एजेन्सी,असोज २०,
आईसीसी टी–२० विश्वकप अन्तर्गत एसिया उपक्षेत्रीय छनोटको नेपालले लगातार दोस्रो जित हात पारेको छ । शनिबार भएको खेलमा नेपालले मलेसियालाई ८ विकेटले पराजित गरेको हो ।
यसअघि पनि नेपालले मलेसियालाई ८ विकेटले नै पराजित गरेको थियो । मलेसियाको बायुमास ओभल मैदानमा टस जितेर पहिले ब्याटिङ गरेको मलेसिया १९ दशमलव ३ बलमा एक सय रनमा अलआउट भएको थियो ।
मलेसियाका ओपनर सायिद अजिज १३ र शफिक शरिफले ४९ रन बनाउन बाहेक मलेसियाका कुनै पनि ब्याटम्यानले नेपाली बलर सामु क्रिजमा टिकेर दोहोरो अंकमा रन जोड्न सकेनन् ।
तेस्रो विकेटको लागि शरिफ र अमिदले ३९ को साभेदारी गर्दै मलेसियालाई सम्मान जनक स्थितिमा पुर्याउने काम गरेका थिए । कुनै समय ११ ओभर १ बलमा ७५–३ को स्थितिमा रहेको मलेसिया सन्दीपको गुग्लीमा फसेपछि १७ ओभर ३ बलमा ९४–९ को स्थितिमा पुगेको थियो ।
शरिफले ३७ बलमा ७ चौका र २ छक्का प्रहार गर्दै ४९ रनमा आउट भए । शरिफलाई सन्दीपले १२ ओभर ३ बलमा सोमपालको हातबाट क्याच दिदैँ पेभिलिएन फकिएका थिए ।
नेपालका लागि सन्दीप लामिछानेले ४ ओभरमा २० रन खर्चेर ५ विकेट लिदाँ सोमपाल कामीले ३ र खड्काले १ विकेट लिए । १०१ रनको जवाफी लक्ष्य नेपालले १२ दशमलब ४ ओभरमा २ विकेट गुमाएर पूरा गरेको छ ।
नेपालको जीतमा कप्तान पारस खड्काले अर्धशतकीय पारी खेले । ४ रन हुँदा अनिल साहलाई गुमाएको नेपालले त्यसपछि क्रिजमा आएका पारसले उत्कृष्ट ब्याटिङ गरेका थिए ।सुरुवाती दुई ओभर सम्म रोकेर ब्याटिङ गरेका पारसले त्यसपछि निकै आक्रमक ब्याटिङ गरेका थिए ।
मैदानमा चौका र छक्काको बर्षा गरेका पारसले ३७ बलमा २ छक्का र ५ चौकार प्रहार गर्दै ५२ रनमा नट आउट रहे । छक्का हान्दै खेल जिताएका ज्ञानेन्द्र मल्लले पनि आक्रमक ब्याटिङ गरे ।
मल्लले २४ बलमा २ चौका र १ छक्का प्रहार गर्दै २७ रनमा नट आउट रहे । ओपनर विनोद भण्डारीले पनि १२ रन बनाउन सके ।
सन्दीपको नयाँ कीर्तिमान
मलेसियाको ब्याटिङ इनिङ्स ध्वस्त पार्न सन्दीपले एक्लै ५ विकेट लिएका सन्दीपको यो टी २० क्रिकेटको करियरकै उत्कृष्ट प्रर्दशन समेत बन्यो ।
साथै नेपालबाट टी–२० क्रिकेटमा एक्लै एकै खेलमा ५ विकेट लिने पहिलो नेपाली बलर समेत बन्ने कीर्तिमान राखे । यस अघि बसन्त रेग्मी र शक्ति गौचनले एकै खेलम ४/४ विकेट लिदा ५ विकेट कसैले लिन सकेका थिएनन् ।
लिस्ट ए मा भने सोमपाल कामी,करण केसी र सन्दीप लामिछानेले एक्कै खेलमा ५/५ विकेट लिएका छन् ।
