२५ जेठ , काठमाण्डौ।
फिलिपिन्समा आज विहान ८.२ म्याग्निच्युडको शक्तिशाली भूकम्प गएको छ। भूकम्पले भवनहरूमा क्षति पुगेको छ । भूकम्पपछि सुनामीको चेतावनी जारी गरिएको छ । प्रभावित क्षेत्रका बासिन्दाहरूलाई सुरक्षित स्थानतर्फ जान आग्रह गरिएको छ । देशका विभिन्न भागहरूमा शक्तिशाली धक्का महसुस गरिएको छ ।
केही विद्यालय तथा विश्वविद्यालयका भवनहरूमा समेत क्षति पुगेको बताइएको छ । भूकम्प फिलिपिन्सको दक्षिणी टापु मिन्डानाओको तटीय क्षेत्र नजिक गएको हो । यसले संरचनात्मक क्षति तथा सम्भावित सुनामीको जोखिम बढाएको अधिकारीहरूले बताएका छन् ।
सामाजिक सञ्जालमा भाइरल भएका भिडियोहरूमा भूकम्पका कारण भवनहरूमा क्षति पुगेको तथा मानिसहरू सुरक्षित स्थानतर्फ भागिरहेको देखिन्छ । एउटा विद्यालय परिसरमा खिचिएको भिडियोमा भवन हल्लिन थालेपछि विद्यार्थी खुला मैदानतर्फ दौडिएको देख्न सकिन्छ ।
रोयटर्सका अनुसार, जर्मन रिसर्च सेन्टर फर जियोसाइन्सेजले सुरुमा भूकम्पको तीव्रता ८.२ म्याग्निच्युड रहेको बताएको थियो । यसलाई पछि संशोधन गरिएको थियो । अन्य भूकम्प अनुगमन संस्थाहरूले भने ७.० देखि ७.८ म्याग्निच्युडसम्मको फरक–फरक अनुमान सार्वजनिक गरेका थिए ।
एएफपीका अनुसार भूकम्पमा परी कम्तीमा ५ जनाको मृत्यु भएको छ । केही घाइते भएका छन् । प्रहरीका अनुसार प्रभावित क्षेत्रमा केही भवन तथा घरहरूमा क्षति पुगेको छ । उद्धार तथा क्षति मूल्यांकनको कार्य जारी छ । भूकम्प करिब १० किलोमिटरको गहिराइमा गएको बताइएको छ ।
फिलिपिन्स र छिमेकी इन्डोनेसियाले सुनामीको चेतावनी जारी गरेका छन् । अमेरिकी सुनामी चेतावनी प्रणालीले पनि प्रशान्त महासागर क्षेत्रका केही भागमा सम्भावित सुनामीको जोखिम रहेको जनाएको छ । फिलिपिनी अधिकारीहरूका अनुसार एक मिटरभन्दा अग्ला सुनामीका छालहरू आउन सक्ने सम्भावना रहेको र जोखिम केही घण्टासम्म कायम रहन सक्ने अनुमान गरिएको छ ।
फिलिपिन्सका साथै इन्डोनेसिया र जापानका धेरै तटीय क्षेत्रमा सुनामीको चेतावनी जारी गरिएको छ । अमेरिकी भूगर्भ सर्वेक्षण (यूएसजीएस) का अनुसार भूकम्पको केन्द्रबिन्दु फिलिपिन्सको बुरियास सहरबाट लगभग २५ किलोमिटर टाढा थियो । स्थानीय समय अनुसार सोमबार बिहान ७ः३७ बजे भूकम्प गएको हो ।
जर्मन अनुसन्धान केन्द्र फर जियोसाइन्सेस (जीएफजेड) ले भूकम्प कम गहिराइबाट गएको बताएको छ, जसले गर्दा शक्तिशाली कम्पन आए र सुनामीको जोखिम बढ्यो । अमेरिकी सुनामी चेतावनी प्रणालीले क्षेत्रमा खतरनाक छालको चेतावनी दिएको छ ।
इन्डोनेसियाको भूभौतिकी एजेन्सीले पनि उत्तरपूर्वी तटीय क्षेत्रहरूको लागि चेतावनी जारी गरेको छ । मुख्य भूकम्पपछि कम्तीमा १६ वटा परकम्प मापन भएका छन् । मानिसहरू सुरक्षित स्थान खोज्दै घर बाहिर निस्किएर बसिरहेका तस्बिरहरू सार्वजनिक भएका छन् ।
फिलिपिन्सका राष्ट्रपतिले “सबै सरकारी निकायहरूलाई तत्काल आवश्यक कदम चाल्न“ निर्देशन दिएका छन्। उनले सुनामीबाट बच्न अग्लो स्थानतर्फ सर्न मानिसहरूलाई आग्रह गरेका छन्।
