१५ माघ , काठमाण्डौ ।
नेपाली राजनीतिमा बालेन, हर्क, रविजस्ता नयाँ पुस्ता आउनुअघिसम्म गगन थापाको अनुहार नेपाली युवापूस्तामा चम्किलो थियो । विद्यार्थी राजनीतिदेखि नै सबैभन्दा बढी चर्चा र सफलतामा रहेका उनी संसदीय राजनीतिमा छिरेदेखि भाषणकलाबाट झन् लोकप्रिय बने ।
पूर्व विद्यार्थी नेता, पूर्व कार्यक्रम प्रस्तोताका हिसाबले पनि गगन भाषणकलाबाट चर्चित बनेका हुन् । जतिबेला उनी नेपाली कांग्रेसको महामन्त्री पनि थिएनन्, सभापति र संसदीय दलको नेता बन्नका लागि शेरबहादुर देउवालाई टक्कर दिदै पार्टीको चुनावमा होमिएका पनि थिएनन्, त्यतिबेला गगनको जस्तो लोकप्रियता सायदै कुनै नेताको थियो ।
गगन एक यस्ता नेता थिए जसलाई सुन्न सबै मिडियाहरु पुग्थे । कांग्रेसमात्रै होइन, एमाले, माओवादी अन्य दलका युवाहरुले पनि गगनको भाषण मन पराएरै सुन्ने गर्थे । जसरी उनले पार्टीमा सभापतिलाई नै खुला च्यालेञ्ज दिन्थे, यो अभ्यास नेपाली राजनीतिमा विरलै देखिन्छ, आफै सम्मिलित सरकार र प्रधानमन्त्रीलाई खबरदारी गर्थे, नागरिकको दैनिकी र विशेष गरी युवाहरुलाई जसरी सम्बोधन गर्थे, गालीको होइन, सुसंस्कृत राजनीतिको अध्यास गर्थे ।
धेरैले गगनलाई प्रधानमन्त्री भएको हेर्ने इच्छा जाहेर गर्थे । जस्तो अहिले बालेन र रवि प्रधानमन्त्री भएको हेर्ने अधिकाँश युवाहरुको छ । सम्भवतः वरिपरिको त्यही पोजिटिभ इनर्जीले गगनमा पनि प्रधानमन्त्री बनिहाल्ने रहर र हुटहुटी पलायो ।
तर यो केही समयअघिको कुरा हो । अहिले विगतको भन्दा गगनको चार्म केही ओइल्याएको छ । सायद नयाँ युवा नेताहरुको आगमन यसको कारण हुन्सक्छ । तरपनि अहिले पनि पुराना दल र पुराना नेताहरुको तुलनामा गगनको लोकप्रियता माथि नै छ ।
यस्तै स्वयं उनको प्रधानमन्त्री बन्ने हुटहुटीमा भने कुनै कमि आएको छैन । उनले जहिलेदेखि प्रधानमन्त्री बन्न प्रयास गर्ने घोषणा गरे त्यहि बेलादेखि यसको अभ्यास पनि गर्दै आएका छन् । केही वर्षदेखि विज्ञहरुको टिमहरुसँग ‘प्रोजेक्ट गभर्मेन्ट’ मा काम गरिरहेका छन् गगन ।
०७४ को निर्वाचनपछि पार्टी नराम्ररी खुम्चिएपछि संसदमा प्रतिपक्षको दरिलो आवाज बनेर गर्जिँदै आफ्नो काममा लागे । गएको प्रतिनिधिसभाको चुनावमा काठमाडौं ४ का मतादातासंग आफू प्रधानमन्त्री बन्नकै लागि उनले भोट मागे ।
पार्टीभित्र पनि सभापतिका लागि देउवासंग जुधे । महामन्त्री बनेपछि संसदीय दलको नेता बन्न पनि भिडे तर सफल हुन सकेनन् । यसबीच उनले अब आफ्नो राजनीतिक करियर जम्मा १० वर्ष बाँकी रहेको स्वघोषणा पनि गरे ।
