१७ मंसिर, काठमाण्डौ।
स्थानीय तहको उपनिर्वाचनको मतपरिणाम आउने क्रम जारी रहेको छ । अहिलेसम्मको मतपरिणाम अनुशार नेपाली कांग्रेसले सबैभन्दा बढी स्थानमा जित हासिल गरेको छ भने एमाले र माओवादी दोस्रो र तेस्रो स्थानमा देखिएका छन् ।
कांग्रेसले १५ वडाध्यक्षमा जित हासिल गरेपनि मेयर र अध्यक्षमा भने जित्न सकेको छैन् । कीर्तिपुरको मेयरमा भने कांग्रेसका उम्मेदवार अगाडि रहेका छन् । पालिका प्रमुख र उपप्रमुखमा एमाले र माओवादीले समान १, १ स्थानमा जित हासिल गरेका छन् ।
एमाले र माओवादीले समान ५, ५ वडाध्यक्षमा जित हासिल गरेका छन् । यस्तै जसपाले २ वडाध्यक्षमा जित हासिल गरेको छ । उपनिर्वाचानमा मतपरिणाम आउने क्रम जारी रहदा शीर्ष दलहरुकै दबदबा देखिदा संघीय राजधानी काठमाडौंका मतदाताले भने शीर्ष दलका उम्मेदवारलाई पाखा लगाउँदै चौथो ठूलो दल राष्ट्रिय स्वतन्त्र पार्टीकी उम्मेदवारलाई विजयी बनाएका छन् ।
काठमाडौं महानगरपालिका–१६ मा राष्ट्रिय स्वतन्त्र पार्टी (रास्वपा) की उम्मेदवार रोजिना श्रेष्ठ विजयी भएकी छन् । आइतबार भएको उपनिर्वाचनमा २ हजार ९०२ मत प्राप्त गर्दै श्रेष्ठ वडाध्यक्षमा निर्वाचित भएकी हुन् ।
यहाँ नेपाली कांग्रेसका उम्मेदवार देवेन्द्र पाठकले २ हजार २०४ मत प्राप्त गर्दा नेकपा (एमाले)का उम्मेदवार लक्ष्मी रत्न तुलाधरले २ हजार २२० मत प्राप्त गरे । यसैगरी, राष्ट्रिय प्रजातन्त्र पार्टी (राप्रपा)का श्याम कृष्ण श्रेष्ठले ७७४ मत प्राप्त गर्दा नेकपा (एकीकृत समाजवादी)का मीन बहादुर मानन्धरले १ हजार ८२ मत पाए ।
यहाँ स्वतन्त्र उमेदवार उठेका विक्रम चित्रकारले एक मत पनि पाएनन् । आयोगका अनुसार पाँचजना स्वतन्त्र उमेदवारले १० मत पनि कटाउन सकेनन् । स्वतन्त्र उमेदवार श्यामप्रसाद तिवारी ८, हीराप्रसाद सेति ७, अञ्जन श्रेष्ठ ६, सूर्यबहादुर बैदार ४ र प्रकाश पन्तले एक मत पाएका छन् ।
पन्तले भने उमेदवारी निष्क्रिय गरी राष्ट्रिय स्वतन्त्र पार्टीकी रोजिना श्रेष्ठलाई समर्थन गरेका थिए । उपनिर्वाचनमा स्वतन्त्र उमेदवार पशुपति कठायतले ९२, राप्रपा, नेपालका राजकुमार थापाले ६१, नेमकिपाका न्यूह मर्जनले २५, जसपाका सानुमैया राउत क्षेत्रीले २४ मत पाएका छन् ।
यता राष्ट्रिय स्वतन्त्र पार्टी (रास्वपा)ले काठमाडौं महानगरपालिका १६ मा विजयी ¥याली निकालेको छ । आइतबारको उपनिर्वाचनमा काठमाडौं महानगरपालिका १६ मा राष्ट्रिय स्वतन्त्र पार्टीको वडा अध्यक्ष उम्मेदवार रोजिना श्रेष्ठ विजयी भएपछि विजयी ¥याली निकालेका हुन् ।
स्थानीय तहमा यो रास्वपाको पहिलो जित हो । यसअघिका स्थानीय तह निर्वाचनमा रास्वपा सहभागी भएको थिएन । यो वडामा यसअघि कांग्रेस विजयी भएको थियो । कांग्रेसबाट निर्वाचित मुकुन्द रिजालको निधन भएपछि यहाँ उपनिर्वाचन भएको हो ।
