२० फागुन , काठमाण्डौ ।
विश्व फुटबल जगतका लिजेण्ड इटालियन फुटबल स्टार जियानलुइगी बुफोनलाई सन् २०२५ को लागि नेपाल सरकारले पर्यटन दूत नियुक्त गरेको छ । केपी ओली कपको फाइनलमा प्रमुख अतिथिको रूपमा नेपाल आएका बुफोनलाई सरकारले सन् २०२५ को पर्यटन प्रवद्र्धनको लागि पर्यटन राजदूत नियुक्त गरेको हो ।
केपी ओली कपको फाइनल पछि भएको पुरस्कार वितरण समारोहमा बुफोनलाई पर्यटन राजदूत नियुक्त गरिएको घोषणा गरिएको थियो । सन् २००६ मा इटालीलाई विश्वकप जिताउँदाका गोलरक्षक बुफेनलाई पर्यटन राजदूत घोषणा गर्नुले नेपालको पर्यटन प्रवद्र्धनमा सहयोग पुग्ने अपेक्षा आयोजक राष्ट्रिय युवा संघ नेपालले गरेको छ ।
तेस्रो संस्करणको प्रतियोगिताको फाइनलमा आइपुगेका बुफोनलाई हेर्न काठमाडौँको दशरथ रंगशाला भरिभराउ भएको थियो । पत्नीसहित नेपाल आएका बुफोनले नेपाल आएलगत्तै बालुवाटारमा पुगेर प्रधानमन्त्री केपी शर्मा ओलीसँग भेटवार्ता गरेका थिए ।
नेपाल सरकारले बुफोनलाई सन् २०२५ का लागि पर्यटन दूत नियुक्त गरेपछि अब उनले नेपाल पर्यटन प्रवद्र्धनका लागि विभिन्न गतिविधि गर्नेछन्। बुफोनले आफ्नो लोकप्रियता र प्रभावशाली छवि प्रयोग गर्दै नेपाललाई एक उत्कृष्ट पर्यटन गन्तव्य का रूपमा प्रचार गर्नेछन्।
विशेषगरी, उनले युरोप, इटाली र फुटबलप्रेमी मुलुकहरूमा नेपाल भ्रमणको सन्देश फैलाउने काम गर्नेछन्। नेपाल पर्यटन बोर्ड तथा अन्य सरकारी संस्थाहरूले तयार पार्ने प्रचार सामग्री, भिडियो, विज्ञापन र क्याम्पेनहरूमा बुफोनको सहभागिता रहन सक्नेछ ।
सामाजिक सञ्जाल र अन्तर्राष्ट्रिय मिडियाहरूमा नेपाल भ्रमणलाई उनले बढावा दिनेछन् । उनले उनले नेपालका हिमाल, प्राकृतिक सौन्दर्य, संस्कृति र साहसिक पर्यटनका विशेषताहरूलाई अन्तर्राष्ट्रिय मञ्चमा उठान गर्ने छन्।
बुफोनजस्तो विश्व प्रसिद्ध खेलाडीलाई पर्यटन दूत नियुक्त गर्नु नेपालका लागि ठूलो अवसर हो। यो निर्णयले युरोपेली पर्यटक भित्र्याउने, खेल पर्यटनलाई प्रवद्र्धन गर्ने र नेपाललाई अन्तर्राष्ट्रिय मञ्चमा अझ परिचित गराउने विश्वास गरिएको छ।
सन् २००६ को फिफा विश्वकप विजेता बुफोन इटालीका लागि सबैभन्दा बढी अन्तर्राष्ट्रिय खेल खेल्ने गोलकिपर हुन् । उनले इटालीका लागि कीर्तिमानी १७६ खेल खेलेका छन् । इटालीबाट ८० खेलमा कप्तानीसमेत गरेका उनले ५ वटा विश्वकप खेलेका थिए ।
हाल ४७ वर्ष पुगेका बुफोनले १० पटकका इटालियन सिरी ‘ए’को उपाधि जितेका छन् । सन् २०१८ मा उनले अन्तर्राष्ट्रिय फुटबलबाट सन्यास लिएका थिए । व्यावसायिक खेल जीवन भने उनले सन् २०२३ मा सकेका थिए ।
बुफोन विश्वकै उत्कृष्ट गोलकिपरमध्ये एक हुन् । बुफोन इटालीको टस्क्यानीमा सन् १९७८ को जनवरी २८ मा जन्मिएका थिए । उनको परिवार नै इटालीका खेल क्षेत्रमा थियो । बुबा एड्रआनो भारत्तोलनमा थिए ।
आमा मारिया स्टेला डिस्क थ्रोअर र उनका दुई दिदी भेरोनिका र ग्युअनडालिना इटालियन भलिबल टोलीमा थिए । १३ वर्षको उमेरमा उनले मिडफल्डरका रूपमा पार्माबाट खेलेका थिए । सन् १९९५ सम्म उनी मिडफिल्डरकै रूपमा रहे ।
त्यसपछि उनले आफ्नो भूमिका परिवर्तन गर्दै गोलकिपर बने । पार्माबाट गोलकिपरका रूपमा उनले दुई सयभन्दा बढी खेल खेलेका थिए । पार्माबाट उनले ‘सिरी ए गोलकिपर अफ द इयर’को उपाधि दुईपटक पाए ।
यस्तै, २३ वर्षमुनिका खेलाडीहरूलाई युरोपमा दिइने ‘ब्राभो अवार्ड’ पनि उनले पाएका थिए । युवा संघ नेपालका अनुसार १ लाख डलर अर्थात नेपाली १ करोड ३८ लाखसम्ममा नेपाल आउन उनी राजी भएका हुन् ।
बुफोनलाई नेपाल ल्याउन हवाइ टिकट तथा बस्ने खर्चसहित करिब डेढ करोड रूपैयाँ खर्च हुनेछ । युवा संघ नेपालका सचिव निरोज पौडेलका अनुशार बुफोनले माउन्टेन फ्लाइटमार्फत सगरमाथाको अवलोकन गर्नेछन् भने समय मिलेसम्म लुम्बिनी र पोखराको भ्रमण पनि गराउने तयारी छ ।
