१८ भदौ , काठमाण्डौ ।
अमेरिकाले लागुऔषध तस्करी गर्ने एक गिरोहमाथि ठूलो कारबाही गरेको राष्ट्रपति डोनाल्ड ट्रम्पले बताएका छन् । उनले अमेरिकी सेनाले क्यारेबियन सागरको दक्षिणी भागमा लागुऔषध बोकेको एउटा जहाजमाथि हमला गरेका बताए ।
यो जहाज भेनेजुएलाबाट निस्केका र यसलाई ‘ट्रेन डी अरागुआ’ नामक एक आपराधिक गिरोहले चलाइरहेको बताइएको छ । ट्रम्पका अनुसार उक्त आक्रमणमा ११ जना तस्कर मारिएका छन् । ट्रम्पले यो आक्रमण अन्तर्राष्ट्रिय जलक्षेत्रमा भएको र यसमा कुनै पनि अमेरिकी सैनिक घाइते नभएको बताए ।
उनले जहाज अमेरिकातर्फ लागुऔषध लिएर गइरहेको बताए । अमेरिकी राष्ट्रपतिले जो कोहीले पनि अमेरिकामा लागुऔषध ल्याउने प्रयास गरेमा उसलाई कडा सजाय दिइने चेतावनी पनि दिए । यसै विषयमा अमेरिकी विदेश मन्त्री मार्को रुबियोले यो जहाज एक लागुऔषध आतंकवादी संगठनको हिस्सा भएको आरोप लगाए ।
हालै अमेरिकाले ल्याटिन अमेरिकी लागुऔषध तस्करहरूसँग जुध्नका लागि भेनेजुएलाको जलक्षेत्रमा आफ्नो नौसेनाको शक्ति बढाउने योजना बनाइसकेको छ । यसैबीच, यस घटनामा भेनेजुएलाका राष्ट्रपति निकोलस मादुरोले अमेरिकामाथि झूटो लागुऔषध–तस्करीको प्रचार गरेको आरोप लगाएका छन् ।
उनले अमेरिकाले आफ्नो देशलाई बदनाम गरेर आफूलाई सत्ताबाट हटाउन चाहेको बताए । मादुरोले यदि, अमेरिकाले आक्रमण गरेमा सेनासहित सम्पूर्ण जनतालाई हतियार उठाउन आह्वान गर्ने चेतावनी दिएका छन् । हालैका हप्तामा ट्रम्प प्रशासनले भेनेजुएली राष्ट्रपतिमाथि सैन्य र राजनीतिक दबाब बढाइरहेको छ ।
मदुरोलाई पक्राउ गर्न सघाउने जानकारी दिनेलाई दिइने भनेको पुरस्कार राशी बढाएर अमेरिकाले केही अघि ५ करोड डलरमा पुर्याएको थियो । यता अमेरिकाको जुनसुकै सैन्य हस्तक्षेप विरुद्ध लड्ने मदुरोले कसम खाएका छन् ।
तर यता ट्रम्पले लागुऔषध तस्कर समूहहरूमाथि कारबाही गर्ने विषयलाई आफ्नो प्रशासनको मुख्य लक्ष्य बनाएका छन् । यो आप्रवासनलाई सीमित गर्ने र अमेरिकाको दक्षिणी सीमा सुरक्षित गर्ने प्रयासको एक हिस्सा हो । यसका लागि दक्षिणी क्यारिबियन र नजिकैको समुद्री क्षेत्रमा अमेरिकी नौसेनाको ठूलो तैनाथी भएको हो ।
रोयटर्सका अनुसार अमेरिकी कोस्ट गार्ड र नौसेनाका जहाजहरू दक्षिणी क्यारिबियनमा नियमित रूपमा सञ्चालन भए पनि यो त्यस क्षेत्रमा हुने सामान्य तैनाथीभन्दा निकै ठूलो छ । एक अमेरिकी अधिकारीले नाम नबताउने सर्तमा बिहीबार सातवटा अमेरिकी युद्धपोत र एउटा आणविक शक्तिबाट चल्ने पनडुब्बी (सबमरिन) त्यस क्षेत्रमा छन् अथवा आउँदो हप्ता त्यहाँ पुग्ने अपेक्षा गरिएको छ ।
पेन्टागनले अमेरिकी मिसन वास्तवमा के हो भनेर सार्वजनिक रूपमा बताएको छैन । तर, ट्रम्प प्रशासनले अब लागुऔषध तस्कर र आपराधिक समूहहरूविरुद्ध सेना प्रयोग गर्न सकिने बताएको छ । पेन्टागनलाई विकल्पहरू तयार गर्न निर्देशन दिएको छ ।
