२५ माघ , एजेन्सी ।
विश्व फुटबलका सबैभन्दा सफल डिफेन्डरमध्ये एक ब्राजिली स्टार मार्सेलोले बिहीबार ३६ वर्षको उमेरमा फुटबलबाट सन्न्यासको घोषणा गरेका छन्। ‘मेरो खेलाडी यात्रा यहीँ समाप्त हुन्छ। तर, फुटबललाई अझ धेरै दिन बाँकी छ।
सबैलाई धन्यवाद,’ मार्सेलोले सामाजिक सञ्जाल ‘एक्स’मा पोस्ट गरिएको भिडियोमार्फत भने। आक्रमणमा समेत उत्कृष्ट प्रदर्शन गर्ने डिफेन्डर मार्सेलोको करियर ट्रफीहरूबाट भरिपूर्ण छ। सन् २००७ देखि २०२२ सम्म स्पेनिस क्लब रियल मड्रिडमा उनी रहे।
तर, सन् २०२३–२४ उनी आफ्नै बाल्यकालीन क्लब फ्लुमिनेन्स फर्किए। मार्सेलोले ब्राजिलको जर्सीमा सन् २०१४ र २०१८ को विश्वकप खेलेका थिए। सन् २००८ को ओलम्पिकमा कांस्य र सन् २०१२ मा उनी रजत पदक विजेता पनि बने।
रियलबाट उनले पाँच पटक च्याम्पियन्स लिग, ६ पटक स्पेनिस लिगसहित २५ उपाधि जिते। रियलले उनको प्रशंसा गर्दै भनेको छ, ‘मार्सेलो हाम्रो क्लब र विश्व फुटबलका महान् हस्तीमध्ये एक हुन्।’ मार्सेलोले सन् २००६ मा युरोप यात्रा गर्दा रियल कठिन अवस्थामा थियो।
तर, उनले क्रिस्टियानो रोनाल्डोसँगको सहकार्यसँगै रियललाई इतिहासकै सफल युगमा पु¥याउन महत्त्वपूर्ण भूमिका खेले। रोनाल्डोले पनि ‘एक्स’ मार्फत भने, ‘मेरो भाइ, कस्तो अविश्वसनीय करियर! हामीले सँगै धेरै क्षणहरू बाँडेका छौं।
तिमी मैदान बाहिर पनि जीवनभरको साथी होऊ। नयाँ यात्रा सफल होस्, साथी।’ १६ सिजनमा ५४६ खेल खेलेपछि मार्सेलोले सन् २०२२ मा पाँचौं युरोपियन कप जित्दै रियल छाडेका थिए। त्यति बेला उनी क्लबको इतिहासमा सबैभन्दा बढी उपाधि जित्ने खेलाडी थिए। तर, लुका मोड्रिच र नाचो फर्नान्डेजले २६ उपाधिसहित त्यो कीर्तिमान भंग गरे।
ग्रिसको ओलम्पियाकोस क्लबमा छोटो समय बिताएपछि मार्सेलो फ्लुमिनेन्स फर्किएका थिए। त्यहाँ उनले कोपा लिबरटाडोरेस उपाधि जित्दै आफ्नो गौरवमय करियरलाई अन्तिम बिदाइ दिएका थिए ।
यसैबीच विश्व फुटबलको सर्वोच्च निकाय फिफाले पाकिस्तान फुटबललाई पुनः प्रतिबन्ध लगाएको छ । फिफा क्यालेन्डर अनुसार नियमित काम नगरेको, समयमा निर्वाचन नगरेको भन्दै फिफाले साउथ एसियन जोनमा रहेको पाकिस्तानमाथि प्रतिबन्ध लगाएको हो ।
यसअघि सन् २०२१ मा पनि पाकिस्तान फिफाको प्रतिबन्धमा परेको थियो । प्रतिबन्धपछि फिफाको क्यालेन्डरमा रहेको अन्तर्राष्ट्रिय खेलहरूमा पाकिस्तान सहभागी हुन पाउनेछैन । सन् २०२१ को एक वर्ष लामो प्रतिबन्धलाई ०२२ मा फुकुवा गर्दै फिफाले विधान बमोजिमको काम गर्न पाकिस्तानलाई आग्रह गरेको थियो ।
तर पाकिस्तान फुटबलमा प्रत्यक्ष राजनीति हाबी भएसँगै समयमा ती कामहरू हुन नसक्दा फिफाले पुनः प्रतिबन्ध लगाएको हो । प्रतिबन्धमा परेसँगै पाकिस्तानले एएफसी एसियन कपको तेस्रो चरणको छनौट खेल्ने अनि अनिश्चित बनेको छ ।
छनौट प्रतियोगिता अन्तर्गत समूह ई मा रहेको पाकिस्तानले सिरिया, अफगानिस्तान र म्यानमारसँग खेल्ने कार्यक्रम रहेको थियो । यो प्रतिबन्ध कति समयको लागि हो भनेर फिफाले खुलासा भने गरेको छैन ।
