१७ असोज , काठमाण्डौ ।
जेनजी आन्दोलनका कारण प्रतिनिधि सभा विघटन भएर फागुन २१ गतेका लागि निर्वाचनको मिति तोकिएपछि केही व्यक्ति र समूह नयाँ दल दर्ताको गृहकार्यमा लागेका छन् ।
काँग्रेस, एमाले, माओवादी केन्द्र जस्ता ठूला र पुराना पार्टीप्रति नागरिकमा चर्को आक्रोश रहेका बेला नयाँ पार्टी गठनको होड सुरु भएको हो ।
केही चर्चित व्यक्ति तथा विभिन्न राजनीतिक दलबाट राजीनामा दिएका नेताहरुले समेत जेनजीका मुद्या समेट्ने भन्दै नयाँ दल दर्ताको गृहकार्यमा जुटेका छन् ।
अहिले दैनिक ३, ४ वटा समूहले नयाँ दल दर्ताका लागि आयोगमा पुगेर प्रक्रियाबारे जानकारी लिने काम गरिरहेका छन् । यसबीच धरान उपमहानगरपालिकाका मेयर हर्कराज राईले दल दर्ताका लागि निर्वाचन आयोगमा निवेदन दिइसकेका छन् ।
असोज ७ गते नै ‘श्रम संस्कृति पार्टी’ नाम प्रस्ताव गरेर साम्पाङले निर्वाचन आयोगमा निवेदन दिएका हुन् । उनले चुनाव चिन्ह–माटो मागेका छन् । हर्कले आफ्नो पार्टीमा अभियन्ता पुण्य गौतमलाई पनि आबद्ध गराउने बताएका छन् ।
साम्पाङले सामाजिक सञ्जालमार्फत गौतमलाई आफ्नो पार्टीमा स्वागत गरेका हुन् । तर यस विषयमा गौतमको प्रतिक्रिया आइसकेको छैन ।
साम्पाङले जेन–जी आन्दोलनअघि काठमाडौं महानगरपालिकाका मेयर बालेन्द्र साहसँग मिलेर पार्टी खोल्ने आशय दिइरहेका थिए । तर, आन्दोलनपछि दुवै जनाको सम्बन्ध बिग्रिएको छ ।
यसबीच बालेन साहमाथि पनि जेनजीको भावनालाई समेटेर दल दर्र्ताका लागि दबाब बढिरहेको छ । जेनजीले अन्तरिम सरकारमा बालेनलाई नै प्रधानमन्त्री बन्न अफर गरेका थिए ।
तर बालेनले अस्वीकार गरे । बालेनले अब नयाँ दल गठन गर्ने धेरैको अनुमान छ । यता अहिले सरकारमा रहेर तीन वटा मन्त्रालय सम्हालिरहेका कुलमान घिसिङको पनि नयाँ दलको चर्चा चुलिएको छ ।
निर्वाचन आयोगमा दल दर्ताका लागि निवेदन दिइसकेको उज्यालो नेपाल पार्टी (उनेपा)ले मन्त्री घिसिङसँग छलफल गरिरहेको खुलेको छ ।
हाल उनेपाका अध्यक्ष रहेका ज्ञानेन्द्र कुमार तामाङले आफूहरू पार्टी विस्तारको क्रममा रहेकाले मन्त्री कुलमान घिसिङ लगायतसँग छलफल गर्न लागिएको बताएका छन् ।
‘कसरी, कुन तरिकाले जाने ? कसरी नयाँ सदस्यलाई समेट्ने भनेर छलफल चलिराखेको छ’ अध्यक्ष तामाङले भने, यही क्रममा मन्त्री कुलमान घिसिङ लगायतसँग छलफल गर्ने तय भएको उनले बताए ।
तामाङमाले भोली शनिबार साँझ ७ बजेदेखि ९ बजेसम्म भर्चुअल रुपमा छलफल गर्ने तय भएको पनि जानकारी दिए । त्यसमा उनेपाका पदाधिकारीहरू र कुलमानसहित कुलमानका तर्फबाट अन्य केही सदस्यहरू र विज्ञहरू सहभागी रहने अध्यक्ष तामाङले जानकारी दिए ।
उनका अनुसार दल निर्माणका लागि देश÷विदेशमा रहेका विज्ञहरूसँग छलफल चलिरहेको छ । यसक्रममा कुलमान घिसिङको समेत उपस्थितिमा ‘जुम मिटिङ’ गर्न लागिएको हो ।