रोयटर्सका अनुसार भेनेजुएलाले बिहीबार संयुक्त राष्ट्र संघका महासचिव एन्टोनियो गुटेरेससमक्ष अमेरिकी नौसैनिक तैनाथीबारे गुनासो गरेको छ । वासिङटनले संयुक्त राष्ट्र संघको संस्थापक बडापत्रको उल्लंघन गरेको आरोप लगाएको छ ।
“यो एउटा ठूलो प्रचार अभियान हो, जसको उद्देश्य विज्ञहरूले ‘काइनेटिक एक्सन’ भन्ने विषयलाई सही साबित गर्नु हो । यसको अर्थ एउटा सार्वभौम र स्वतन्त्र देशमा सैन्य हस्तक्षेप गर्नु, जुन देश कसैका लागि खतरा होइन,” गुटेरेससँगको भेटपछि संयुक्त राष्ट्र संघका लागि भेनेजुएलाका राजदूत स्यामुएल मोनकाडाले पत्रकारहरूलाई भने ।
ह्वाइट हाउसले बिहीबार अमेरिकामा लागुऔषधको बढ्दो प्रयोग रोक्न अमेरिका सबैशक्तिको प्रयोग गर्न आफू तयार भएको बताएको थियो । “धेरै क्यारिबियन राष्ट्रहरू र यस क्षेत्रका अन्य देशहरूले प्रशासनको लागुऔषध विरोधी अभियान र प्रयासहरूको प्रशंसा गरेका छन्,” ह्वाइट हाउसकी प्रेस सेक्रेटरी क्यारोलिन लेभिटले पत्रकारहरूसँग भनिन् ।
ट्रम्प प्रशासनले फेब्रुअरीमा मेक्सिकोको सिनालोआ कार्टेल र अन्य लागुऔषध समूहहरूका साथै भेनेजुएलाको आपराधिक समूह ‘ट्रेन डे अरागुआ’लाई विश्वव्यापी आतंकवादी संगठनको रूपमा सूचीकृत गरको थियो ।
रोयटर्सका अनुसार अमेरिकी सैनिक तैनाथीको अंगको रूपमा यूएसएस सान एन्टोनियो, यूएसएस इवो जिमा र यूएसएस फोर्ट लाउडरडेलजस्ता जहाजहरू छन् । स्रोतहरूले रोयटर्सलाई बताएअनुसार, यी जहाजहरूमा २२ सय मरिन सैनिकसहित ४५ सय सुरक्षाकर्मी छन् ।
अधिकारीहरूका अनुसार अमेरिकी सेनाले गुप्तचर जानकारी संकलन गर्न यस क्षेत्रमा ए–८ जासुसी विमानहरू पनि उडाइरहेको छ । तर, ती विमानहरू अन्तर्राष्ट्रिय जलक्षेत्रमा सञ्चालन भएका छन् ।
एक अमेरिकी अधिकारीले रोयटर्सलाई बताएअनुसार, एक आणविक शक्तिबाट चल्ने पनडुब्बी पनि यो नौसैनिक बलको हिस्सा हो । एसोसिएटेड प्रेस समाचार एजेन्सीले आगामी दिनहरूमा चार हजार नाविक र अमेरिकी मरिन सैनिकसहितका जहाजहरू थपिएर यो बल अझ विस्तार हुनसक्ने उल्लेख गरेको छ ।
अमेरिकाले भने भेनेजुएलाको भूमिमा कुनै पनि सैनिक पठाउने योजना घोषणा गरेको छैन । संयुक्त राष्ट्र संघको लागुऔषध तथा अपराध कार्यालयका अनुसार भेनेजुएला कोकिन उत्पादन गर्ने देश होइन ।
कोकिनको मुख्य स्रोत लगभग सबै कोलम्बिया, पेरु र बोलिभियामा केन्द्रित छ । गत जुनमा प्रकाशित पछिल्लो रिपोर्टअनुसार, विश्वभर उत्पादन हुने ३७ सय टन कोकिनमध्ये २५ सय टनभन्दा बढी कोलम्बियाबाट आउँछ ।
भेनेजुएला उत्पादन नक्सामा देखिँदैन । सीएनएनका अनुसार अमेरिकी लागुऔषध प्रवद्र्धन एजेन्सीका अनुसन्धानकर्ताहरू पनि यस्तै निष्कर्षमा पुगेका छन् । मार्चमा प्रकाशित आफ्नो वार्षिक प्रतिवेदनमा उनीहरूले अमेरिकामा बरामद गरिएको ८४ प्रतिशत कोकिन कोलम्बियाबाट आउने उल्लेख गरेका छन् ।
बरामदको हिसाबले भेनेजुएला ल्याटिन अमेरिकी देशहरूमध्ये छैटौँ स्थानमा छ, जसको हिस्सा दुई प्रतिशतभन्दा कम छ ।
