७ फागुन , एजेन्सी ।
आजदेखि पाकिस्तानमा च्याम्पियन्स ट्रफी शुरू हुँदैछ । उद्घाटन खेलमा पाकिस्तान र न्युजिल्यान्ड खेल्नेछन् । यो खेल नेपाली समयअनुसार दिउँसो पौने ३ बजे शुरू हुनेछ । १९ दिनसम्म चल्ने यस प्रतियोगितामा विश्वका उत्कृष्ट आठ वटा टोलीको सहभागिता रहेको छ ।
प्रतियोगितामा १५ वटा खेल हुनेछन् । भारतका खेल भने दुबईमा हुनेछ । च्याम्पियन्स ट्रफीको फाइनल खेल मार्च ९ मा हुनेछ । च्याम्पियन्स ट्रफी खेल्न भारत पाकिस्तान नजाने भए पछि प्रतियोगितामा उसले खेल्ने सबै खेल युएईमा हुनेछ ।
भारतमा आयोजना भएको सन् २०२३ को ओडिआई विश्व कपको शीर्ष ८ राष्ट्र च्याम्पियन्स ट्रफीमा खेल्दैछन् । सहभागी टोली दुई समूहमा विभाजन गरिएको छ । पाकिस्तान, भारत, बंगलादेश तथा न्युजिल्याण्ड समूह ए मा रहेका छन् ।
अस्ट्रेलिया, अफगानिस्तान, इङ्ग्ल्याण्ड र दक्षिण अफ्रिका समूह बी मा रहेका छन् । हरेक समूहका शीर्ष २ टोली सेमिफाइनलमा प्रवेश गर्नेछन् । च्याम्पियन्स ट्रफीको फाइनल खेल ९ मार्चमा हुनेछ। भारतले फाइनल खेल्ने भएमा फाइनल युएईमा हुनेछ ।
त्यसबाहेकको अवस्थामा फाइनल पाकिस्तानमा हुनेछ । यो प्रतियोगिताका सबै खेलको नेपालमा प्रत्यक्ष प्रसारण हुने भएको छ । नेपाल क्रिकेट संघ(क्यान) ले प्रतियोगिताका सबै खेल आइसिसी डट टिभिमा प्रत्यक्ष प्रशारण हुने जनाएको हो ।
प्रत्यक्ष प्रसारण हेर्न एप स्टोर तथा प्ले स्टोरबाट आइसिसी टिभी डाउनलोड गर्नु पर्नेछ । पाकिस्तान र न्युजिल्याण्डबीचको खेल कराँचीमा रहेको नेशनल स्टेडियममा हुदैछ । प्रतियोगिताको डिफेन्डिङ च्याम्पियन समेत रहेको पाकिस्तान मोहम्मद रिजवानको कप्तानीमा पहिलो पटक आइसिसीको प्रतियोगिता खेल्दैछ ।
सन् २०१७ मा भएको प्रतियोगिताको पछिल्लो संस्करणमा भारतलाई हराउँदै पाकिस्तानले उपाधी जितेको थियो । इङ्ग्ल्याण्डमा भएको प्रतियोगितामा भारतलाई १ सय ८० रनले पराजित गर्दै पाकिस्तानले उपाधी जितेको थियो ।
दोस्रो संस्करणको च्याम्पियन्स ट्रफी २००० को विजेता रहेको न्युजिल्याण्ड मिचेल सान्टनरको कप्तानीमा मैदान उत्रदै छ । न्युजिल्याण्ड पनि सान्टनरको कप्तानीमा पहिलो पटक आइसिसीको प्रतियोगिता खेल्दैछ ।
सान्टनरको काधमा टोलीलाई २५ वर्ष पछि उपाधी जिताउँने जिम्मेवारी रहेको छ । सन् २००० मा केन्यामा भएको प्रतियोगितामा न्युजिल्याण्ड च्याम्पियन भएको थियो । फाइनलमा न्युजिल्याण्डले भारतलाई पराजित गरेको थियो । चोटले दुवै टोलीलाई सताएको छ ।
पाकिस्तानका युवा ओपनर सैयम अयुब टोली घोषणा अघि नै चोटका कारण बाहिर भएका थिए । अर्कोतर्फ, न्युजिल्याण्ड पनि चोटको समस्याले ग्रस्त छ । लोकी फर्गुसन तथा बेन सियर्स प्रतियोगिताबाट बाहिरिएका छन् ।
उनीहरुको स्थानमा काइल जेमिसन र ज्याकोब डफीलाई टिममा समावेश गरिएको छ । च्याम्पियन्स ट्रफीको पूर्वसन्ध्यामा हालै पाकिस्तानमा भएको त्रिकोणात्मक सिरिजमा यी दुई टोली आमनेसामने भएका थिए ।
मिचेल सान्टनरको कप्तानीमा रहेको न्युजिल्यान्डले उत्कृष्ट प्रदर्शन गर्दै फाइनलसहित सबै खेल जितेर ट्रफी हात पारेको थियो । पाकिस्तान न्युजिल्याण्डविरुद्ध समूह चरणमा पाँच विकेट र फाइनलमा ७८ रनले पराजित भएको थियो ।
यी दुई टोली सन् २०००, २००६ र २००९ को च्याम्पियन्स ट्रफीमा तीन पटक आमनेसामने भएका थिए । तीनै पटकको भेटमा पाकिस्तान पराजित भएको थियो । ओडिआई क्रिकेटमा न्युजिल्यान्डले सन् २०२३ को सुरुवातदेखि अहिलेसम्म ११ पटक पाकिस्तानको सामना गरेको छ ।
जसमा न्युजिल्यान्डले ५ खेलमा जित र ६ मा हार बेहोरेको छ । पछिल्ला चार खेलमध्ये तीनमा जित निकालेको छ । पाकिस्तानले झन्डै तीन दशक पछि अन्तर्राष्ट्रिय क्रिकेट परिषद(आइसिसी) को प्रतियोगिता आयोजना गर्न लागेको हो ।
