२९ कार्तिक , एजेन्सी ।
चीनले हालै झुहाई एयर शोमा आफ्नो नयाँ अत्याधुनिक फाइटर जेटको अनावरण गरेको छ, जसले विश्वको ध्यान आकर्षित गरेको छ। चीनको दाबीअनुसार यो फाइटर जेट सुपरसोनिक गतिमा उडान भर्न सक्षम छ र पृथ्वीको वायुमण्डलभन्दा बाहिर अन्तरिक्षमा युद्ध लड्न सक्ने क्षमतासमेत राख्दछ ।
यसलाई “बैदी“ वा “ह्वाइट एंपरर“ नाम दिइएको छ र यो चीनको स्वामित्वमा रहेको एयरोस्पेस तथा रक्षा समूहले तयार गरेको हो । यो जेट हालसम्म केवल एक मोडेलको रूपमा प्रस्तुत गरिएको छ र यसलाई छठौं पुस्ताको फाइटर जेट भनिएको छ।
यो फाइटर जेट चीनको निकट–अंतरिक्ष क्षेत्रमा सैन्यीकरणतर्फको महत्त्वपूर्ण कदमको प्रतीक मानिन्छ। यसको डिजाइन अत्याधुनिक टेक्नोलोजीसँग मेल खान्छ जसमा स्टिल्थ क्षमता, सुपरसोनिक गति र उन्नत हतियार प्रणालीहरू रहेका छन्।
यसमा हावाबाट जमिनमा हमला गर्न सक्ने शक्तिशाली हतियारहरू, उन्नत ककपिट डिजाइन र अत्याधुनिक एवियोनिक्स प्रणाली पनि छन्। पीपुल्स लिबरेशन आर्मी एयर फोर्सको ७५औं वार्षिकोत्सवको एक दिनपछि ग्वाङडोङ प्रान्तमा यो एयर शो सुरु गरिएको हो।
यसमा सुपरसोनिक गति र स्टिल्थ क्षमता रहेको छ । यो जेट उच्च गतिमा उड्नसक्छ, साथै दुश्मनको रडारबाट लुक्न पनि सक्षम छ। यस्तै लेजर र माइक्रोवेभ हतियार रहेका छन् । यसमा लेजर र उच्च शक्ति भएका माइक्रोवेभ हतियारहरू छन्, जसले पारम्परिक युद्ध र अन्तरिक्ष युद्धमा समेत हमला गर्न सक्ने क्षमता प्रदान गर्दछ।
अन्तरिक्ष क्षमता यसमा रहेको छ। यो फाइटर जेट पृथ्वीको वायुमण्डल बाहिर पनि सञ्चालन गर्न सक्षम हुने चीनको दाबी छ, जसले अन्तरिक्षीय युद्धमा समेत यसको उपयोग हुनसक्ने देखाउँछ। छठौं पुस्ताका फाइटर जेटहरू अहिले संसारभर विभिन्न देशहरूद्वारा विकास भइरहेका छन्।
चीन र अमेरिका दुबै यस क्षेत्रमा अगाडि बढिरहेका छन्। अमेरिका एसआर ७२ “डार्कस्टार“ परियोजना अन्तर्गत यस्तै क्षमताको जेट विकास गर्दैछ, जसलाई परम्परागत युद्ध र अन्तरिक्षीय सुरक्षा दुवैका लागि उपयोग गर्न सकिन्छ।
चीनसँग हाल पाँचौं पुस्ताका दुई प्रमुख फाइटर जेटहरू छन् जे– २० र जे– ३५। यद्यपि, विशेषज्ञहरूको विचारमा अमेरिकासँगको प्रतिस्पर्धाका लागि चीनले नयाँ प्रविधिहरू विकास गर्न आवश्यक छ।
पीएलएका पूर्व प्रशिक्षक सोंग झोंगपिंगका अनुसार छठौं पुस्ताका फाइटर जेटहरूको मापदण्ड अझै परिभाषित गरिएको छैन, जसका कारण यस प्रकारका विमानलाई पहिलो पटक विकास र तैनाथ गर्ने देशले भविष्यमा नयाँ मानकहरू स्थापित गर्न सक्छन् ।
यस नयाँ फाइटर जेटको विकासले चीनको सैन्य प्रविधिमा ठूलो उपलब्धि ल्याउन सक्छ र खास गरी अमेरिका , भारत जस्ता अन्तर्राष्ट्रिय सैन्य प्रतिस्पर्धामा चीनको स्थानलाई बलियो बनाउन सक्ने विश्लेषण गरिएको छ ।
झुहाईमा जारी वार्षिक एयर शोमा रुसी एसयू–५७ फेलान र चाइनिज जे–३५ अन्तर्राष्ट्रिय बजारमा दौडिरहेका दुई फाइटर प्लेनले उडान भरेका छन् । दुबै विमान निर्यातको लागि बजारमा छन् र यिनीहरुले अमेरिकी एफ ३५ सँग प्रतिस्पर्धा गर्नेछन् ।
जसले पहिले नै आफ्नो क्षमता प्रमाणित गरिसकेको छ र विश्वभरका वायु सेनाहरूको छनौटमा परेकोछ । रुस र चीनबीचको गहिरो सम्बन्धलाई देखाउनकै लागि अर्को देशको एयर शोमा रूसी विमानहरुले भाग लिएको यो पहिलो पटक हो।
