एजेन्सी,असोज १५
इन्डोनेसियामा गएको शक्तिशाली भूकम्प र सुनामीमा परेर मृत्यु हुनेको संख्या ८ सय ३२ पुगेको छ । भूकम्प र सुनामीमा परेर १६ लाख मानिस प्रभावित भएको रेडक्रसले जनाएको छ ।
अझै केही व्यक्ति बेपत्ता भएका छन् । उनीहरुको खोजी र उद्धारको प्रयास जारी रहेको अधिकारीहरुले जनाएका छन् । तटीय शहर पालुस्थित एउटा होटल र किनमेल केन्द्रको भग्नावशेषभित्र फसेकाहरुको उद्धार गर्न विभिन्न टोली सक्रिय रहेका छन् ।
८० तले होटलको भग्नावशेषमा फसेकाहरुलाई अहिले उद्धार गर्ने काम भईरहेको छ । त्यहाँ फसेका मानिसहरुले गुहार मागिरहेको सुनिएको बताइएको छ ।
भग्नावशेष पन्छाउने ठूला उपकरण नभएका कारण उनीहरुलाई उद्दार गर्न कठिन भएको छ । भग्नावशेषहरु हातले नै पन्छाउँदै उद्धार थालिएको छ । अझै कतिपय ठाउँमा भत्किएका संरचनाभित्र कति मानिसको मृत्यु भएको छ भन्ने एकीन हुन सकेको छैन ।
ती ठाउँमा हजारौं मानिसको मृत्यु भएको हुनसक्ने आशंका गरिएको छ । इन्डोनेसियामा शक्तिशाली पराकम्पहरु अझै गइरहेका छन् । धेरै अस्पतालमा समेत क्षति पुगेका कारण अस्थायी टहरा बनाएर घाइतेहरुको उपचार भइरहेको छ भने फेला परेका शवलाई सडकको छेउमा थुपारिएको छ ।
