२३ मंसिर, काठमाण्डौ।
नेपाली चलचित्र उद्योगमा कीर्तिमान माथि कीर्तिमान बनाएको सर्वाधिक सफल चलचित्र ‘पूर्णबहादुरको सारंगी’ भोलिदेखि सिनेमा हलबाट हट्ने भएको छ। विजय बराल मुख्य भूमिकामा रहेको फिल्म ‘पूर्णबहादुरको सारंगी’ सोमबारदेखि प्रदर्शन नहुने निर्माण कम्पनी सेभेन सिज सिनेमाले विज्ञप्तिमार्फत जानकारी दिएको छ।
बिहीबारबाट दक्षिण भारतीय फिल्म ‘पुष्पा २’ ले नेपाली सिनेमा हलमा प्रवेश पाएपछि ‘पूर्णबहादुरको सारंगी’ को सो घटेको थियो। हलमा राम्रै चलिरहे पनि निकै कम सो दिएर नजरअन्दाज गरेकाले हलबाट उत्रार्ने निर्णय गर्नुपरेको विज्ञप्तिमा उल्लेख छ।
‘अहिले भने हामी कात्तिक १५, १६ र १७ गते जुन अवस्थामा थियौँ, ठिक त्यही अवस्थामा आइपुगेका छौँ। पूर्ण बहादुरको सारंगीलाई कर्नरिङ गरेपछि विद्रोह गर्ने अवस्थामा पुग्न बाध्य भएका छौँ,’ विज्ञप्तिमा लेखिएको छ, ‘पछिल्लो समयावधिमा देखिएका चुनौतीहरू र हाम्रो चलचित्रलाई केही सिनेमा घरहरूबाट गरिँदै आएको नजरअन्दाजको व्यवहारले यस निर्णयलाई अपरिहार्य बनाएको हो। मंसिर २४ सोमबार गतेदेखि देशभरका सिनेमा घरहरूमा पूर्ण बहादुरको सारङ्गी अब प्रदर्शनमा आउने छैन।’
कात्तिक १५ गतेबाट प्रदर्शनमा आएको यस फिल्मले अत्यधिक सो पाउनेदेखि सर्वाधिक कमाइ गर्ने नेपाली फिल्मको रेकर्ड बनाइसकेको छ। यस फिल्मले नेपालमा ५० करोड र विदेशमा २५ करोडमाथि कमाइ गरेको छ। एक महिनादेखि नेपाली बक्सअफिस ‘पूर्णबहादुरको सारंगी’ कै कब्जामा थियो ।
यस फिल्मले आक्रामक व्यापार गर्दा विदेशी फिल्मसमेत छायामा परे। ‘सिंघम अगेन’ र ‘भुलभुलैया २’ जस्ता फिल्महरुले कम सो पाए। अझ भारतीय फिल्म ‘कंगुवा’ नेपालमा रिलिज हुन सकेन। यस्तै, फिल्म ‘केटी हराएको सूचना’ ले पनि रिलिज मिति सार्नुपरेको थियो।
तर, कात्तिक ३० गतेबाट रिलिज भएको नीता ढुंगानाको फिल्म ‘ह्रस्व दीर्घ’ ले भने राम्रै साथ पायो। मंसिर ७ बाट विपिन कार्की र वर्षा राउतको मुख्य भूमिका रहेको फिल्म ‘तेल भिसा’ हलमा लागेको थियो। यसको व्यापार भने औसत छ।
यी दुवै फिल्मको दाँजोमा हलमा पाँचौँ हप्तामा पनि ‘पूर्णबहादुरको सारंगी’ को सो बढी थियो । तर बिहीबारदेखि भने यसका लागि दक्षिण भारतइि चलचित्र पुष्पा २ बाधक बन्यो । बिहीबार प्रदर्शनमा आएको दक्षिण भारतीय चलचित्र ‘पुष्पा २’ ले नेपालका हलहरु कब्जा गरेको छ ।
हल सञ्चालकहरुले दर्शकको रोजाइमा परिरहेका नेपाली चलचित्रहरु उतारेर ‘पुष्पा २’ लाई ऐतिहासिक संख्यामा शो दिएका छन् । देशभरका १६६ हलमा ‘पुष्पा २’ ले ५९१ शो पाएको छ । नेपालकै ठूलो मल्टिप्लेक्स चेन क्यूएफएक्सले यस चलचित्रलाई काठमाडौंभित्र मात्रै ८१ शो दिएको छ ।
बिहान ४ः३० देखि राति १२ बजेसम्मको शो दिइएको छ । क्यूएफएक्सले बिहीबारका लागि ‘पूर्णबहादुरको सारंगी’लाई जम्मा १० शो दिएको थियो भने आईएनआईले जम्मा ३ शो दिएको थियो ।अत्यधिक सो पाउनेदेखि सर्वाधिक कमाइ गर्ने नेपाली फिल्मको रेकर्ड पनि यसै फिल्मको नाममा दर्ज भएको छ।
व्यापारमा मात्रै होइन, ‘पूर्णबहादुरको सांरगी’ समावेश गीतहरू उत्तिकै लोकप्रिय बन्न पुगे। ‘रैया चाँदीको’ गीत युट्युबमा डेढ करोडमाथि भ्युज पाउँदा ‘काँधेकुरी’ पनि करोड नजिक छ । यस फिल्ममा पश्चिम पहाडको गाइने समुदायका बाबुछोराको कथा छ।
सरोज पौडेलको कथा र निर्देशन रहेको फिल्मलाई विनोद पौडेल र प्याट्रिक सुवेदीले निर्माण गरेका हुन्। फिल्मको पटकथा र संवाद महेश दवाडीले लेखेका हुन्। फिल्ममा विजयसहित अञ्जना बराइली, मुकुन भुषाल, भोलाराज सापकोटा लगायतको अभिनय छ।
