१८ कार्तिक , काठमाण्डौ ।
नेपाल फुटबल खेलाडी संघ एन्फा र क्लबविरुद्ध आन्दोलित भएको छ । फुटबल खेलाडीहरुले झन्डै चार वर्षपछि ‘ए’ डिभिजन लिग गर्ने अखिल नेपाल फुटबल संघ र क्लबबीचको सहमतिको विरोध गरेको छ ।
सातदोबाटोस्थित एन्फा कम्प्लेक्समा सोमबार बसेको एन्फा पदाधिकारी र ‘ए’ डिभिजनका क्लबका अध्यक्षबीचको बैठकले अर्को वर्षको पुस ३ गतेदेखि लिग गराउने सहमति गरेका थिए । यस निर्णयले व्यवसायिक खेलाडीमाथि ठूलो अन्याय गरेको खेलाडी संघको ठहर छ ।
संघले पछिल्लो पटक लिग भएको करिब तीन वर्ष बित्न लाग्दा पनि एन्फाले पटक–पटकको आग्रह बेवास्ता गरेको आरोप लगाएको छ । ‘एन्फा, क्लब र युवा तथा खेलकुद मन्त्रालयबीच भएको छलफल र त्यसपछि बनेको समितिले लिग छिट्टै सञ्चालन गर्ने संकेत दिएको थियो ।
तर, एन्फाको पछिल्लो निर्णयले ती सबै पहललाई कमजोर बनाएको छ,’ संघको विज्ञप्तिमा भनिएको छ । एन्फाले अहिले गर्ने भनिएको राष्ट्रिय लिगमा ६ टोली मात्र सहभागी हुनेछन् । यसले गर्दा धेरैजसो खेलाडीका लागि अवसर प्राप्त नहुने संघको बुझाइ छ ।
संघका अनुसार ‘ए’, ‘बी’ र ‘सी’ डिभिजनमा रहेका ४२ क्लबका १२५० देखि २१०० खेलाडी अर्को वर्ष खेल्नबाट वञ्चित हुने पक्का भएको छ । यदि ‘ए’ डिभिजन लिग पनि नभए झन्डै १ हजारभन्दा बढी खेलाडी व्यावसायिक फुटबल खेल्नबाट वञ्चित हुने संघको तर्क छ ।
संघले विज्ञप्तिमा भनेको छ,‘खेलाडीको मर्म र भावनामाथि खेलवाड भएकोले यो निर्णयप्रति हामी गम्भीर असन्तुष्टि जनाउँछौं। यस सहमति खेलाडीको अस्तित्व नै संकटमा परेको छ।’ संघले पटक–पटक एन्फालाई लिग सञ्चालनका लागि मौखिक र लिखित सुझाव दिँदै आएको उल्लेख गरेको छ ।
त्यसैले अब एन्फाको पछिल्लो निर्णयले खेलाडीहरूलाई आन्दोलनतर्फ जान बाध्य पारेको जनाएको छ । संघले आगामी दिनमा उत्पन्न हुने परिस्थितिको सम्पूर्ण जिम्मेवारी एन्फा नेतृत्वकै हुने चेतावनी दिएको छ ।
त्यसैगरी संघले फुटबलप्रेमी, समर्थक र सरोकारवालाहरूलाई खेलाडीको हकका लागि सुरु हुन लागेको अभियानमा साथ दिन आह्वान गरेको छ । सहिद स्मारक ‘ए’ डिभिजन लिग पछिल्लो पटक सकिएको दुई वर्ष ४ महिना भएको छ ।
अब अर्को वर्ष २०८३को पुस ३ गते सहिद स्मारक ‘ए’ डिभिजन लिग आयोजना गर्ने सहमति भएको छ । यसको अर्थ झण्डै साँढे ३ वर्ष देखि नेपाली फुटबल खेलाडी बेरोजगार नै रहनेछन् । यो अवधिमा विदेशिने खेलाडीको लेखाजोखा नै छैन ।
बाँकी खेलाडी फुटबल भनेर बसेका छन् । तर उनीहरूले अझै फुटबल खेल्न नपाउने भएका छन् । २ वर्ष देखि फुटबल खेल्न नपाएका, फुटबल बाहेक अन्य पेशा समेत नअपनाएका खेलाडीसँग राष्ट्रिय लिगको लागि २ महिनाको सम्झौता गर्दा क्लबले लाज मान्नु पर्ने हो ।
तर अर्को वर्ष मात्र ए डिभिजन लिग गर्ने हस्ताक्षर गरिरहँदा कुनै पनि क्लबले खेलाडीको रोजगारीको विषयमा सोचेको समेत पाइएन ।
