१ पुष , काठमाण्डौ ।
रघुजी उपाध्यक्षका साझा उम्मेदवार, ज्ञवाली रोएको फेक
एमालेको मतदान रातभर हुने,सुरु हुनै राति ८ बज्न सक्ने
सोमबार रातिसम्म अध्यक्षसहित संस्थापन समूहसंग असन्तुष्ट रहेका रघुजी पन्त अहिले भने संस्थापनकै प्यानलमा अटाएका छन् । हिजो अन्तिम समयमा उनले स्वतन्त्ररुपमा उपाध्यक्षका लागि आफ्नो नाम दर्ता गराएका थिए ।
तर अहिले भने उनी संस्थापन र इतर दुवैका साझा उम्मेदवार भएका छन् । सोमबार मनोनयनको अन्तिम समयमा उपाध्यक्ष पदमा उम्मेदवारी दिएका पन्त केपी ओली र ईश्वर पोखरेल दुवै प्यानलको ‘साझा’ उम्मेद्वार बन्न पुगेका हुन् ।
ओली प्यानलबाट उपाध्यक्षको भाग पाएका प्रदीप ज्ञवालीले महासचिव नपाएपछि असन्तुष्टि जनाउँदै केन्द्रीय सदस्यमा मात्रै उम्मेदवारी दिएका छन् । ज्ञवालीले उम्मेदवार नदिएपछि ओली समूहबाट उपाध्यक्षमा पाँच मध्ये चार जनाको मात्रै उम्मेदवारी परेको थियो।
ओली समूहबाट उपाध्यक्षको दावेदार विष्णु पौडेल, रामबहादुर थापा, गुरु बराल, पृथ्वीसुब्बा गुरुङ छन् । उता पोखरेलको समूहबाट पनि उपाध्यक्षमा चार जनाको मात्रै उम्मेदवारी दिएका छन् ।
गोकर्ण विष्ट, बिन्दा पाण्डे, परशुराम मेघी गुरुङ र अरुण नेपाल पोखरेल टिमबाट उपाध्यक्षका उम्मेदवार छन् । अन्तिम समयमा उम्मेदवारी हालेका पन्तलाई मंगलबार ओली टिमले पनि आफ्नो उम्मेदवारका रुपमा पनि स्वीकार गरेको छ ।
यसअघि भने उनलाई ईश्वर समूहले आफ्नो प्यानलको भनेको थियो । यसबीच नयाँ नेतृत्व चयनका लागि आज विहानैदेखि मतदान हुने भनिएपनि पटक पटक समय सारिदै जाँदा अझै सुरु हुन सकेको छैन ।
केन्द्रीय निर्वाचन आयोगले मंगलबार मध्याह्न १२ बजेदेखि मतदानको समय तोकेको थियो । तर यो समय पनि धकेलिएर साँझ ४ बजेदेखि मतदान हुने भनिएको थियो । तर यो समयमा पनि मतदान सुरु हुने छाँटकाँट देखिएको छैन ।
‘नाम तलमाथि परेको भएर मिलाउनु प¥यो । हरेक उम्मेदवारको फोटोको कोडिङ गर्नुपर्छ । बिहान १० बजेसम्म कोडिङ ग¥यौं । फेरि तलमाथि परेको सच्याउन नयाँ कोडिङ गर्नुपर्छ । बुथ तयार छ । रातिको ८ बजेदेखि मात्र मतदान सुरु हुन सक्छ,’ प्राविधिक लक्ष्मण रिमालले भनेका छन् ।
निर्वाचन समितिले उम्मेदवारहरूको फाइनल लिस्ट दिन ढिलाइ गरेपछि र मंगलबार केहीबेरअघि मात्रै फाइनल भनेर नयाँ सूची दिएपछि सबै मिलाउन ढिलाइ भएको उनले बताए । निर्वाचन विद्युतीय भोटिङ मेसिनबाट गरिँदैछ ।
भोटिङ मेसिनका प्राविधिक राम रिमालका अनुसार नेतृत्वबाट अहिले नयाँ फाइनल लिस्ट आएको र त्यसमा उम्मेदवारका नामहरू तलमाथि भएकाले सच्याउन समय लाग्ने भएको छ । नाम सच्याएर मेसिनमा ’रि–इन्ट्री’ गर्नुपर्ने भएकाले मतदान सुरु हुन साँझ ७ देखि ८ बज्न सक्ने रिमालले बताए ।
