२३ असार , काठमाडौं।
अमेरिकामा जारी नयाँ ढाँचाको फिफा क्लब विश्वकप फुटबल अब अन्तिम र रोमाञ्चक मोडमा आइपुगेको छ। ३२ टोलीबाट सुरु भएको यो महाकुम्भ अब सेमिफाइनल चरणमा प्रवेश गरेको छ, जहाँ युरोपका तीन र दक्षिण अमेरिकाका एक गरी चार महारथी उपाधिका लागि भिड्दैछन्।
सेमिफाइनलको समीकरण तय भएसँगै, विश्वभरका फुटबल पण्डित र समर्थकहरूबीच कसले उपाधि जित्ला भन्ने बहस चर्किएको छ। यही बीचमा, तथ्याङ्क विश्लेषण गर्ने चर्चित संस्था ’ओप्टा’ को सुपरकम्प्युटरले गरेको भविष्यवाणीले यस बहसलाई थप रोचक बनाएको छ।
यसपटकको सेमिफाइनल भिडन्त निकै आकर्षक छ। पहिलो सेमिफाइनलमा ब्राजिलियन पावरहाउस फ्लुमिनेन्सले इंग्लिस क्लब चेल्सीको सामना गर्नेछ भने दोस्रो सेमिफाइनलमा दुई युरोपेली स्पेनिस क्लब रियल मड्रिड र फ्रेन्च च्याम्पियन पेरिस सेन्ट–जर्मेन (पीएसजी) बीच महाभिडन्त हुनेछ।
यी खेलहरूले नै जुलाई १३ मा मेटलाइफ स्टेडियममा हुने ऐतिहासिक फाइनलका दुई प्रतिस्पर्धीको टुङ्गो लगाउनेछ। ओप्टाको सुपरकम्प्युटरले गरेको विस्तृत विश्लेषणअनुसार, हालसालै युरोपियन च्याम्पियन्स लिग जितेको र प्रतियोगितामा उत्कृष्ट लयमा रहेको पीएसजीलाई उपाधिको प्रमुख दाबेदार मानिएको छ।
पेरिस सेन्ट–जर्मेन पीएसजीले उपाधि जित्ने सम्भावना ३९.३३ प्रतिशत देखाइएको छ । पीएसजीले प्रतियोगितामा बोटाफोगोसँगको एक मात्र हार बेहोरेको छ भने नकआउट चरणमा इन्टर मियामी र बायर्न म्युनिखजस्ता बलिया टोलीलाई पाखा लगाउँदै सेमिफाइनलमा पुगेको छ।
बुधबार रियल मड्रिडविरुद्धको सेमिफाइनल जित्ने सम्भावना पनि पीएसजीकै पक्षमा ५८.८४ प्रतिशत देखाइएको छ। यस्तै चेल्सीले उपाधि जित्ने दोस्रो धेरै सम्भावना ३३.२७ प्रतिशत रहेको भविष्यवाणी गरिएको छ ।
चेल्सीको अन्तिम चारसम्मको यात्रा तुलनात्मक रूपमा सहज देखिएको छ। उनीहरूले नकआउटमा बेन्फिका र पाल्मेरासलाई हराएका थिए।
सेमिफाइनलमा कमजोर आँकिएको फ्लुमिनेन्सविरुद्ध खेल्ने भएकाले चेल्सीको फाइनल पुग्ने सम्भावना निकै उच्च अर्थात ८०.५१ प्रतिशत रहेको देखाइएको छ ।
यस्तै रियल मड्रिडको उपाधि जित्ने सम्भावना २४.६७ प्रतिशत मात्रै रहेको सुपरकम्युटरले देखाएको छ । जाबी अलोन्सोको नेतृत्वमा रहेको रियल मड्रिडले नकआउट चरणमा युभेन्टस र बोरुसिया डर्टमन्डजस्ता बलिया टोलीलाई हराएर आफ्नो क्षमता प्रमाणित गरेको छ।
तर, सेमिफाइनलमा पीएसजीजस्तो बलियो प्रतिद्वन्द्वी परेकाले उनीहरूको उपाधि यात्रा कठिन देखाइएको छ। अर्का फ्लुमिनेन्सको उपाधि जित्ने सम्भावना १९.४९ प्रतिशत देखाइएको छ ।
ब्राजिलियन टोलीलाई अन्तिम चारको ’अन्डरडग’ मानिएको छ। तर, उनीहरूको बलियो रक्षापंक्तिले नकआउटमा इन्टर र अल हिलालजस्ता टोलीलाई स्तब्ध पारिसकेको छ।
चेल्सी यसअघि नै अर्को ब्राजिलियन क्लब फ्लामेङ्गोसँग पराजित भइसकेकाले फ्लुमिनेन्स अर्को अप्रत्याशित नतिजा निकाल्ने दाउमा हुनेछ।
सबैको नजर पीएसजी र रियल मड्रिडबीचको सेमिफाइनलमा टिकेको छ। एकातिर, पीएसजी आफ्नो पहिलो क्लब विश्वकप उपाधिको खोजीमा छ भने अर्कोतिर, रियल मड्रिड आफ्नो उपाधि जित्ने विरासतलाई निरन्तरता दिन चाहन्छ।
सुपरकम्प्युटरले पीएसजीलाई अगाडि देखाए पनि रियल मड्रिड ठूला खेलहरूमा पासा पल्टाउन माहिर मानिन्छ। चेल्सीको बलियो टोलीविरुद्ध फ्लुमिनेन्सलाई कम आँकिएको छ, तर फुटबल अनिश्चितताको खेल हो।
आफ्ना पूर्व डिफेन्डर थियागो सिल्भाको सामना गर्न लागेको चेल्सीलाई फ्लुमिनेन्सको रक्षात्मक रणनीति तोड्न सहज हुने छैन। अब केवल तीन खेलपछि नयाँ ढाँचाको क्लब विश्वकपले आफ्नो पहिलो च्याम्पियन पाउनेछ।
के सुपरकम्प्युटरको भविष्यवाणी सही साबित होला, वा मैदानमा कुनै अप्रत्याशित नतिजा आउला? यो थाहा पाउन विश्वभरका फुटबल प्रेमीहरू उत्सुकताका साथ यी रोमाञ्चक खेलहरूको प्रतिक्षा गरिरहेका छन्।
