२७ माघ , एजेन्सी ।
दिल्लीको मुख्यमन्त्रीका रुपमा दोस्रो कार्यकालमा पनि आम आदमी पार्टीका मुख्यमन्त्री अरविन्द केजरीवालले केन्द्र सरकारले काम गर्न नदिएको भन्दै पटक पटक गुनासो गरे । मुख्यमन्त्री रहदै उनीमाथि मदिरा घोटालाको आरोप लाग्यो ।
यही आरोपमा उनी हप्तौसम्म प्रहरी हिरासतमा बसे । अदालतले नै उनलाई न्यायिक प्रहरी हिरासतमा पठायो । अरविन्द र उनको दल आपले यसलाई राजनीतिक प्रतिशोध भने । प्रधानमन्त्री नरेन्द्र मोदीलाई तानाशाहको रुपमा ब्याख्या गरियो ।
यो मुद्दाको अन्तिम फैसला भएको छैन् ।तर अरविन्दलाई अदालतले हिरासतमुक्त गर्याे र उनलाई चुनाव लड्ने अवसर दियो । तर दिल्लीका जनताले आप र अरविन्दले जे भनिरहेका थिए । त्यसलाई अनुमोदन नगर्ने सन्देश दिँदै केजरीवाललाई प्रतिपक्ष दलको नेताका रुपमा पनि अस्वीकार गर्ने जनादेश दिएका छन् ।
दिल्लीमा २५ वर्ष पछि बल्ल केन्द्र सरकारमा तीन कार्यकाल शासन गरिरहेको भाजपाले जितेको छ । १० बर्ष राज गरेको आप हारेर दोश्रो दल भएको छ । सबैभन्दा आश्चर्यकै विषय हो दुई कार्यकाल प्रचण्ड सिटका साथ दिल्लीमा सरकार चलाएको आपका संयोजक नै पराजित भएका छन् ।
यसबाहेक आप अघि लगातार तीन कार्यकाल सरकार संचालन गरेको सबभन्दा पूरानो दल कांग्रेस र कम्युनिष्टहरुको पत्ता साफ भएको छ।केजरीवालको उदय उनको रजगज, भ्रष्टचारको आरोप र निर्वाचनमा भोगेको अप्रत्यासित हारलाई भने नेपालको वैकल्पिक शक्तिका रुपमा विश्लेषण गर्ने गरिएको राष्ट्रियस्वतन्त्र पार्टीका सभापति तथा पूर्वगृहन्त्री रवि लामिछानेसँग जोडेर हेरिएको छ ।
केजरीवालसँग रविलाई दाँज्ने काम भने रविका कटुआलोचक मध्येका एक नेकपा एमालेका नेता तथा पूर्वमन्त्री महेश बस्नेत रहेका छन् । दिल्लीको विधानसभाको मतपरिणामपछि केजरीवालले हार स्वीकारेसँगै बस्नेतले लेखेका छन्, इन्डियामा लामो समयदेखि पपुलिस्ट नारा दिएर दिल्लीको शासन सम्हालेको केजरीवाल र आम आदमी पार्टी पराजित हुन पुगेको छ ।
नेपालमा पनि पपुलिस्ट नारा दिएर उदाउदै गरेका ब्यक्ती र पार्टी हराउने कुरा निश्चितै छ। भारतमा केजरीवालको उदय, भ्रष्टाचारको मुद्दा र विलय ! नेपालमा रवि लामिछानेको उदय, सहकारी ठगीको मुद्दा र विलय उस्तै उस्तै हुनेछ ।
उनले काठमाडौं महानगरका मेयर बालेन्द्र शाह बालेन र धरानका मेयर हर्क साम्पाङप्रतिपनि कटाक्ष गर्दै लेखेका छन्, बालेन्द्र र हर्केको कुरै नगरौँ। उता पूर्वमुख्यमन्त्री केजरीवाललाई पराजित गर्ने भारतीय जनता पार्टी (भाजपा) प्रवेश वर्मा यतिबेला चर्चाको शिखरमा छन् ।
केजरीवाललाई पराजित गरेपछि प्रवेशलाई दिल्लीको मुख्यमन्त्री पदको बलियो दाबेदार मानिएको छ । नयाँ दिल्ली सिटबाट उनले केजरीवाललाई ४ हजार ८९ मतले पराजित गरे । प्रवेश भाजपाका पञ्जाबी र जाट अनुहार हुन् ।