जसमा तीन वर्ष त वितिपनि सक्यो । आफैले तोकेको समय सीमा घर्किदै जाँदा अब गगनलाई कांग्रेसबाट आगामी प्रधानमन्त्री नबनी सुखै छैन । तर यसमा अड्चन छन् स्वय शेरबहादुर देउवा। अबको डेढवर्षपछि कांग्रेसको भागमा पर्ने प्रधानमन्त्रीमा देउवा नै बन्ने पक्का छ ।
किनभने कांग्रेसमा देउवाको इच्छा बेगर पात पनि हल्लिदैन । यद्यपि, अब हुने महाधिवेशनमा सभापतिको दौडमा देउवा हुने छैनन् । तर उनले नचाहाँदासम्म गगन न सभापति बन्न सक्छन् न संसदीय दलको नेता ।
प्रधानमन्त्री त त्यसपछिको कुरा भयो । हुनत गगनले हरेक भाषणमा आफूलाई भावी प्रधानमन्त्रीको रूपमा स्थापित गर्ने प्रयास गरिरहेका छन् । आइतबार पनि भक्तपुरमा भएको एक कार्यक्रममा उनले यस्तै चाहना जाहेर गरे ।
उनले आफू प्रधानमन्त्री बने अहिलेका प्रधानमन्त्री वा त्यसअघि भएका प्रधानमन्त्रीहरुले भन्दा राम्रो काम गर्ने दाबी गरे । आजको आजै आफू प्रधानमन्त्री बन्नका लागि सम्पूर्णरुपले योग्य रहेको ठोकुवा गरे ।
हुन त यसअघि प्रधानमन्त्री बन्नकै लागि उनले देउवासँग संसदीय दलको नेतामा लडेका पनि थिए । तर, उनी देउवासँग दोब्बर मतान्तरले पराजित भएका थिए । देउवाको पक्षमा ६४ र गगनको पक्षमा २५ मत प¥यो ।
अहिलेदेखि नै गगन आगामी निर्वाचनपछि प्रधानमन्त्री बन्ने रणनीतिमा छन् । उनलाई कांग्रेसभित्रका धेरै युवा नेताहरूको साथ छ । त्यसबाहेक अरु पार्टीका युवा नेता र आम युवा पङ्क्तिकोे सहानुभूति छ ।
बुढापाका नेताहरूबाट वाक्कदिक्क भएका युवामा पनि गगन प्रधानमन्त्री बनेको हेर्ने चाहना छ ।तर,गगनको प्रधानमन्त्री हुने सपना सहजै पूरा हुने अवस्था भने देखिँदैन । एक त विगतको भन्दा आफ्नो लोकप्रियता गुमाएका छन् ।
रवि लामिछानेविरोधी कित्तामा खुलेरै उभिएपछि र मुख्यतः उनकै भूमिकाले रवि लामिछाने अहिले अदालतहरुको चक्कर काटिरहँदा युवा जमातबाट त्यसको दोष गगनले बोक्नु परेको छ । यसबाट धेरै युवाहरु चिढिएको सामाजिक संजाल हेर्दा प्रष्टसँग देखिन्छ ।
अर्को पछिल्लो समय गगन आफ्नै पार्टीभित्र एक्लिँदै गएका छन् । उनी आफ्नो गुटबाट पनि एक्लो भएका छन् । इतर समूहका नेता शेखरसँगको सम्बन्ध निकै चिसिएको छ । सार्वजनिक मञ्चमा समेत कोइराला र थापाबीच घोचपेच हुन थालेको छ ।
शेखरसंग टाढा हुँदै गएपछि गगनले आफूलाई सबैभन्दा बढी फाइदा हुने गरी देउवालाई ढोग दिन थालेको चर्चा पनि कांग्रेस भित्रै छ । आफ्ना पक्षका केही व्यक्तिलाई टिकट दिलाउन निर्वाचन क्षेत्रसमेत छोड्न तयार भएका गगन पार्टीभित्रै लोकतन्त्र खोज्नेहरुसँगको भेटलाई तीव्रता दिएको धेरैले असन्तुष्टि पनि जाहेर गरेका छन् ।
