१३ माघ , विराटनगर।
केबलकार संचालन गर्ने विषयको उठानदेखि नै विवादित बनेको ताप्लेजुङको फुङलिङ नगरपालिका– ११ स्थित पाथीभरा क्षेत्रमा तनाव उत्कर्षमा पुगेको छ । यहाँ फेरि प्रहरी र प्रदर्शनकारीबीच झडप भएको छ ।
पाथीभरा क्षेत्रमा ‘नो केवलकार’ भन्दै आन्दोलनमा उत्रिएका स्थानीय र प्रहरीबीच शनिबार झडप भएको हो । यसक्रममा प्रहरीले गोली चलाएको पाइएको छ । प्रहरीको गोली लागेर ४ जना घाइते भएका छन् ।
जसमा तीनजनाको अवस्था गम्भीर बनेको छ । एक प्रहरी पनि घाइते भएका छन् । प्रहरीका अनुसार झडपमा यामबहादुर लिम्बू, सगुन लावती र धर्मान पालुङ्वालाई गोली लागेको थियो । उनीहरुको अवस्था गम्भीर भएपछि थप उपचारका लागि विराटनगर ल्याइएको छ ।
आजदेखि केवलकार निर्माणाधीन क्षेत्रमा संघर्षका कार्यक्रम जारी राख्ने तयारी स्थानीयले गरेका थिए । यसै कार्यक्रमलाई मध्यनजर गर्दै स्थिति नविग्रियोस भन्नका लागि स्थानीय प्रशासनले हिजो शनिबारदेखि नै सशस्त्र र नेपाल प्रहरी खटाएको थियो ।
तर यसले झनै त्यहाँ झडपको अवस्था बनाइएको हो । शनिबार बेलुका करिब ६ बजे पाथिभरा क्षेत्रको बलुडाडामा प्रहरी पुगेपछि आन्दोलनकारीले ढुंगामुडा गरेका थिए । झडपमा प्रदर्शनकारीका साथै प्रहरीतर्फ पनि १२ बढी घाइते भएका छन् ।
प्रहरीका अनुसार स्थानीयले ढुंगा र गुलेली हानेपछि गोली चलाउनुपरेको थियो । काफ्लेपाटीभन्दा माथि रहेको बलुडाँडामा झडप भएको हो । प्रहरीले आन्दोलनकारीबाट तीन खुकुरी, गुलेली र अन्य सामान बरामद गरेको जिल्ला प्रहरी कार्यालयले जनाएको छ ।
सशस्त्र प्रहरी नायब उपरीक्षक नरेश महर्जनका अनुसार आन्दोलनकारीसँग लुकाइएको हतियार रहेको सूचना पाएपछि खोजतलास गर्ने क्रममा विभिन्न सामान बरामद गरिएको हो । हिमालयन कन्सट्रक्सनले १५ महिनाभित्र निर्माण सम्पन्न गर्ने गरी केवलकार निर्माण योजना अघि बढाएको छ ।
पहिचान पक्षधरले भने केबलकार निर्माण गर्दा पाथीभरा क्षेत्रको पहिचान मासिने भन्दै ‘नो केबलकार आन्दोलन’ चलाइरहेका छन् ।
