१९ भदौ , काठमाण्डौ ।
राष्ट्रिय स्वतन्त्र पार्टी (रास्वपा) का नेता बदन भण्डारीमाथि आक्रमण भएको छ । पार्टीको सार्वजनिक मामिला विभागका सचिव रहेका भण्डारीमाथि गएराति कपनको प्रगति चोकमा आक्रमण भएको हो । मोटरसाइकलमा आएका तीन जना व्यक्तिले उनीमाथि रड प्रहार गरी घाइते बनाएका हुन् ।
नम्बर प्लेट छोपेर आएका तीन जना व्यक्तिमध्ये दुई जनाले रड प्रहार गरेको भण्डारीले बताएका छन् । रड प्रहारबाट आफ्नो टाउकोमा करिब दश टाँका लगाउनु परेको भण्डारीले जानकारी दिए । उनको गाडी पनि तोडफोड गरिएको छ ।
केही समयअघि नारी टिभीमा दिएको एक अन्तरवार्तालाई लिएर आफूलाई निरन्तर धम्की आइरहेको र केही दिनअघि आफ्नो कार्यालयमा समेत आएर आफ्नो बारेमा सोधपुछ गरिएको उनले बताएका छन् । सामाजिक संजालमा उनले लेखेका छन्, हिजो बेलुका ८ः३० बजे अफिस बाट घर फर्कदा कपन प्रगति चोकमा मेरो गाडी रोकेर बाईका आएका ३ जना मानिसहरु बाट ज्यान मार्ने उदेश्यले म माथि आक्रमण गरियो छ ।
आएकाहरु रड , चिरपट र खुकुरी लिएर आएका थिए । दुई जनाले एक्कासि टाउको र शरिरिकका भागहरुमा प्रहार गरे तेस्रो ब्यक्तिले बाईकबाट खुकुरी निकालेसि म रगत चुहाउदै गाडी तेही छोडेर घरमा भागेर आए त्यसपछि अस्पताल गएर दुई पटक गरेर १० टाका लागाईएको छ । म आज पुन हस्पिटल गएको छु ।
यो आक्रमण पूर्ण रुपमा राजनीतिक रिसिबीले गरिएको हो । मलाई केही समय अगाडिबाट फोनबाट धम्की र मेरा अफिस वरिपरि आएर मेरो बारे सोधखोज गरिए सुचना मलाई थियो । मैले राजनीतिक बिचार र आफ्ना कुरा राखेकै आधारमा यसरी ज्यान मार्ने उदेश्यले म माथि आक्रमण गरियो, उनले लेखेका छन् ।
उनलाई बुधबार राति नै चाबहिल चुच्चेपाटीमा अवस्थित स्तूपा सामुदायिक अस्पतालमा ल्याएर उपचार गरिएको थियो । आक्रमणकारी को हुने भन्ने खुलेको छैन । रास्वपाले यसको सूचना प्रहरीलाई दिएको छ । बौद्ध प्रहरीले अनुसन्धान जारी रहेको बताएको छ ।
यसअघि गत असारमा पनि स्याङ्जा जिल्लाको आँधिखोला नदीमा भइरहेको चरम प्राकृतिक दोहनविरुद्ध आवाज उठाउँदा रास्वपाका नेतामाथि आक्रमण भएको थियो । प्राकृतिक दोहन रोक्न र सम्भावित प्राकृतिक प्रकोपबाट सुरक्षा गर्न माग राख्दै स्थानीय स्तरमा भइरहेको अभियानलाई बलपूर्वक रोक्न खोज्दा वालिङ नगरपालिका वडा नम्बर १० का वडाध्यक्ष सुनिल खनालले रड प्रहार गरी आक्रमण गरेका थिए ।
आक्रमणमा रास्वपाका केन्द्रीय सदस्य तथा अभियन्ता मेघ आले र केन्द्रीय नेतृत्व क्षमता विकास विभागका सदस्य दिनकर नेपाल गम्भीर घाइते भएका थिए । त्यसपछि रास्वपाका तत्कालिन कार्यवाहक प्रवक्ता मनिष झाले प्रेस विज्ञप्ति जारी गर्दै घटनाको कडा भत्र्सना गरेका थिए ।
साथै दोषीलाई हदैसम्मको कारबाही गर्न माग गरेका थिए । यस्तै हिजोमात्रै केन्द्रीय उपसभापति स्वर्णिम वाग्लेले पनि आफ्नो आवाज प्रयोग गरेर सामाजिक सञ्जालमा पोस्ट ‘डीप फेक भिडिओ’ बनाएको भन्दै साइबर ब्युरोमा उजुरी दिएका छन् ।
वाग्लेले अमित मगर र कमल पाठकविरुद्ध उजुरी दिएका हुन् । ‘कानुनी कारबाही गर्नुप¥यो भनेर हामीले साइबर ब्युरोमा उजुरी दिएका छौँ, सेयर गर्नेलाई पनि हदैसम्मको कारबाही हुनुपर्छ,’ उजुरी दर्तापछि उलने भने, ‘एउटा अमित मगर भन्ने पात्र रहेछन्। नेकपा एमाले नुवाकोटको जिल्लाका नेता। अर्का कमल पाठक भन्ने चितवनका नेता पनि देखियो। रुपन्देहीतिर पनि देखियो, जहाँ चुनाव हुँदैछ।’
आफूहरूविरुद्ध राजनीतिकरुपमा संगठित प्रहार भएको वाग्लेको दाबी छ। ‘यो राजनीतिसँग गाँसिएको छ,’ उनले भने, ‘हाम्रा सभापति रवि लामिछानेलाई पनि दुःख दिने। हाम्रा उपसभापति डीपी अर्यालमाथि पनि प्रयास भयो। अहिले ममाथि भयो। संगठितरुपमा हुँदैछ।’
