२८ माघ, एजेन्सी ।
लिभरपुल एफए कप फुटबलको चौथो चरणबाटै बाहिरिएको छ । त्यो पनि दोस्रो डिभिजनको क्लब प्लाइमाउथसँग आइतवार १–० पराजित हुँदै । अर्काेतर्फ स्पेनिस लिगमा बार्सिलोनाले सेभियालाई ४–१ले पराजित गरेको छ।
प्लाइमाउथका रायन हार्डीले ५३ औं पेनाल्टीमा गरेको गोल नै लिभरपुलका लागि निर्णायक बन्यो । इंग्लिस प्रिमियर लिगमा शीर्ष स्थानमा रहेको लिभरपुलले खेलमा पकड बनाएरपनि गोल गर्न सकेन ।
टोलीले आफ्नो पहिलो रोजाइका केहि खेलाडी मोहमद सालाह, एलिसन, ट्रेन्ट एलेक्जेन्डर आर्नोल्ड, भर्जिल भान डाइकलाई आराम दिएको थियो । लिभरपुलले पछिल्लोपटक सन् २०२२ मा एफए कप जितेको थियो ।
यस्तै अन्य खेलमा एस्टन भिल्लाले टोटनहमलाई २–१ ले, वुल्भ्सले ब्ल्याकबर्नलाई २–१ ले हराएको छ । यसका साथै एस्टन भिल्ला पछिल्लो दशकमा पहिलोपटक एफए कपको पाँचौँ चरणमा प्रवेश गरेको छ ।
यता क्याटलान क्लब बार्सिलोनाले स्पेनिस लिगको उपाधिमा तीन तर्फीय प्रतिस्पर्धा हुने सुनिश्चित गर्दैछ । बार्सिलोनाले आइतबार सेभियालाई ४–१ को सहज जितसँगै रियल मड्रिड र एट्लेटिको मड्रिडसँग अंक तालिकाको शीर्ष स्थानको प्रतिस्पर्धामा आफूलाई अझ नजिक पु¥याएको हो ।
रोबर्ट लेवान्डोव्स्की, फर्मिन लोपेज, राफिन्हा र एरिक गार्सियाले बार्सिलोनाका लागि गोल गरे । त्यसअघि शनिबार भएको मड्रिड डर्बीमा रियल र एट्लेटिकोले १–१ को बराबरी खेलेका थिए । तेस्रो स्थानको बार्सिलोना अब शीर्ष स्थानको रियलभन्दा दुई अंक र एट्लेटिकोभन्दा एक अंकले मात्र पछि छ ।
अर्थात् २३ खेलको समाप्तिमा रियलको ५०, एट्लेटिकोको ४९ र बार्सिलोनाको ४८ अंक छ । ६२औं मिनेटमा फर्मिन लोपेजलाई फउलका कारण रातो कार्ड देखाइएपछि बार्सिलोना १० खेलाडीमा सीमित भएको थियो ।
यद्यपि, घरेलु टोलीविरुद्ध बार्सिलोना सहज जित दर्ता गर्न सफल भयो । बार्सिलोनाको यो लगातार तेस्रो लिग जित हो र सबै प्रतियोगितामा पछिल्ला ११ मध्ये नौ खेलमा जित दर्ता गरेको छ । १३औं स्थानको सेभियाले पछिल्ला पाँच लिग खेलमध्ये केवल एकमा जित निकाल्न सफल भएको छ ।
बार्सिलोना डिफेन्डर इनिगो मार्टिनेजले भने, ‘हामीले प्रतिस्पर्धामा रहन र हाम्रो प्रतिस्पर्धीहरूमाथि दबाब कायम राख्न जित आवश्यक थियो । टोली अहिले उच्च आत्मविश्वासका साथ खेलिरहेको छ र हामी अझै सुधार गर्न सक्छौं। यो गति कायम राख्न आवश्यक छ।’
डिफेन्डर जुल्स कुन्डेले बार्सिलोनाका लागि आफ्नो १२४औं खेल खेले । उनले फ्रेन्च खेलाडीहरूको सूचीमा लुडोभिक जिउलीसँगको कीर्तिमानी बराबरी गरे । उक्त सूचीको शीर्षमा एरिक अबिडाल छन्, जसले बार्सिलोनाका लागि १९३ खेल खेलेका छन् ।
बार्सिलोनाका डिफेन्डर रोनाल्ड अराउजो २०औं मिनेटमा चोटका कारण मैदानबाट बाहिरिनुपरेको थियो । रोबर्ट लेवान्डोव्स्कीले सातौं मिनेटमा बार्सिलोनाका लागि गोल गर्दै टोलीलाई अग्रता दिलाए ।
त्यसको एक मिनेटमै रुबेन भार्गासले गोल गर्दै सेभियालाई बराबरीमा फर्काए । तर, फर्मिन लोपेजले दोस्रो हाफको सुरुआतमै बार्सिलोनालाई पुनः अग्रता दिलाए । राफिन्हाले ५५औं मिनेटमा अग्रता बढाए भने एरिक गार्सियाले ८९औं मिनेटमा खेलको गोल गर्दै जित सुनिश्चित गरेका थिए ।
