थकहरुले संसद भवनमा तोडफोड समेत गरेका थिए ।
ट्रम्पको शपथ ग्रहण समारोहमा भने बाइडन सहभागी हुने बीबीसीले जनाएको छ । ट्रम्पले २० जनवरी २०२५ मा राष्ट्रपति पदको शपथ ग्रहण गर्दैछन् । समाचार एजेन्सी एपीमा छापिएको समाचार अनुसार ओभल अफिसको बैठकमा बाइडेनले ट्रम्पलाई हात मिलाएर अभिवादन गरेका थिए ।
डेमोक्रेटिक प्रशासनबाट रिपब्लिकन क्याम्पमा सत्ता हस्तान्तरणको प्रक्रिया सहज रुपमा सम्पन्न हुने पनि खबरमा भनिएको छ । यस विषयमा औपचारिक सहमति भएको छ । यसबीचमा बाइडेनलाई पदबाट राजीनामा दिएर कमला ह्यारिसलाई राष्ट्रपति बनाउन सुझाव समेत आएको थियो ।
ह्वाइट हाउसबाट जारी विज्ञप्ति अनुसार अमेरिकाकी प्रथम महिला जिल बाइडेनले पनि अमेरिकाका नवनिर्वाचित राष्ट्रपति ट्रम्पलाई ह्वाइट हाउसमा स्वागत गरेकी छिन् । राष्ट्रपति बाइडेनको साथमा ट्रम्पलाई स्वागत गर्न आएकी जिल बाइडेनले ट्रम्पलाई हस्तलिखित बधाई पत्र दिएकी थिइन् ।
बाइडेनको टोलीले पनि ट्रम्पलाई सत्ता हस्तान्तरण गर्ने प्रक्रिया पूरा गर्न तयार रहेको जनाएको छ । अमेरिकामा राष्ट्रपति निर्वाचित भएका डोनाल्ड ट्रम्पकी पत्नी मेलनिया ट्रम्प भने ह्वाइट हाउसमा पूर्णकालीन प्रथम महिलाको रूपमा फर्किने सम्भावना नगण्य रहेको बताइएको छ ।
सीएनएनले मेलनिया सम्बद्ध स्रोतहरूलाई उद्धृत गर्दै यस्तो समाचार छापेको हो । समाचारका अनुसार मेलनियाले आफ्नो समय न्यूयोर्क र फ्लाेिरडा बिच बाँड्ने योजना बनाएकी छिन् । वर्तमान राष्ट्रपति जो बाइडेनको निम्तोमा ट्रम्प ह्वाइट हाउस आउँदा पनि मेलनिया उनको साथमा थिइनन् ।
माइक्रो ब्लगिङ वेबसाइट एक्समा आफूले बाइडेनको निम्तो अस्वीकार गरेको भन्दै उनले पोस्ट गरेकी थिइन् । ट्रम्पको पहिलो राष्ट्रपति कार्यकालमा पनि मेलनिया सार्वजनिक रूपमा ट्रम्पसँग कहिलेकाहीँ मात्रै देखिएकी थिइन् ।
यस वर्षको उनको चुनावी अभियानमा उनी पूरै अनुपस्थित थिइन् । तर ट्रम्प विजयी भएपछिको पहिलो सम्बोधनमा भने उनी सहभागि भएकी थिइन । ह्वाइट हाउसमा अमेरिकी राष्ट्रपति जो बाइडेन र नवनिर्वाचित राष्ट्रपति डोनाल्ड ट्रम्पबिचको भेटले सत्ता हस्तान्तरण गर्ने परम्परालाई पुनर्जीवित गरेको छ।
सन् २०२० को चुनाव परिणाम अस्वीकार गरेपछि सत्ता छोडेको चार वर्षपछि ट्रम्प ह्वाइट हाउसमा फर्केका हुन्। यस पटक ट्रम्प सत्तामा फर्किए, सबै सात स्विंग राज्यहरू जिते र ३१२ निर्वाचक मतहरू प्राप्त गरे ।
जबकि उपराष्ट्रपति कमला ह्यारिसले २२६मत प्राप्त गरिन् । राष्ट्रपति बाइडेनले नोभेम्बर ६ मा ट्रम्पलाई बधाई दिँदै ह्वाइट हाउसमा आमन्त्रित गरेका थिए । नयाँ अमेरिकी राष्ट्रपतिको शपथ ग्रहण समारोह जनवरी २०मा वासिङ्टन डिसीको क्यापिटल भवनमा हुनेछ।
यस विशेष दिनको परम्परामा पहिलो, राष्ट्रपति आफ्नो निवासबाट चर्च जानेछन् –यो परम्परा सन् १९३३ मा राष्ट्रपति फ्र्याङ्कलिन डी रुजवेल्टले सुरु गरेका थिए। ह्वाइट हाउसमा औपचारिक बैठकपछि नयाँ राष्ट्रपति क्यापिटल भवनमा जान्छन्, जहाँ काङ्ग्रेसका सदस्यहरू र विशेष आमन्त्रितहरूले शपथ ग्रहणको प्रतीक्षा गर्छन्।
यस समारोहमा पहिले उपराष्ट्रपतिले शपथ लिन्छन्, त्यसपछि सर्वोच्च अदालतका मुख्य न्यायाधीशले नयाँ राष्ट्रपतिलाई शपथ दिलाउँछन्। राष्ट्रपतिले जर्ज वासिङ्टनले लिएको नै ऐतिहासिक शपथ लिन्छन्।
शपथ ग्रहण समारोहपछि नयाँ राष्ट्रपतिले राष्ट्रका नाममा सम्बोधन गर्नेछन् र हस्ताक्षर समारोह राष्ट्रपतिको कोठामा हुनेछ जहाँ उनले आफ्नो पहिलो आदेशमा हस्ताक्षर गर्नेछन्। यो परम्परा १९८१ मा रोनाल्ड रेगनद्वारा सुरु गरिएको थियो।
अन्तिम शरद ऋतुमा, राष्ट्रपति उद्घाटन परेडमा सामेल हुनेछन् र त्यसपछि आफ्नो परिवारसँग ह्वाइट हाउसको निवासमा जानेछन्।
