२३ वैशाख , विराटनगर।
विश्लेषकहरु भन्छन्, नेपालको राजनीति अनप्रिडिक्टेवल अर्थात अनुमान गर्न नसकिने खालको भएको छ । किनभने यहाँ नेताहरुको बोली र व्यवहार छिनछिनमा परिवर्तन हुन थालेका छन् ।
दलहरुबीच कुनै सिद्धान्त वा राष्ट्रिय एजेन्डाका बारेमा भन्दा पनि स्वार्थ र सत्ता हत्याउनका लागि अचेल सहमति र गठबन्धनहरु बन्न थालेका छन् । अनि ति सहमति र गठबन्धनहरुको आयु बनेको भोलिपल्ट देखिनै तोकिन सुरु हुन्छ ।
यहाँ हरेक दिन गठबन्धनमा कुनै समस्या छैन, दरार छैन । यसको आयु लामो छ भन्दै नेताहरुले स्पष्टीकरण दिनुपर्ने अवस्था छ । सर्वसाधारण वा कार्यकर्ताहरुलाई त के स्वयं शीर्ष नेताहरुलाई नै आफ्नो कुर्सी वा सरकार कति दिनसम्म टिक्ने हो अनुमान गर्न गारो हुन थालेको छ ।
उनीहरु सधैं नै एकअर्कासंगको गठबन्धन तोडिने पो हो कि भन्ने त्रासमा रहन्छन् । र यसैको फाइदा विपक्षी र आफ्नै दलभित्रैका पनि अर्को खेमाले उठाउछन् । अहिले सरकारमा रहेको गठबन्धनको पनि हालत यस्तै छ ।
आएदिन प्रधानमन्त्री केपी शर्मा ओलीले आफुले काँग्रेस सभापतिलाई कुर्सी छाड्ने दिन स्मरण गराइरहेका छन् । अर्कातिर माओवादीसंग एमालेको बढ्दै गएको हिमचिमले शेरबहादुर देउवालाई पनि आशंकित बनाइदिएको छ ।
यसबीच काँग्रेसको एक खेमाले लगायतार सरकारको आलोचना गरिरहेको छ । केन्द्रिय सदस्य एवं इतर समूहका नेता शेखर कोइरालादेखि महामन्त्रीहरु हुँदै प्रदेशका नेताहरुले पनि सरकारविरुद्ध आलोचना बर्षाइरहेका छन् ।
कोशी प्रदेशमा एक दिनअघि मुख्यमन्त्री हिक्मत कार्कीले एमाले र नेकपा एस मिल्नु पर्ने धारणा राखेका थिए । आज भने काँग्रेस कोशी प्रदेश संसदीय दलका प्रमुख सचेतक गोपाल तामाङ्गले पनि अहिलेको सत्ता गठबन्धन तोडिनु पर्ने नै धारणा सार्वजनिक गरेका छन् ।
उनले कोशी प्रदेश सरकार एकलौटी ढंगले चलेको भन्दै सत्तामा बस्नु भन्दा प्रतिपक्षमा बस्नु ठीक भएको बताएका छन् । सामाजिक सञ्जालमा लेख्दै प्रमुख सचेतक तामाङ्गले सरकार एकलौटी ढङ्गले चलेको आरोपसमेत लगाएका छन् ।
उनले लेखेका छन्, ‘कोशी प्रदेश सरकारको एकलौटी रबैया प्रति घोर विमत्ती छ । तामाङ्ग नेपाली कांग्रेस कोशी प्रदेश संसदीय दलका नेता उद्धव थापाका विश्वास पात्र मानिन्छन् । उनले सरकारले एकलौटि ढङ्गले काम गरेको भन्दै सरकारमा रहनु भन्दा प्रतिपक्षमा बस्नु राम्रो भएको बताएका छन् ।’
उनले लेखेका छन्, ‘यस्तो सरकारमा रहनु भन्दा प्रतिपक्षी हुनुमा गर्व गर्छु । सांसद् तामाङले लेखेको स्टाटस प्रदेश सभापति उद्धव थापा, झापा सभापति देउमान थेबे, झापा १ का सभापति इन्द्र बुढाथोकी लगायतका नेतालाई ट्याग गरेका छन् ।
सत्तारुढ दलको प्रमुख सचेतकबाट नै प्रतिपक्षमा बस्नु राम्रो भन्ने अभिब्यक्ति आएपछि यसले सरकार र गठबन्धनसम्मका तरंग ल्याएको छ । यद्यपि प्रदेशसभा सदस्य तामाङले आफू प्रमुख सचेतक मात्रै नभए कांग्रेस कार्यकर्ता र आमजनता समेत रहेको भन्दै सरकारका विषयमा आफ्नो ब्यक्तिगत धारणा ब्यक्त गरेको प्रतिक्रिया दिएका छन् ।
कोशी प्रदेशमा नेपाली कांग्रेस र एमालेका बिचमा सत्ता गठबन्धन छ । प्रदेशमा नेपाली कांग्रेसका तर्फबाट तीन जना मन्त्री सरकारमा छन् । कांग्रेसले भौतिक पूर्वाधार, कृषि तथा सहकारी, पर्यटन बन तथा बाताबरण र स्वास्थ्य मन्त्रालय सम्हालेको छ ।
भौतिक पूर्वाधार र स्वास्थ्य मन्त्रालयको जिम्वेवारी भने भुपेन्द्र राईले सम्हालेका छन् । पार्टीका झापा सभापति देउमान थेबेले समेत केही दिन अघि झापामा सहकारी संघको चुनावमा नेकपा एमालेसँगको सहकार्यलाई लिएर असन्तोष प्रकट गरेका थिए ।
उनले विज्ञप्ति नै प्रकाशित गरेका थिए । कोशी यस्तो प्रदेश हो जहाँ काँग्रेसका नेता केदार कार्कीले पार्टीमा बगावत गर्दै मुख्यमन्त्री समेत बनेका थिए । उनले त्यसबेलाको माओवादीसंगको गठबन्धनको विपरित गएर एमालेको समर्थनमा मुख्यमन्त्री बनेका थिए ।
पछि माओवादी र काँग्रेस दुवैले त्यसलाई स्वीकार गर्न बाध्य भएको थियो । यसैपनि केन्द्रमा र दुई दलिय संयन्त्रमै रहेका काँग्रेसीहरुले सरकारको आलोचना गरिहरँदा प्रदेशबाट पनि यस किमिमको कदमले सरकारमाथि र अहिलेको गठबन्धनमाथि नै दबाव पार्नसक्ने ठानिएको छ ।
