२५ पुष , काठमाण्डौ ।
साउदी अरबमा भारी वर्षा, आँधीबेहरी र आँधीले विनाश जारी राखेको छ। देशका धेरै भागहरूले गम्भीर मौसमको अवस्थाको सामना गरिरहेका छन्। आगामी दिनमा मौसमको अवस्था बिग्रन सक्ने सम्भावना रहेको गल्फ न्युजले जनाएको छ ।
हालै मक्कामा भारी वर्षाका कारण बाढीले कार बगाएपछि चारजना साथीहरू बगेको आफन्तहरूले बताएको समाचारमा भनिएको छ । राष्ट्रिय मौसम विज्ञान केन्द्र (एनसीएम) ले राजधानी रियाद, मक्का, असीर र बाहासहित धेरै क्षेत्रका लागि रेड अलर्ट जारी गरेको छ।
एनसीएमले यी क्षेत्रहरूमा भारी वर्षा, असिना र तीव्र हावाको चेतावनी दिएको छ। मौसम विभागका अनुसार कतिपय क्षेत्रमा वर्षा हुने सम्भावना अझै छ। अरब न्यूजका अनुसार यस सिजनको पहिलो वर्षा मङ्गलबार राजधानी रियादमा रेकर्ड गरिएको थियो।
सोमबार भारी वर्षापछि मक्का, मदीना र जेद्दामा तल्लो क्षेत्रमा बाढीको अवस्था देखिएको छ। नागरिक सुरक्षाले मानिसहरूलाई बाढी आएको तल्लो क्षेत्र र उपत्यकाहरूबाट टाढा रहन सल्लाह दिएको छ।
एनसीएमका अनुसार देशका उत्तरी भागहरूमा आगामी दिनमा तापक्रम घट्न सक्छ। रियाद, कासिम, पूर्वी क्षेत्र र जाजान क्षेत्रमा धुलोको आँधी आउने अनुमान गरिएको छ। रेड सीमाथि उत्तरी र मध्य भागमा उत्तर–पूर्वदेखि उत्तरतिर र दक्षिणी भागमा दक्षिण–पूर्वदेखि दक्षिण–पश्चिममा २०–५० किलोमिटर प्रतिघण्टाको गतिमा हावा चल्न सक्ने एनसीएमले जनाएको छ।
छालहरू डेढ मिटरदेखि दुई मिटरभन्दा बढीसम्म हुन सक्छन्। नागरिक रक्षा महानिर्देशानालयले खराब मौसमलाई ध्यानमा राख्दै चेतावनी र सुरक्षा निर्देशनहरू जारी गरेको छ। एसले मानिसहरूलाई घरमै बस्न, उपत्यकाहरू र जलमग्न क्षेत्रहरूबाट टाढा रहन र सबै सुरक्षा निर्देशनहरू पालना गर्न आग्रह गरेको छ।
हामी देशका केही भागहरूमा मौसमको अवस्थाको निगरानी गरिरहेका छौं विज्ञप्तिमा भनिएको छ । मक्का, मदीना र जेद्दाका थुप्रै भिडियोहरू सामाजिक सञ्जालमा सार्वजनिक भएका छन्। भिडियोमा कारहरू पानीमा डुबेको देखिन्छ।
साउदी अरबको मौसममा विगत केही दिनदेखि निरन्तर परिवर्तन भइरहेको देखिएको छ। एकातिर हजारौँ वर्षदेखि बलौटे माटोमा हरियो घाँस उम्रिँदै आएको छ भने अर्कातिर वर्षाका लागि लालायित सहरहरूले भारी वर्षा र बाढीको सामना गरिरहेका छन्।
वैज्ञानिकहरू यो घटनाको कारण जलवायु परिवर्तनलाई मानेका छन् ।साउदी जनरल डाइरेक्टोरेट अफ सिभिल डिफेन्सले पनि सतर्कता अपनाउन आह्वान गरेको छ र आइतबारसम्म राज्यका अधिकांश भागहरूमा आँधीबेहरी जारी रहने चेतावनी दिएको छ।
यसले मक्का क्षेत्रमा मध्यमदेखि भारी वर्षा हुने र यसको परिणामस्वरूप बाढी, असिना र धुलोले भरिएको हावा लाग्ने बताएको छ। अल बहा, असीर, जाजान, पूर्वी प्रान्त, तबुक, अल जौफ, उत्तरी सीमा, हेल, मदीना, अल कासिम र रियाद क्षेत्रमा पनि वर्षाको पूर्वानुमान गरिएको छ।
साउदी अरेबियाको मरुभूमि क्षेत्रफल लगभग २२ लाख वर्ग किलोमिटर छ । जुन देशको कुल भूभागको ठूलो भाग ओगट्छ। साउदी अरेबिया विश्वका सबैभन्दा ठूलो मरुभूमि राष्ट्रहरू मध्ये एक हो ।
रुब–अल–खाली यो मरुभूमि “इम्प्टी क्वार्टर“ नामले पनि चिनिन्छ। लगभग ६ लाख ५० हजार वर्ग किलोमिटर क्षेत्रमा फैलिएको यो मरुभूमि संसारकै सबैभन्दा ठूलो निरन्तर बालुवाको मरुभूमि हो। यसले साउदी अरेबिया, ओमान, यमन, र युएईको भागहरू ओगटेको छ।
