३० मंसिर ,काठमाण्डौ।
अमेरिकी नवनिर्वाचित राष्ट्रपति डोनाल्ड ट्रम्पको मानहानी गरेको मुद्दामा अमेरिकी सञ्चारमाध्यम एबीसी न्युजले एक करोड ५० लाख अमेरिकी डलर तिर्ने भएको छ । एबीसी न्युजका प्रस्तोता जर्ज स्टेफानोपौलोसले गएको मार्च १० मा एक अन्तर्वार्ताका क्रममा ट्रम्प ‘बलात्कारको घटनाका निम्ति जिम्मेवार’ भएको टिप्पणी गरेका थिए ।
उनले पटकपटक यस्तो दाबी गर्दै ट्रम्पलाई समर्थन गरेकामा एक महिला सांसदलाई चुनौती दिएका थिए । यस घटनामा एबीसीले स्टेफानोपौलोसको टिप्पणीका विषयमा पश्चात्ताप भएको भन्दै वक्तव्य जारी गरेको छ ।
एबीसी न्युजले यो मुद्दा सुल्झाउनका लागि एक करोड ५० लाख अमेरिकी डलर परोपकारी दानका रूपमा राष्ट्रपति फाउन्डेसन तथा संग्रहालयलाई दिने बताइएको छ । ट्रम्पको कानुनी शुल्कका रूपमा १० लाख डलर दिने समेत एबीसी न्युजले जनाएको छ ।
यस विषयमा उसले सम्पादकीय पनि प्रकाशन गर्ने बताइएको छ । यसैबीच बेलायती सञ्चारमाध्यम बीबीसीले अमेरिकी टेक जायन्ट एप्पलविरुद्ध उजुरी हालिएको जनाएको छ । एप्पलले आइफोनमा सेयर गरेको एक भ्रामक समाचार (फेक न्युज)को स्रोत बीबीसी भनेर उल्लेख गरेपछि उजुरी दायर गरिएको बीबीसीले जनाएको छ ।
गएको साता बेलायतमा सार्वजनिक एप्पल इन्टेलिजेन्सले धेरै माध्यमको सूचनालाई एकीकृत गर्छ । र, एआईको माध्यमबाट नोटिफिकेसन दिन्छ । यस्तै एउटा सूचनामा एप्पल एआईले अमेरिकामा एक स्वास्थ्य उद्यमीको हत्या आरोपमा पक्राउ परेका लुइगी म्यांगियोनले आत्महत्या गरेको जनाएको थियो ।
उक्त सूचनाको स्रोत एप्पल एआईले बीबीसीको प्रकाशित समाचार भनेर झुटो दाबी गरेपछि उजुरी गरेको जनाइएको छ । यो विषयमा एप्पलसँग नै उजुरी गरिएको बीबीसीका प्रवक्ताद्वारा जारी विज्ञप्तिमा उल्लेख छ । यसअघि, अमेरिकी सञ्चारमाध्यम न्युयोर्क टाइम्सलाई समेत एआईले यसरी नै झुटो समाचारको हलवा दिइएको जनाइएको छ ।
एप्पल एआईमाथि झुटो समाचारको आरोप लागिरहेका बेला च्याटजीपीटीमा भने अब भिडिओ च्याट जसरी कुरा गर्न सकिने भएको छ । ओपनएआईले यस प्लेटफर्ममा क्यामेरा प्रयोग गर्न सकिने फिचर ल्याउन लागेको हो ।
यो फिचर उपलब्ध भइसकेपछि च्याटजीपीटीको एपले फोनको स्क्रिन र क्यामेराको एक्सेस पाउने छ । यसले गर्दा प्रयोगकर्तालाई बारम्बार फोटो अपलोड गरिरहन पर्दैन । कुराकानीकै क्रममा स्क्रिन शेयर गरेपछि च्याटजीपीटीले आफूले देखेको फोटो वा स्क्रिनको विषय वस्तुलाई आधार बनाई कुरा अगाडि बढाउनेछ ।
त्यस्तै भिडिओ च्याट गरेजसरी च्याटजीपीटीको एड्भान्स्ड भ्वाइस मोडसँग भिडिओमै कुराकानी गर्न सकिनेछ । यससँगै तपाईंको हाउभाउ, अनुहारको भाव आदिका आधारमा च्याटजीपीटीले कुरा गर्नसक्ने बताइएको छ ।
महिनौंको परीक्षणपछि गत सेप्टेम्बरमा ओपनएआईले एड्भान्स्ड भ्वाइस मोड सार्वजनिक गरेको थियो । यस फिचरको सहायताले च्याटजीपीटीसँग बोलेरै अन्तरक्रिया तरिकाले कुरा गर्न सकिन्थ्यो ।
गत मे महिनामा कम्पनीले लाइभ भिडिओ मोडको पनि चर्चा गरेको थियो । उक्त फिचरले क्यामेरा कसरी प्रयोग गर्न सक्छ भन्ने डेमो प्रस्तुत गरिएको थियो । अन्ततः भिडिओ मोडको चर्चा गरेको सात महिनापछि कम्पनीले यस्तो फिचर ल्याउन लागेको हो ।
यो फिचर उपलब्ध भइसकेपछि भ्वाइस मोडकै आइकनमा गई भिडिओ र स्क्रिन शेयरको अप्सन छान्न सकिनेछ । यो फिचर सुरुवाती चरणमा च्याटजीपीटी प्लस, प्रो र टिम्स प्रयोगकर्ताले प्रयोग गर्न पाउने बताइएको छ । इन्टरप्राइज र ईडीयू प्रयोगकर्ताले भने जनवरीदेखि मात्र यो फिचर प्रयोग गर्न पाउनेछन् ।
