विराटनगर,असोज २३
चाडबाडको मुखमा विराटनगरका फोहोर संकलक आन्दोलित भएका छन । फोहोर संकलक कामदारहरुले तलबवृद्धि र बोनस दिन माग गर्दै ठेकेदार कार्यालयमा धर्ना दिएका छन् ।
विराटनगर महानगरपालिकासँगको ठेक्का सम्झौताअनुसार फोहोर संकलन गर्दै आएको वेस्ट मेनेजमेन्ट ग्रुप नेपाल प्रालिद्वारा खटाइँदै आएका फोहोर संकलक कामदारहरुले तलब बृद्धि र बोनसको माग गर्दै धर्ना दिएका हुन् ।
उनीहरुले रोडशेषचोकस्थित फोहोरमैला ब्यवस्थापन कार्यक्रम कार्यान्वयन शाखामा धर्ना दिएका हुन् । चाडपर्व आइपुग्दासमेत वेस्ट म्यानेजमेन्टले बोनस नदिएको र निर्धारण गरिएको मासिक ज्याला समेत समयमा नदिने गरेको उनीहरुको भनाइ छ ।
फोहोरमैला संकलक कामदार राजेश मरिकले चाडपर्व आइसक्दा समेत कम्पनीले बोनस दिन आनाकानी गरेका कारण कामदारहरु आन्दोलित भएको बताए । फोहोर मैला संकलक कामदारहरुले महँगीअनुसार तलब वृद्धि गर्नसमेत माग गरेका छन् ।
यता वेस्ट म्यानेजमेन्टका परियोजना प्रमुख देवीप्रसाद आचार्यले निर्धारण गरिएको ज्याला समयमा नै दिने गरिएको दाबी गदै यसपटक कम्पनी घाटामा रहेकाले बोनस दिन नसकिने बताए । वेस्ट म्यानेजमेन्टले विराटनगरको फोहोर संकलन गर्न १ सय ९० जना कामदारसहित २१८ जना लेबर र कर्मचारी खटाउने गरेको छ ।
सो कम्पनीले फूलटाइमरलाई १५ हजार र हाफ टाइमरलाई ८ हजार तलब दिने गरेको छ । नगरक्षेत्रमा दैनिक १ सय १० टन फोहोर उत्र्सजन हुने गरेको जनाइएको छ । वेस्ट म्यानेजमेन्टले २०७३ जेठ १ गतेदेखि २०७८ वैशाख मसान्तसम्मका लागि नगरक्षेत्रको फोहोर संकलनको ठेक्का पाएको छ ।
