६ वैशाख ,काठमाण्डौ।
चैत मसान्तसम्म बैंकहरुको वित्तिय विवरण सार्वजनिक भएको छ । जसमा बैंकहरुको नाफा १.४० प्रतिशतले बढेर ४१ अर्ब २५ करोड ११ लाख ३८ हजार रुपैयाँ पुुगेको छ । गत आर्थिक वर्षको सोही अवधिमा बैंकको नाफा ४० अर्ब ६८ करोड ३० लाख ८१ हजार रुपैयाँ रहेको थियो ।
२० वटा वाणिज्य बैंकमा ९ वटाको नाफा घटेको छ भने ११ वटाको बढेको बैंकहरुले प्रकाशित गरेको चैत मसान्तसम्मको वित्तीय विवरणमा उल्लेख छ । यो अवधिमा सबैभन्दा धेरै नाफा कमाउनेमा नबिल बैंक अग्रस्थानमा छ ।
बैंकले चैत मसान्तसम्म ५ अर्ब ५ करोड १४ लाख १९ हजार रुपैयाँ रहेको छ । जुन गत आवको सोही अवधिमा ४ अर्ब ६६ करोड ८० लाख २९ हजार रुपैयाँ रहेको थियो । यो अवधिमा बैंकको नाफा ८.२१ प्रतिशतले बढेको छ ।
बैंकले प्रकाशित गरेको तेस्रो त्रैमासको वित्तीय विवरण अनुसार बैंक कर्जा बढेपनि खुद ब्याज आम्दानी भने घटेको छ । खुद शुल्क तथा कमिसन आम्दानी र नेट ट्रेडिङ आम्दानीमा वृद्धि भएपनि खुद ब्याज आम्दानी घट्दा बैंकको कुल सञ्चालन आमदानी घटेको छ ।
तर, बैंकको निष्कृय बढेपनि अघिल्लो आर्थिक वर्षको सोही अवधिको भन्दा सम्भावित कर्जा नोक्सानीको लागि छुट्याएको रकम घटेको छ । जसले बैंकको नाफा बढेको छ । नबिललाई पछ्याउँदै नेपाल इन्भेष्टमेन्ट मेगा बैंक दोस्रो स्थानमा रहेको छ ।
बैंकले चैत मसान्तसम्म ४ अर्ब ५४ करोड नाफा आर्जन गरेको छ । गत आवको सोही अवधिमा बैंकको नाफा ३ अर्ब २७ करोड ५२ लाख ७७ हजार रुपैयाँ रहेको थियो । यो अवधिमा ३८.६१ प्रतिशतले बढेको छ ।
नाफा धेरै आर्जन गर्नेमध्ये तेस्रो नम्बरमा ग्लोबल आइएमई बैंक रहेको छ । बैंकको नाफा गत आवको सोही अवधिको तुलनामा ३७.१२ प्रतिशतले बढेर ४ अर्ब ५३ करोड ४० लाख ९९ हजार रुपैयाँ रहेको छ ।
३ अर्ब नाफा कमाउनेमा एभरेष्ट बैंक मात्रै रहेको छ । यो अवधिमा बैंकको नाफा ३२.५५ प्रतिशतले बढेर ३ अर्ब ४५ करोड ७६ लाख ३६ हजार रुपैयाँ रहेको छ । प्रतिशतको आधारमा हेर्दा धेरै नाफा प्रतिशत नाफा बढाउनेमा नेपाल बैंक रहेको छ ।
गत आवको चैत मसान्तको तुलनामा यो अवधिमा बैंकको नाफ २०३२.८० प्रतिशतले नाफा बढेर २ अर्ब ७८ करोड ३४ लाख ९४ हजार रुपैयाँ रहेको छ । गत आवको सोही अवधिमा १३ करोड ५ लाख ९ हजार रुपैयाँ रहेको थियो ।
एनएमबि बैंकले चैत मसान्तसम्म ५.८८ प्रतिशतले नाफा बढाएर २ अर्ब ३७ करोड ३२ लाख ८९ हजार रुपैयाँ पुुगेको छ । प्रभु बैंकको नाफा ३.५१ प्रतिशतले बढेर १ अर्ब ८७ करोड ६० लाख ६० हजार रुपैयाँ रहेको छ ।
