२५ असोज , काठमाण्डौ ।
यस वर्षको मनसुन नेपालको सम्पूर्ण भू–भागबाट बाहिरि सकेकाले हाल देशभर कुनै उल्लेखनीय मौसम प्रणालीको प्रभाव रहेको छैन । शुक्रबारदेखि नेपालबाट मनसुन नेपालबाट बाहिरिएको हो ।
हिजो अक्टोबर १० नेपालको सम्पूर्ण भू–भागबाट यसवर्षको मनसुन बाहिरिएको जल तथा मौसम विज्ञान विभागले जनाएको छ। विभागका अनुसार असोज २० गते (अक्टोबर ६) सुदूरपश्चिम, कर्णालीलगायत लुम्बिनी प्रदेशको पश्चिमी भू–भागको धेरै स्थानहरू र गण्डकी प्रदेशको पश्चिमी भू–भागको थोरै स्थानहरूबाट यस वर्ष मनसुन बाहिरिन सुरु भएको थियो।
नेपालमा मनसुन बहिर्गमन हुने सरदर मिति अक्टोबर २ भएता पनि यस वर्ष मनसुन ८ दिन ढिलो गरी बाहिरिएको हो। मनसुनको बहिर्गमन भएता पनि स्थानीय वायू तथा पश्चिमी वायूको प्रभाव रहन सक्ने विभागको भनाइ छ।
योसँगै नेपालमा औपचारिक रूपमा बर्खायामको अन्त्य भएको छ भने पोस्ट–मनसुन सिजन सुरु भएको छ।यस वर्ष नेपालमा मनसुन औसत मिति जुन १३ तारिखभन्दा १५ दिनअगाडि मे २९ तारिखमै प्रवेश गरेको थियो।
यो बाहिरिने सरदर मितिचाहिँ यही अक्टोबर २ तारिख थियो। तर औसत मितिभन्दा ८ दिन ढिला हिजो असोज २४ गते अर्थात् अक्टोबर १० तारिख मनसुन नेपालबाट बाहिरिएको हो।
यसअघि असोज २० गते मनसुन सुदूरपश्चिम प्रदेश, कर्णाली प्रदेशसहित लुम्बिनी प्रदेशको पश्चिमी क्षेत्रका धेरै स्थान र गण्डकी प्रदेशको पश्चिमी भेगका थोरै स्थानबाट मात्र हटेको थियो।
मौसमविद्का अनुसार पोस्ट–मनसुन लाग्नु भनेको मौसम हिउँदतर्फ ढल्किनु हो। यो सिजन यही अक्टोबर र नोभेम्बर महिनासम्म रहन्छ। डिसेम्बरदेखि भने पूर्ण रूपमा हिउँदयाम अर्थात् विन्टर सिजन लाग्छ।
‘विन्टर’ ३ महिना– डिसेम्बर, जनवरी र फेब्रुअरीसम्म रहन्छ। त्यसपछि प्रि–मनसुन सुरु हुन्छ र यो पनि ३ महिना– मार्च, अप्रिल र मेसम्म रहन्छ । प्रि–मनसुन सकिएपछि फेरि मनसुन सुरु हुन्छ।
आज दिउँसो कोशी प्रदेश, गण्डकी प्रदेश र कर्णाली प्रदेशका पहाडी भू–भागमा आंशिक बदली रही बाँकी भू–भागमा मुख्यतया सफा रहने मौसम पूर्वानुमान महाशाखाले जनाएको छ ।
कोशी प्रदेशको पहाडी भू–भागका एकदुई स्थान हल्का वर्षाको सम्भावना रहेको छ । महाशाखाका अनुसार आज राति कोशी प्रदेशको पहाडी भू–भागमा आंशिक बदली रही बाँकी भू–भागमा मुख्यतया सफा रहनेछ ।
