१४ फागुन, एजेन्सी ।
इटालीका विश्व चर्चित विश्वविजेता गोलकिपर जियोनलियोजी बुफोनले आफू नेपाल आउन लागेको जानकारी दिएका छन् । उनले आफू केपी ओली कप फुटबल प्रतियोगिताको फाइनल हेर्न नेपाल आउन लागेको भिडिओ सन्देशमार्फत जानकारी दिएका हुन् ।
आइतबार काठमाडौंको दशरथ रङ्शालामा हुने उक्त फाइनल खेलमा बुफोन प्रमुख अतिथिको रुपमा रहने यसअघि नै आयोजक नेकपा एमालेको भ्रातृ सङ्गठन नेपाल युवा सङ्घले जानकारी दिएको थियो । बुफोनले आफैँले शुक्रबार यसको पुष्टि गरेका छन् ।
भिडिओमा उनले नेपाली भाषामा ‘नमस्ते सबैजनालाई’ भनेका छन् । त्यसपछि अङ्ग्रेजीमा उनले थपेका छन् । ‘जिजी बुफोन हेयर । म मार्च पहिलो साता नेपाल आउँदै छु । केपी ओली कपको फाइनलको प्रमुख अतिथिको रुपमा आउँदैछु । सबैसँग त्यहीँ भेटौँला !’
सन् २००६ को फिफा विश्वकप विजेता बुफोन इटालीका लागि सबैभन्दा बढी अन्तर्राष्ट्रिय खेल खेल्ने गोलकिपर हुन् । उनले इटालीका लागि कीर्तिमानी १७६ खेल खेलेका छन् । इटालीबाट ८० खेलमा कप्तानीसमेत गरेका उनले ५ वटा विश्वकप खेलेका थिए ।
हाल ४७ वर्ष पुगेका बुफोनले १० पटकका इटालियन सिरी ‘ए’को उपाधि जितेका छन् । सन् २०१८ मा उनले अन्तर्राष्ट्रिय फुटबलबाट सन्यास लिएका थिए । व्यावसायिक खेल जीवन भने उनले सन् २०२३ मा सकेका थिए ।
बुफोन विश्वकै उत्कृष्ट गोलकिपरमध्ये एक हुन् । बुफोन इटालीको टस्क्यानीमा सन् १९७८ को जनवरी २८ मा जन्मिएका थिए । उनको परिवार नै इटालीका खेल क्षेत्रमा थियो । बुबा एड्रआनो भारत्तोलनमा थिए ।
आमा मारिया स्टेला डिस्क थ्रोअर र उनका दुई दिदी भेरोनिका र ग्युअनडालिना इटालियन भलिबल टोलीमा थिए । १३ वर्षको उमेरमा उनले मिडफल्डरका रूपमा पार्माबाट खेलेका थिए । सन् १९९५ सम्म उनी मिडफिल्डरकै रूपमा रहे ।
त्यसपछि उनले आफ्नो भूमिका परिवर्तन गर्दै गोलकिपर बने । पार्माबाट गोलकिपरका रूपमा उनले दुई सयभन्दा बढी खेल खेलेका थिए । पार्माबाट उनले ‘सिरी ए गोलकिपर अफ द इयर’को उपाधि दुईपटक पाए ।
यस्तै, २३ वर्षमुनिका खेलाडीहरूलाई युरोपमा दिइने ‘ब्राभो अवार्ड’ पनि उनले पाएका थिए ।युवा संघ नेपालका अनुसार १ लाख डलर अर्थात नेपाली १ करोड ३८ लाखसम्ममा नेपाल आउन उनी राजी भएका हुन् । बुफोनलाई नेपाल ल्याउन हवाइ टिकट तथा बस्ने खर्चसहित करिब डेढ
करोड रूपैयाँ खर्च हुनेछ । युवा संघ नेपालका सचिव निरोज पौडेलले बुफोन १७ फागुनमा काठमाडौं आइपुग्नेछन् । सचिव पौडेलका अनुसार सुरुमा ब्राजिलियन स्टार रोनाल्डिन्हो र रोबेर्टो कार्लोसलाई नेपाल ल्याउन प्रस्ताव गरिएको थियो ।
कार्लोसले नेपाल आउने इच्छा पनि देखाएका थिए । तर, कार्यक्रम जुधेको भन्दै अन्तिममा कार्लोसले नेपाल आउने कार्यक्रमलाई स्थगित गरेको सचिव पौडेलले बताए । त्यसपछि विश्वविजेता गोलकिपर बुफोनलाई प्रस्ताव गरिएको पौडेलले बताए । बुफोन करिब एक साता काठमाडौंमा रहने छन् ।
उनलाई माउन्टेन फ्लाइटमार्फत सगरमाथाको अवलोकन गराउने र समय मिलेसम्म लुम्बिनी र पोखराको भ्रमण पनि गराउने तयारी छ । सचिव पौडेलका अनुसार, बुफोनले नेपाल भ्रमणका क्रममा प्रधानमन्त्री केपी शर्मा ओलीसहितका राजनीतिक दलका नेताहरूलाई पनि भेट्ने छन् ।
