७ फागुन , एजेन्सी ।
भारतको ओडिसास्थित किट कलेजबाट निकालिएका डेढसय भन्दा बढी नेपाल विद्यार्थीहरु घर फर्किएका छन् भने ठूलो संख्यामा थप नेपाली विद्यार्थीहरु घर फर्किने क्रममा रहेको नेपाल आइपुगेका विद्यार्थीहरुले बताएका छन् ।
किट कलेजबाट निकालिएका विद्यार्थीहरू विराटनगर, काकडभिट्टा, वीरगञ्ज नाका हुँदै घर फर्किएका हुन् । पर्साका निमित्त प्रमुख जिल्ला अधिकारी निशान राज गौतमका अनुशार अहिलेसम्म ७६ छात्र र १९ छात्रा वीरगन्ज नाका हुँदै घर फर्किएका छन् ।
उनले फर्किएका मध्ये करिब ८० प्रतिशत विद्यार्थी पर्साकै रहेको बताए । केहि विद्यार्थी मात्र बाहिर जिल्लाको रहेको र उनीहरू आफ्नै हिसाबले घरतर्फ लागेको उनको भनाई छ । यता कोशी प्रदेशका जोगवनी र काकडभिट्टा नाकाबाट गरी हिजो बेलुकादेखि आज विहानसम्म ३१ जना विद्यार्थी फर्किएको सुरक्षा अधिकारीहरुले बताएका छन् ।
फर्किएका विद्यार्थीहरूको विवरण सीमामा खटेका सुरक्षाकर्मीले राखेका छन् । उनीहरू आफ्नो सरसामान र किताब कापी लिएर पनि फर्किन नपाएको गुनासो गरेका छन् । कलेजबाट लखेटिएका नेपाली विद्यार्थीहरुलाई पुन कलेज फर्काउनका लागि लगातार फोन आइरहेको नेपाल फर्किएका विद्यार्थीहरुले बताएका छन् ।
कलेजमा १४ सय हाराहारीमा नेपाली विद्यार्थी अध्ययनरत रहेकोमा अहिले चौथो सेमेस्टरका केही विद्यार्थीहरु मात्रै ओडिसामा रहेको फर्किएका विद्यार्थीहरुले बताएका छन् । भारतले दबाउन खोजेको नेपाली विद्यार्थी प्रकृति लम्सालको शंकास्पद मृत्यु घटना विद्यार्थीको आन्दोलन र त्यसपछिको ब्यापक दबाबपछि यसको निष्पक्ष अनुशन्धानको अवस्थामा पुगेको छ ।
सुरुमा ओडिसा स्थित किट कलेजले घटनाको सत्यता लुकाउन भरपुर प्रयास गरेको विद्यार्थीहरुले बताएका छन् । सो घटनाको छानविनका लागि आवाज उठाउदा नै नेपाली विद्यार्थी कुटिएका थिए भने पछि लखेटिएका थिए । तर, न्यायिक दबाब बढेपछि कलेज प्रशासन झुकेको छ ।
कर्मचारीहरुले माफी मागेका छन् भने प्रकृतिको न्यायका लागि नेपाल र भारतमा समेत विद्यार्थीले दबाब बढाएका छन् । बुटवलकी २० वर्षीया प्रकृत्ति लम्साल बी–टेक तेस्रो वर्षमा अध्ययनरत थिइन्। तर, शनिबार साँझ कलेजकै होस्टेलभित्र झुण्डिएको अवस्थामा फेला परिन् ।
यसलाई कलेज प्रशासन र भारतीय मिडियाले आत्महत्या भने पनि विद्यार्थीहरुका अनुुसार घटना शंकास्पद थियो । प्रकृतिले एकजना विद्यार्थीले आफूलाई पटक–पटक मानसिक यातना दिएको भन्दै कलेज प्रशासनमा दुईपटक लिखित उजुरी दिएकी थिइन् ।
प्रहरीको प्रारम्भिक अनुसन्धान अनुसार अद्धिवक श्रीवास्तव नाम गरेका युवकले यातना दिने गरेको भन्दै उजुुरी गरे पनि कलेजले सुनुवाइ गरेन । त्यसपछि श्रीवास्तवले प्रकृतिलाई धम्कीपूर्ण र आपत्तिजनक शैलीमा म्यासेज र कल गरेका थिए ।
श्रीवास्तवले पटकपटक यातना दिँदासमेत कलेज प्रशासनले गम्भीरता नदेखाएको भन्दै नेपाली विद्यार्थीहरुले न्यायको अपिल गरेका थिए । घटना बाहिरिए लगत्तै प्रधानमन्त्री केपी शर्मा ओलीले समेत चासो राख्दै भारतीय पक्षसँग दबाब बढाएका थिए लगत्तै परराष्ट्र मन्त्रालय हुँदै भारतस्थित नेपाली दूतावासले भारतीय पक्षसँग संवाद गरेको थियो भने नेपाली दूतावासबाट दुई जना सुरक्षा अधिकारीलाई ओडिसा पठाइएको थियो ।
नेपाली पक्षको दबाबपछि लगातार कलेजका तर्फबाट विज्ञप्ति जारी भएका थिए भने नेपाली विद्यार्थीहरुलाई गालीगलौज गर्ने कर्मचारीहरुले माफी मागेका थिए । ओडिसाको विधानसभामा समेत यो विषय उठेपछि प्रदेश सरकारले यसको छानविनका लागि समिति गठन गरेको छ भने कलेज प्रशासनका कर्मचारी र प्रकृतिलाई प्रताडित गर्ने भनिएका युवकलाई प्रहरीले नियन्त्रणमा लिएर कानूनी कारबाही सुरु गरेको छ ।