छलफलमा पार्टीको घोषणापत्रको मस्यौदाका सम्बन्धमा समेत छलफल हुने अध्यक्ष तामाङले बताए । उनका अनुसार उज्यालो नेपाल अभियान, पार्टीको अवधारणा पत्रको पहिलो ड्राफ्ट तयार भएको छ ।
छलफलका क्रममा आएका सुझाव समेट्दै संशोधन, व्याख्या एवं पार्टीका एजेन्डा र कार्यक्रमहरू थप्दै जाने तयारी छ । उनेपाको अध्यक्षमा ज्ञानेन्द्र कुमार तामाङ छन् ।
यसअघि उनी प्रभु साह नेतृत्वको आम जनता पार्टी (आजपा)को कार्यालय सदस्य थिए । पछि उनले गत साउन ३१ गते विज्ञप्ति जारी गरी आम जनता पार्टी परित्याग गरेको र ‘उज्यालो नेपाल अभियान’ गठन गरेको घोषणा गरेका थिए ।
यस्तै केही समयअघि मध्यपूर्वका विभिन्न देशहरुमा रहेका नेपालीहरुसँग भेटघाट गरेका कुलमान त्यहाँबाट फर्किएर अमेरिका पुगेका थिए ।
करिब २ सातामा अमेरिकामा रहेका नेपालीहरुसँग छलफल गरेपछि उनी इंग्ल्याण्ड, स्कटल्याण्ड, पोर्चुगललगायतका युरोपेली देश पुगेका थिए ।
उनी विदेशमा रहेका नेपालीहरुसँग आफूले पार्टी खोल्न उपयुक्त हुन्छ कि हुँदैन र पार्टी खोलेमा उनीहरुको सहयोगका लागि सुझाव माग्न त्यहाँ पुगेका थिए ।
सो क्रममा धेरैले उनलाई अरु पार्टीमा नलागी आफै पार्टी खोल्न सुझाव दिएका थिए । नेपाललाई लोडसेडिङमुक्त गराएको श्रेय पाएर ‘उज्यालोको नायक’को बिम्ब बनाएका घिसिङ नयाँ पार्टी निर्माणको लाागि मतदाताहरुको मनोविज्ञान बुझ्न ‘उज्यालो नेपाल’ नामक अभियान लिएर यात्रामा निस्किएका थिए ।
घिसिङ देश तथा विदेशमा रहेका नेपालीहरुको सकरात्मक प्रतिक्रियाले उत्साहित छन् । ‘उज्यालो नेपाल’ अभियान नामक विभिन्न वडा कमिटीहरु पनि धमाधम निर्माण भइरहेको छन् ।
काठमाडौं लगायत मुलुकका विभिन्न शहरमा गरेर चार दर्जन बढी वडा कमिटीहरु निर्माण भइसकेको छ । कुलमानले पनि यसअघि डा. सन्दुक रुइत, महावीर पुन, बालेन, हर्क साम्पाङदेखि डा. मुकुल ढकाललगायतका व्यक्तिहरुसँग पटक पटक छलफल गरेका थिए ।
रुइत र पुनले आफूहरु पार्टीमा नलाग्ने तर आवश्यक परे आन्तरिक रुपमा सहयोग गर्न तयार रहेको आश्वासन दिएका छन् । आफै पार्टी खोल्ने प्रयासमा लागेका बालेन र हर्कले भने आफ्नै नेतृत्वमा आउन कुलमानलाई प्रस्ताव गरेको बताइएको छ ।
यता, आफै पार्टी खोल्ने सोँचमा पुगेका कुलमानलाई यसअघि रुपन्देही ३ को उप निर्वाचनमा आफ्नो पार्टीको तर्फबाट उम्मेदवार भइ दिन माओवादी केन्द्र, नागरिक उन्मुक्ति पार्टी र राष्ट्रिय स्वतन्त्र पार्टीले पटक पटक प्रस्ताव गरेका थिए ।
तर कुलमानले पनि निधो दिएका थिएनन् र अब परिस्थिति पनि बदलिसकेको छ, फागुन २१ म प्रतिनिधि सभाको चुनावको मिति तय भइसकेको छ ।
जसमा नयाँ दल मात्रै होइन त्यसको नेतृत्व नै आफूले लिने गरी कुलमान घिसिङले तयारी गरिरहेको बुझिएको छ ।
