१ पुष , काठमाण्डौ।
मलेसियामा शनिवारबाट सुरु भएको एसिसी यु १९ महिला एसिया कपमा नेपालले आज पाकिस्तानसँग खेल्दैछ । समूह बी मा रहेका नेपाल र पाकिस्तानबीचको खेल नेपाली समयअनुसार बिहान १२ः४५ बजे क्वालालम्पुरस्थित बायुमास ओभलमा सुरु हुनेछ ।
पहिलो पटक आयोजना भईरहेको यु १९ महिला एसिया कपमा नेपालले आफ्नो पहिलो खेल खेल्दैछ । पाकिस्तानको टोलीले भने दोस्रो खेल खेल्दैछ । पाकिस्तानको टोली आइतवार भारत यु १९ को टोलीसँग ९ विकेले पराजित भएको थियो ।
पाकिस्तान पहिलो खेलमै भारतसँग पराजित भएकोले नेपालले आजको खेल जित्न सके सुपर फोर मा प्रवेश गर्नेछ । पुजा महतोको कप्तानीमा रहेको नेपाली टोली उच्च मनोबलका साथ मलेसिया पुगेको छ ।
आईसीसी यू१९ महिला टी२० विश्वकप एसिया छनोटको विजेता बनेपछि नेपाल यू१९ विश्वकप र यू १९ एसिया कपमा छनोट भएको थियो । नेपालले दोस्रो खेलमा भारतसँग पुस २ गत (डिसेम्बर १७) प्रतिस्पर्धा गर्नेछ । प्रतियोगिताको समूह ‘ए’ मा श्रीलंका, बंगलादेश र मलेसिया रहेका छन् ।
यु १९ महिला विश्व कप आगामी बर्षको जनवरीमा मलेसियामा नै आयोजना हुँदैछ । विश्व कपमा नेपाल अस्ट्रेलिया, बंगलादेश र स्कटल्यान्डसँग समूह ‘डी’ मा रहेको छ । नेपाली टोलीमा सोनी पाख्रिन, किरन कुमारी कुवँर, कृष्मा गुरुङ, साना प्रविन, स्नेहा महरा, सावित्रा धामी, तृषना विक, रिया शर्मा, अलिशा कुमारी यादव, पूजा महतो, कुसुम गोदार, सिमाना केसी, ज्योत्सिका मरासिनी, रचना चौधरी र अनु कडायत रहेका छन् ।
यता हङकङविरुद्धको ३ खेलको एकदिवसीय सिरिजको पहिलो खेलमा नेपाल यु १९ ले टस जितेको छ । मुलपानी क्रिकेट मैदानमा भएको टस जितेर नेपालका कप्तान अभिषेक तिवारीले पहिले बलिङ रोजेका हुन् ।
नेपाल र हङकङबीचको दोस्रो खेल पुस ३ र तेस्रो खेल पुस ५ गते हुनेछ । नेपालले यु १९ विश्व कप एसिया छनोटको तयारीमा यो सिरिज खेल्दैछ । विश्व कप एसिया छनोट आगामी वर्षको अप्रिलमा काठमाडौंमा हुनेछ ।
नेपालको प्लेईङ–११ अभिषेक तिवारी (कप्तान), सुर्यान्सु कोइराला, दयानन्द मण्डल, सोहेल कुवँर, दिलसाद अली, राजेश बोहोरा, अपराजित पौडेल, सन्तोष यादव, रोशन विश्वकर्मा, सिब्रिन श्रेष्ठ, नरेन भट्ट रहेका छन् ।
