१ मंसिर , विराटनगर ।
मुस्लिम आयोगका अध्यक्ष समिम मियाँ अन्सारीले विश्वले सहअस्तित्व नेपालबाट सिक्न सक्ने बताएका छन् । थाइल्याण्डको राजधानी बैंककमा भएको ग्लोबल मिट २०२४ लाई सम्बोधन गर्दै अध्यक्ष अन्सारीले नेपालको विविध संस्कृतिले सहिष्णुता र सहकार्यलाई कसरी प्रेरित गर्दछ भन्ने विषयमा विशेष जोड दिए ।
सो अवसरमा अन्सारीले नेपालको सांस्कृतिक विविधता, शिक्षाको महत्त्व र अन्तर्राष्ट्रिय सहकार्यका पक्षमा प्रभावशाली सम्बोधन गरेका छन् । यस कार्यक्रममा उनले नेपाललाई शान्तिप्रेमी र सहिष्णु देशको रूपमा चित्रित गर्दै विश्वलाई सहअस्तित्व र सहिष्णुताको सन्देश दिएका छन् ।
उनले नेपालको बहुसांस्कृतिक, बहुभाषिक, र बहुधार्मिक विशेषतालाई उदाहरण दिँदै सहअस्तित्वको महत्त्वमा जोड दिए । उनले भने, “नेपालको विविधता विश्वका लागि प्रेरणादायी छ र सहिष्णुताको उत्कृष्ट नमुना हो।“
यस्तै शिक्षालाई समृद्धिको आधारस्तम्भको रूपमा प्रस्तुत गर्दै अध्यक्षले गुणस्तरीय शिक्षाको पहुँच विस्तार गर्नु आजको युगको आवश्यकता भएको औंल्याए । “शिक्षा मात्रै शान्ति र विकासको सुनिश्चितता दिन सक्छ,“ उनले भने ।
ग्लोबल मिटलाई अन्तर्राष्ट्रिय सहकार्यका लागि उत्कृष्ट मञ्चको रूपमा वर्णन गर्दै अध्यक्ष अन्सारीले विभिन्न देशका प्रतिनिधिहरूसँग विचार आदानप्रदानको महत्त्वमाथि प्रकाश पारे । यसैगरी थाई सेनाले शान्ति र विकासका क्षेत्रमा पु¥याएको योगदानको कदर गर्दै अध्यक्षले उनीहरूलाई विशेष सम्मान पुरस्कार प्रदान गरे ।
बैंककस्थित रोयल थाई आर्मी क्लबमा आयोजित कार्यक्रममा अध्यक्ष अन्सारी प्रमुख अतिथि रहेका थिए । कार्यक्रममा ३० भन्दा बढी देशका विशिष्ट व्यक्तित्वहरू सहभागी भएका थिए । मानवअधिकार, शान्ति र अन्तर्राष्ट्रिय सहयोगको महत्त्वलाई उजागर गर्दै अध्यक्ष अन्सारीले भने, ‘नेपालका विविध संस्कृतिहरूले हामीलाई सहअस्तित्वको पाठ सिकाएको छ । यो शान्ति र सहयोगको भावना नै हामीले विश्वलाई दिन सक्ने सबैभन्दा ठूलो उपहार हो।’
उनले शिक्षा, विज्ञान र संस्कृतिलाई शान्ति र समृद्धिको मुख्य आधारस्तम्भका रूपमा औँल्याउँदै गुणस्तरीय शिक्षाको पहुँचलाई विश्वव्यापी बनाउन आवश्यक रहेको उल्लेख गरे । कार्यक्रममा अध्यक्ष अन्सारीले थाई आर्मीका विशिष्ट अधिकारीहरूलाई उत्कृष्ट सेवाका लागि पुरस्कार वितरण गरे ।
उनले शान्ति र विकासका क्षेत्रमा थाई सेनाको योगदानको प्रशंसा गरे । ग्लोबल मिटमा थाई आर्मीका जनरल तथा उच्च अधिकारीहरूसहित नेदरल्याण्ड, जापान, इन्डोनेसिया, हङकङ, भारत र थाइल्याण्डलगायतका देशका उच्चस्तरीय प्रतिनिधिहरू उपस्थित थिए ।
सहभागीहरूले शान्ति स्थापना, शिक्षा र मानवअधिकार प्रवर्द्धनका विविध दृष्टिकोण र अनुभवहरू आदानप्रदान गरे । ग्लोबल मिट २०२४ ले विकासशील देशहरूमा मानवीय सहायता, स्वास्थ्य सेवा र शिक्षा प्रवर्द्धनमार्फत शान्ति स्थापना र अन्तर्राष्ट्रिय सहकार्यलाई प्रोत्साहन गर्ने उद्देश्य राखेको छ ।
कार्यक्रमको समापनमा अध्यक्ष अन्सारीले यस्तो महत्त्वपूर्ण मञ्चमा नेपाललाई प्रतिनिधित्व गर्न पाएकोमा गर्व व्यक्त गर्दै उपस्थित सबैलाई धन्यवाद ज्ञापन गरे । उनले भने, ‘यो बैठक शान्ति र समृद्धिका लागि हाम्रो साझा प्रतिबद्धताको प्रतिबिम्ब हो ।आगामी दिनमा पनि यस मञ्चले विश्वव्यापी सहयोगलाई बलियो बनाउन योगदान पु¥याउनेछ भन्ने विश्वास छ।’
कार्यक्रमले अन्तर्राष्ट्रिय सहकार्यलाई नयाँ उचाइमा पु¥याउने अपेक्षा गरिएको छ ।