यता सभापति देउवाले पनि आफ्नो उत्तराधिकारी तयार पारिसकेका छैनन् । पार्टी नेतृत्वका आकांक्षीहरू उनको साथ र समर्थन लिने कसरतमा छन् । संस्थापन पक्षभित्रै कांग्रेस उपसभापति पूर्णबहादुर खड्का, कृष्णप्रसाद सिटौला, विमलेन्द्र निधि, प्रकाशमान सिंह, शशांक कोइराला देउवाको साथ–समर्थन लिने दौडमा छन् ।
तर देउवाले संगठनमा पकड राखेका इतरपक्षका नेता शेखर कोइराला र महामन्त्री गगन थापाप्रति झुकाव राख्ने गरेको चर्चा कांग्रेस वृत्तमा छ । संस्थापन पक्षमा बालकृष्ण खाण, एनपी साउद, प्रकाशशरण महत, मोहनबहादुर बस्नेतलगायतका नेताले शेखर कोइरालाप्रति सकारात्मक सद्भाव देखाउन थालिसकेका छन् ।
देउवाले भने राष्ट्रिय राजनीतिका निर्णायक भूमिका र छलफलमा महामन्त्री थापालाई अघि सारिरहेका छन् । यद्यपि देउवाको पछि आरजु बलियो रुपमा उभिसकेकी छिन् । सरकारमा कांग्रेसको नेतृत्व प्रकाशमानसिंहले गरेपनि आरजुको बोलवाला छ ।
परराष्ट्र मन्त्रीका रुपमा आरजुले बढाएको अन्तराष्ट्रिय छवि र पार्टी भित्र पति शेरबहादुरको साथले देउवाको बिढो आरजुले नै थाम्ने संभावना देख्ने कांग्रेस नेताहरु पनि अधिक रहेका छन् । यस्तो अवस्थामा देउवाको रोजाइ कोइराला र थापा कि पत्नी आरजु मध्ये को हो भन्ने प्रस्ट भने छैन् ।
अहिले शेखर भन्दा गगनसँग देउवाको निकटता बढेको देखिन्छ । अर्कातर्फ यी दुई नेताबीचको टक्करले पार्टीभित्र नयाँ ध्रुवीकरणको पैरवी पनि हुन थालेको छ । यसबीच शेखर आफ्नो समूहलाई थप बलियो बनाउने रणनीतिमा छन् ।
उनीसँग अर्का महामन्त्री विश्वप्रकाश निकट देखिन्छन् । साथै अहिलेको सेन्टिमेन्टलाई क्याच गर्दै शेखर गगनको उल्टो रास्वपा सभापति रवि लामिछानको बचाउमा लागेका छन् । जुन गगनका लागि घातक बन्नेछ।
यही परिस्थित बढ्दै गए आगामी महाधिवेशनमा शेखरसँग गगनले सभापति प्रतिस्पर्धा गर्नुपर्ने स्थिति सिर्जना हुँदै गएको छ । रविकै कारण गगनलाई कमजोर पार्ने शेखर पक्षको रणनीति छ । यस्तोमा पुस्तान्तरण र रुपान्तरणको बहस गर्नेहरुबाटै गगनले संसदीय दलको नेतामा धोका पाउने हो कि भन्ने आशंका छ ।
फेरि पनि संसदीय दलको निर्वाचनमा संस्थापन इतरका नेताहरुलाई नै मिलाउन उनलाई कठिन पर्ने देखिन्छ । सबैलाई मिलाएर संस्थापन इतरबाट साझा उम्मेदवार बन्न नसके प्रधानमन्त्री बन्ने गगनको दोस्रो पटकको सपना पनि सपना मात्रै नहोला भन्न सकिन्न ।