उनले ’राष्ट्रिय स्वयंम्’ नामक सामाजिक सेवा संस्था पनि चलाउँछन् । उनी दिल्लीका पूर्वमुख्यमन्त्री तथा भाजपा नेता स्वर्गीय साहिबसिंह वर्माका छोरा हुन् । यो परिवार दिल्लीको प्रभावशाली राजनीतिक परिवारहरूमध्ये एक हो ।
प्रवेश वर्माका काका पनि राजनीतिमा छन् । उनी उत्तर दिल्ली नगर निगमका मेयर रहेका छन् र २०१३ मा मुन्डकाबाट विधानसभा चुनाव पनि लडेका थिए । प्रवेशकी श्रीमती स्वाती सिंह मध्य प्रदेश भाजपा नेता विक्रम वर्माकी छोरी हुन् ।
उनका दुई छोरी र एक छोरा छन् । उनका दुवै छोरीले पनि चुनावी अभियानमा उत्साहजनक रूपमा भाग लिए । प्रवेशका बुवा पूर्वमुख्यमन्त्री साहिबसिंह भाजपाका दिग्गज नेताहरूमा गनिन्थे। उनी भाजपाका अनुभवी जाट नेताहरूमध्ये एक थिए ।
आफ्ना बुवाको पाइला पछ्याउँदै प्रवेश पनि राजनीतिमा प्रवेश गरेका हुन् । उनी सन् २०१३ मा पहिलो पटक चुनाव लडे र मेहरौलीबाट विधायक बने । २०१९ को लोकसभा चुनावमा भाजपाले उनलाई पश्चिम दिल्लीबाट टिकट दियो ।
यस चुनावमा प्रवेशले पाँच लाखभन्दा बढी मतले जित हासिल गरेका थिए । यसपछि, उनी संसद् सदस्यहरूको तलब तथा भत्तासम्बन्धी संयुक्त संसदीय समिति र सहरी विकाससम्बन्धी स्थायी समितिको सदस्य पनि भए ।
२०२४ मा भने भाजपाले उनलाई टिकट दिएन । तर पार्टीले उनलाई विधानसभा चुनावमा उठायो र उनले अरविन्द केजरीवाललाई पराजित गरे । चुनावको समयमा उनले केजरीवाल र आम आदमी पार्टी सरकारको नीतिहरूको आक्रामक आलोचना गरे ।
उनले प्रदूषण व्यवस्थापन र पूर्वाधारलगायत धेरै मुद्दाहरूमा तीव्र प्रतिक्रिया जनाए । चुनावमा स्रोतसाधनको दुरुपयोग, यमुना प्रदूषण र मुख्यमन्त्रीको सरकारी निवासमा भाजपाको ’शीशमहल’को आरोपमा उनको केजरीवालसँग चर्को बहस पनि भयो ।
प्रवेशले किरोरी मल कलेजबाट बीए र फोर स्कूल अफ म्यानेजमेन्टबाट एमबीए गरेका छन् । प्रवेश भाजपाका अर्बपति विधायकहरूमध्ये एक हुन् । निर्वाचन आयोगलाई दिइएको शपथपत्र अनुसार उनको कुल सम्पत्ति ११५ करोड रुपैयाँभन्दा बढी छ ।
आक्रामक अभिव्यक्तिका कारण उनी धेरै पटक विवादमा परेका छन् । २०२० को दिल्ली विधानसभा चुनावको समयमा प्रवेशले अरविन्द केजरीवालका बारेमा आपत्तिजनक टिप्पणी गरेका थिए ।
यसपछि निर्वाचन आयोगले उनलाई २४ घण्टाका लागि प्रचारप्रसारमा प्रतिबन्ध लगाएको थियो । २०२५ को चुनावको समयमा पनि प्रवेश वर्मामाथि महिला मतदाताहरूलाई जुत्ता बाँडेको आरोप लागेको थियो, त्यसपछि उनीविरुद्ध निर्वाचन आयोगमा आदर्श आचारसंहिताअन्तर्गत मुद्दा दर्ता गरिएको थियो ।
नयाँ मात्र भनेर चर्का नारा दिएर पुग्दैन, गरेर देखाउनु पर्छ भन्ने स्पष्ट संदेश दिल्लीको विद्यानसभा निर्वाचनले दिएको छ। पुरानाले पनि बदलिएर आउने हो भने जनताले पत्याउने रहेछन् र अवसर दिने रहेछन् भन्ने उदाहरण पनि दिल्ली चुनावको सन्देश हो ।
यसलै भनिन्छ राजनीतिमा नत हार सधैको लागि हुन्छ, नत जित। यसैले त जनता जनार्दन हुन् । यिनलाई कमजोर र रैती ठान्ने प्रयास नेताले कहिल्यै नगरुन ।