यता निर्वाचन समितिले पनि जतिसक्दो चाँडो मतदान सुरु गर्ने बताएको छ । समिति स्रोतका अनुसार ईश्वर पोखरेल समूहले राति मतदान नगर्न दबाब दिइरहेको छ । तर, समितिले भने आफूहरू बाध्यतामा रहेको भन्दै प्रक्रिया अघि बढाउने अडान लिएको छ ।
समितिले छिटोभन्दा छिटो लक्ष्य राखेको छ । तर, प्राविधिक पक्षले नाम सच्याउन समय लाग्ने भन्दै ७–८ बज्ने संकेत गरेको छ । एमालेको नेतृत्व चयनका लागि भृकुटीमण्डपमा निर्वाचन कार्यक्रम भइरहेको छ ।
यसैबीच हिजोदेखि उपमहासचिव प्रदीप ज्ञवाली रुँदै गरेको देखिने भिडियो सामाजिक सञ्जालमा भाइरल बनिरहँदा त्यो फेक पुष्टि भएको छ । भृकुटीमण्डपमा जारी एमाले महाधिवेशनमा अध्यक्ष केपी शर्मा ओलीले महासचिव पदका लागि ज्ञवालीलाई उम्मेदवार नबनाएपछि उनी बिच्किएका थिए ।
यही पृष्ठभूमिमा ज्ञवाली रुँदै गरेको जस्तो देखिने भिडियो सामाजिक सञ्जालमा फैलिएको हो । तर तथ्य जाँच गर्दा यो भिडियो एआईको प्रयोगबाट निर्मित भएको पुष्टि भएको छ ।
’हाइभ मोडरेसन’ टुलले ५ प्रतिशत एआई प्रयोग देखाएपछि ’इनभिड’ भेरिफिकेसन टुलमा जाँच गर्दा ज्ञवालीको अनुहारमा केही भिन्नता देखिएको थियो । भाइरल भएको भिडियो गत मंसिर ३ गते प्रधानमन्त्रीसँगको छलफलपछि बाहिरिने क्रममा खिचिएको हो।
यसलाई एआई प्रविधि प्रयोग गरेर हालको घटनासँग जोडेर प्रस्तुत गरिएको पाइएको छ । यसबीच मतदान सुरू हुनु ढिलाई भइरहँदा भृकुटीमण्डपमा उम्मेदवारहरू भने प्रतिनिधिहरूसँग भोट मागिरहेका छन् ।
नेतृत्व चयनको लागि अध्यक्ष केपी ओली र वरिष्ठ उपाध्यक्ष ईश्वर पोखरेलले प्यानलमै उम्मेदवार अगाडि सारेका छन् । लगातार तेस्रोपटक अध्यक्ष बन्ने धुनमा रहेका ओलीलाई पोखरेलले टक्कर दिँदै छन् ।
पाँच उपाध्यक्षको लागि ११ जना, एक महासचिवको लागि शंकर पोखरेल र सुरेन्द्र पाण्डे, तीन उपमहासचिवको लागि ६ जनाको उम्मेदवारी परेको छ । नौ सचिवको लागि २० जनाले उम्मेदवारी दर्ता गराएका छन् ।
समयमा मतदान सुरु नभए पनि उम्मेदवार, नेता र कार्यकर्ताहरू मत माग्न व्यस्त छन् । मत माग्ने लाइनमा असन्तुष्ट नेताहरू पनि देखिएका छन् । महासचिवमा उम्मेवदारी दिन नपाएका नेता प्रदीप ज्ञवालीसमेत प्यानललाई भोट माग्दै गरेका देखिएका छन् ।
महासचिवमा शंकर पोखरेलको उम्मेदवारीप्रति असन्तुष्टि जनाए पनि ज्ञवाली उनैलाई भोट माग्न उत्रिएका छन् । अन्य नेता कार्यकर्ता पनि अनेक झाँकीसहित भोट माग्न व्यस्त छन् ।
मतदान सुरु नभए पनि उम्मेदवारहरू आज बिहानैदेखि मत मागिरहेका छन् । मतदानको लागि ८० वटा विद्युतीय भोटिङ मेसिनको प्रयोग हुँदै छ । एक जनालाई भोट हाल्न बढीमा ४० मिनेटसम्म लाग्ने बुझिएको छ ।
