११ माघ , काठमाण्डौ।
बुटवलस्थित सुप्रिम बचत तथा ऋण सहकारी संस्थाको रकम अपचलन प्रकरणमा राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेविरुद्धको मुद्दामा आज पनि थुनछेक बहस जारी छ ।
आज जाहेरवाला तर्फका दुई र रवि पक्षका वकिलहरुले बहस गर्नेछन् । जिल्ला अदालत रुपन्देहीमा बिहीबार सरकारी वकिलहरूले ४ घण्टा बहस गरेका गरेका थिए । न्यायाधीश प्रह्लाद कुमार योगीको इजलासमा सहकारी पीडितको तर्फबाट आज दुई जना कानुन व्यवसायीले बहस गर्नेछन् ।
त्यस लगत्तै लामिछानेको तर्फबाट सुशील पन्त, सुरेन्द्र थापा, पशुपति भण्डारीले बहस गर्ने छन् । दुवैतर्फको बहस सकिएपछि जवाफी बहस हुने रुपन्देही जिल्ला अदालतका श्रेस्तेदार यज्ञमूर्ति ज्ञवालीले बताएका छन् ।
रवितर्फबाट आज वकिलको संख्या घटाएर आजै आदेश आउन सक्ने गरी वहस गर्ने रवि पक्षको तयारी छ । सरकारी बहसमा जिल्ला सरकारी वकिलका प्रमुख प्रेमराज पौडेल, गोकर्ण घिमिरे, पवित्रा भण्डारी, वसन्त पोखरेल र सुनिल लामिछानेले बहस गरेका थिए ।
उच्च सरकारी वकिल कार्यालय बुटवलका तर्फबाट सोमकान्त भण्डारी, प्रकाश मरासिनी र रवि न्यौपाने बहस गरेका छन् । आज सुरुमा जाहेरवाला तर्फका वकिलहरू वरिष्ठ अधिवक्ता सुरेन्द्र भण्डारी र अधिवक्ता आर्सी गौतमले बहस गरेपछि लामिछानेका वकिलहरूले बहस गर्नेछन् ।
लामिछानेका तर्फबाट वरिष्ठ अधिवक्ता तथा पूर्वमहान्यायाधिवक्ता सुशीलकुमार पन्तसहितका अधिवक्ताको बहस सकिएपछि सरकारी वकिल र जाहेरवाला तर्फका वकिलले जवाफी बहस गर्नेछन् ।
त्यसपछि भने न्यायाधीशले थुनछेक आदेशमार्फत रवि पुर्पक्षका लागि थुनामा जाने, धरौटीमा रिहा हुने वा साधारण तारिखमा रिहा हुने आदेश सुनाउनेछन् । यसअघिको बहसमा सरकारी वकिल र जाहेरवाला तर्फको बहसमा रविलाई पुर्पक्षका लागि थुनामा पठाउनु पर्ने तर्क गरिएको छ ।
उनीहरुले रविलाई प्रहरी हिरासतमा नपठाएकोमा समेत आपत्ति जनाएका छन् । गत माघ ६ गते जिल्ला सरकारी वकिल कार्यालयले पूरक अभियोग पत्रबाट लामिछाने, पूर्वडीआईजी छविलाल जोशीसहित १४ जनाविरुद्ध सहकारी ठगी र सङ्गठित अपराधमा मुद्दा दर्ता गरेको थियो ।
मुद्दामा जीबी राई, रवि लामिछानेसहित २८ जनाबाट ५५ करोडभन्दा बढी र रवि, छविलाल जोशी र लक्ष्मीप्रसाद पौडेलबाट १० करोड ९९ लाख थप बिगो र रविको व्यक्तिगततर्फ २ करोड बिगो दाबी गरिएको छ ।
रुपन्देहीपछि रविले चितवन र पर्सामा समेत जानु पर्ने अवस्था छ । यद्यपि तीज जिल्लामा अहिले मुद्दा भने दर्ता भएको छैन् । चितवन सरकारी वकिलको कार्यालयले प्रहरीले बुझाएको प्रतिवेदन नै फिर्ता पठाएको छ ।
रविविरुद्ध मुद्दा चल्ने गरी प्रर्याप्त आधार र प्रमाण प्रतिवेदनमा नरहेको उल्लेख छ । यस्तै पर्सा प्रहरीले पनि रविमाथि मुद्दा दर्ता गर्ने गरी प्रतिवेदन बुझाएको छैन् ।
यसअघि रवि रसहकारी ठगी प्रकरणमा जोडिएका गोर्खा मिडियाकै पूर्व संचालक छविलाल जोशीसँग ती जिल्लामा पनि बयान लिइएको थियो । रवि र छवि कास्की र काठमाडौंबाट भने धरौटीमा रिहा भइसकेका छन् ।
