९ कार्तिक, काठमाण्डौ ।
नेपमलीहरुको सम्मानमा संसारको व्यापारिक राजधानी न्युयोर्क सिटीको बलिङ ग्रिन पार्कमा, न्युयोर्क सिटी मेयर कार्यालयले नेपालको झण्डा फहराएको छ। न्युयोर्क सिटी मेयरको कार्यालय र बलिङ ग्रिन पार्क एसोसिएसनको आयोजनामा न्युयोर्कमा रहेको नेपाली समुदायको सम्मानमा नेपालको झण्डा फहराइएको हो।
अमेरिकी झण्डाको समान उचाइ र हैसियतमा नेपालको झण्डा फहराइएको हो। जसमा नेपाली महावाणिज्यदूतावास र नेपाली समुदायका प्रतिनिधिहरूको पनि सहभागिता रहेको थियो। यो झण्डा अबको केही दिनसम्म न्युयोर्क सिटीको अत्यन्तै महत्त्वपूर्ण फाइनान्सियल डिस्ट्रिक्टमा फहराइरहनेछ।
हरेक दिन हजारौं पर्यटकहरूले भ्रमण गरेर तस्वीर खिच्ने ‘चार्जिङ बुल’ अगाडि यो झण्डा आगामी केही सातासम्म फहराइनेछ। यस पार्कमा सन् १९९६ देखि नै झण्डाहरू फहराइँदै आए पनि सन् २०२३ देखि हरेक वर्ष नेपालको झण्डा पनि फहराइँदै आएको छ।
कार्यक्रममा बलिङ ग्रिन एसोसिएसनका अध्यक्ष आर्थर पिकोलोले पार्कको क्रान्तिकारी विरासत र अमेरिकी स्वतन्त्रताको जन्मस्थलको रूपमा यसको महत्त्वलाई स्मरण गर्दै नेपालले नयाँ चुनौतीहरूको सामना गरिरहेका बेला कुनै राष्ट्रको शक्ति शान्त दिनहरूले होइन, यसले कत्तिको आँधीबेहरी सहन्छ भन्ने कुराले नापिने कुरा यो झण्डाले सम्झाउने बताएका थिए।
उनले नेपाली जनताको भावना र साहसको प्रशंसा गर्दै झण्डाको अनुपम दुई चुचुराहरूलाई हिमालय पर्वतसँग तुलना गरेको नेपयोर्कले उल्लेख गरेको छ । सन् २०२३ मा पहिलो पटक नेपालको झण्डा फहराउने कार्यक्रमकी युवा संयोजक श्रीया तुलाधरले सन्देश पठाउँदै नेपाली अमेरिकी समुदायको प्रगतिको चर्चा गरेकी थिइन्।
बलिङ ग्रिन एसोसिएसनले श्रीया तुलाधरलाई उनको नेतृत्व र समुदायप्रतिको सेवाका लागि ‘न्यूयोर्क शहर हिरो अवार्ड’ प्रदान गरेको थियो। मेयरको कार्यालयको प्रतिनिधित्व गर्दै दक्षिण एसियाली सम्पर्क अधिकारी सुक्रानी धनपतले न्यूयोर्कको बहुसांस्कृतिक परिदृश्यमा नेपाली समुदायको योगदानलाई जोड दिइन्।
उनले भनिन्, “यो झण्डा यसका मानिसहरू जस्तै अद्वितीय छ। यसले बहादुरी, शान्ति र नेपालको चिरस्थायी भावनाको प्रतिनिधित्व गर्दछ।” यस्तै मेयरको अध्यागमन मामिला कार्यालयका सहायक आयुक्त एरिक साल्गाडोले नेपाली डायस्पोरासहित आप्रवासी समुदायहरूप्रति शहरको प्रतिबद्धता व्यक्त गरेका थिए।
मेयरको अन्तर्राष्ट्रिय मामिला कार्यालयका उप आयुक्त दिलीप चौहानले मेयर एरिक एडम्सको तर्फबाट शुभकामना व्यक्त गर्दै नेपाली समुदायको लचकता र साझेदारीको प्रशंसा गरेका थिए ।
समारोहमा न्यूयोर्कका लागि नेपालका महावाणिज्यदूत दधिराम भण्डारीले नेपाल र न्यूयोर्क शहरबीचको साझेदारीको प्रशंसा गर्दै यस्ता कार्यक्रमहरूले मानिसहरूलाई एकसाथ ल्याउँने बताए ।
उनले हालैका राजनीतिक परिवर्तन र रूपान्तरणका बाबजुद पनि नेपाल सुरक्षित, खुला र स्वागतयोग्य रहेको भन्दै दुई राष्ट्रबीच अझ गहिरो मित्रताको लागि तत्पर रहेको बताएका थिए ।
अमेरिका र नेपालको राष्ट्रिय झण्डा एकैसाथ फहराइँदा दुई राष्ट्रबीचको एकता, गर्व र शान्तिको प्रतीकको रूपमा अमेरिका र नेपालका राष्ट्रिय गानहरू बजाइएका थिए।
न्यूयोर्क शहरमा नेपालको झण्डा फहराउने परम्परा सन् २०२३ मा सुरु भएको थियो, जब मेयर एरिक एडम्सले आफैंले बोलिङ ग्रीन पार्कमा पहिलो पटक नेपाली झण्डा फहराएका थिए।