सानिमा बैंकको नाफा १४.८० प्रतिशतले बढेर १ अर्ब ६५ करोड २४ लाख ७६ हजार रुपैयाँ पुुगेको छ । यस्तै चैत समान्तको अपरिस्कृत वित्तीय अवस्था अनुसार ९ वटा बैंकको नाफा घटेको छ ।
जसमा प्राइम बैंक, स्टयान्डर्ड चार्टर्ड, कृषि विकास बैंक, सिद्धार्थ बैंक, राष्ट्रिय वाणिज्य बैंक, सिटिजन्स बैंक, हिमालय, कुमारी, र एनआईसी एशिया बैंकको नाफा घटेको छ । एनआईसी एसियाको नाफामा उच्च गिरावट देखिएको छ ।
बैंकले सार्वजनिक गरेको त्रेस्रो त्रैमासिक वित्तीय विवरणमा बैंकको नाफा ९१ प्रतिशतसम्मले घटेको देखिएको हो । चैत मसान्तसम्म बैंकको खुद नाफा १५ करोड रुपैयाँमा मात्रै छ। गत आवको चैत मसान्तसम्म बैंकको खुद नाफा १ अर्ब ९१ करोड थियो ।
चालू आवको तेस्रो त्रैमासिकमा आइपुग्दा नाफा १५ करोडमा सीमित भएको हो । यो भनेको करिब ९१ प्रतिशतले कम हो । बैंकको आम्दानीको स्रोतहरु घट्न थालेसँगै खुद नाफा घटेको हो । चैत मसान्तसम्म बैंकको खुद ब्याज आम्दानी ८१ करोड रुपैयाँले घटेको छ ।
यस्तै चालु आर्थिक वर्षको चैत मसान्तसम्ममा वाणिज्य बैंकहरुले कर्जा तथा नोक्सानी व्यवस्था गर्न ३५ अर्ब ७ करोड ३० लाख रुपैयाँ छुट्याएका छन् । यो रकम गत आर्थिक वर्ष २०८०÷८१ को सोही अवधिको तुलनामा ४ अर्ब ८० करोड रुपैयाँले कम हो ।
वाणिज्य बैंकहरुले गत वर्ष ३९ अर्ब ८७ करोड ६३ लाख रुपैयाँ कर्जा नोक्सानीका लागि व्यवस्था गरेका थिए । चालू आर्थिक वर्षमा सबैभन्दा बढी कर्जा नोक्सानीका लागि रकमको व्यवस्था गर्नेमा कुमारी बैंक रहेको छ ।
यो बैंकले चैतसम्ममा ५ अर्ब १६ करोड रुपैयाँ नोक्सानी व्यवस्थाका लागि छुट्याएको छ । कुमारी बैंकले नोक्सानी व्यवस्थाको रकम गत वर्षको तुलनामा यो वर्ष १ अर्ब ६२ करोड रुपैयाँले बढेको छ ।
यो बैंकको नोक्सानी व्यवस्था गत वर्ष चैतसम्ममा ३ अर्ब ५४ करोड रुपैयाँ थियो । चालू आर्थिक वर्षको चैतसम्ममा दोस्रो धेरै नोक्सानी व्यवस्था गर्नेमा लक्ष्मी सनराइज बैंक रहेको छ । यो बैंकले चैतसम्मममा ३ अर्ब १९ करोड रुपैयाँ नोक्सानी व्यवस्थाका लागि व्यवस्था गरेको छ ।
यस्तो रकम गत वर्षको चैतसम्ममा ४ अर्ब रुपैयाँ थियो । लक्ष्मीसनराइज बैंकको कुल कर्जा प्रवाह चैतसम्ममा २ खर्ब ७६ अर्ब रुपैयाँ रहेको छ । नोक्सानी व्यवस्थाका लागि सबैभन्दा कम रकम छुट्याउनेमा एभरेष्ट बैंक रहेको छ ।
यसले अरु वाणिज्य बैंकको तुलनामा २७ करोड रुपैयाँ मात्रै यस्तो रकमको व्यवस्था गरेको छ । एभरेष्टको यो रकम गत वर्ष ६३ करोड रुपैयाँ थियो ।कर्जा नोक्सानी रिभर्स गर्नेमा स्ट्यान्डर्ड चार्टर्ड बैंक रहेको छ ।
यसको गत वर्ष २५ करोड रुपैयाँ कर्जा नोक्सानीमा भएको रकमलाई घटाएर यो वर्ष ९ करोड ९० लाख राइटब्याक गरेको छ ।
