४ भदौ , काठमाण्डौ ।
फिनल्याण्डमा संसद भवन भित्रै एक जना सांसद मृत भेटिएका छन् । फिनल्याण्डको संसद भवनभित्र ३० वर्षीय सांसद ईमेली पेल्टोनन मृत फेला परेका हुन । उनले आत्महत्या गरेको अनुमान गरिएको छ।
सामाजिक लोकतान्त्रिक पार्टी (एसडीपी)का सांसद थिए।आफ्नो अन्तिम इन्स्टाग्राम पोस्टमा पेल्टोननले आफू मिर्गौला रोगबाट पीडित भएको बताएका थिए।
यसपछि, अर्को रोगका कारण उनले संसदीय कामबाट बिदा लिनुपरेको थियो।पेल्टोनेन २०२३ को चुनावमा ५ हजार ७४७ मत प्राप्त गरेर सांसद बनेका थिए।
उनी संसदका केही समितिहरूमा काम गर्थे। उनी जार्वेनपा सिटी काउन्सिलका सदस्य र त्यहाँका सबैभन्दा कान्छा बोर्ड अध्यक्ष पनि थिए।एसडीपी नेता टिटी टुपुराइनेनले भने, ’ईमेलीको मृत्युबाट हामी धेरै दुखी छौं। उहाँ सबैको मायालु हुनुहुन्थ्यो। यति सानो उमेरमा उहाँको निधन हुनु दुःखद छ।’पूर्व रक्षामन्त्री एन्टी काइकोनेनले एक्समा लेखे, ’ईमेली एक आशाजनक सांसद थिए। उनी धेरै राम्रो र दयालु व्यक्ति थिए।
’प्रहरीले मृत्युको कारण अनुसन्धान गरिरहेको छ। प्रहरीका अनुसार यस घटनामा कुनै आपराधिक कोणको बारेमा अहिलेसम्म कुनै जानकारी प्राप्त भएको छैन।
घटनास्थल र उनको शव हेर्दा घटना शंकास्पद नभएकाले पेल्टोनेनले आत्महत्या गरेको हुनसक्ने अनुमान छ।बिहान ११ः०६ बजे प्रहरी घटनास्थल पुगेको थियो।
संसदमा ग्रीष्मकालीन बिदा चलिरहेको थियो। घटनापछि फिनल्यान्डको सबै दलका राजनीतिज्ञहरूले दुःख व्यक्त गरेका छन्।प्रधानमन्त्री पेटेरी ओर्पोले दिनभरका लागि सबै आधिकारिक राजनीतिक कामहरू स्थगित गरेका छन्।
उनले पेल्टोनेनको सम्मानमा एक मिनेटको मौन धारणसमेत गरेका थिए। सभामुख जुसी हल्ला–अहोले पनि पेल्टोनेनलाई ’सबै दलमा सम्मान गरिने एक मन पराइएका सहकर्मी भन्दै सम्झिएका छन्।
पेल्टोनेन सन् २०२३ मा पहिलो पटक दक्षिणी उसिमान क्षेत्रबाट सांसदमा निर्वाचित भएका थिए।उनी १८ वर्षको उमेरमै जार्भेनपा सहरको नगर परिषद् सदस्यमा र २२ वर्षको उमेरमा नगर बोर्डको अध्यक्षमा चुनिएका थिए। जुन पदमा पुग्ने उनी सबैभन्दा कान्छो व्यक्ति थिए।
