४ साउन , काठमाण्डौ ।
पाउ कुबारसीविरुद्ध लापरवाह फाउल हानेका कारण एन्जो फर्नान्डेजले ’रेड कार्ड’ पाएपछि तनावपूर्ण बनेको फाइनल खेलमा फेरान टोरेस नायक बन्दा फिफा विश्वकप फुटबलको उपाधि स्पेन पुगेको छ । संघर्षपूर्ण र रोमाञ्चक बनेको फाइनल खेल निर्णयार्थ अतिरिक्त समयमा पुग्दा टोरेशले १०६ औं मिनेटमा गरेको गोल निर्णायक सावित भयो ।
खेलको ६२औँ मिनेटमा मिकेल ओयार्जाबलको स्थानमा मैदान प्रवेश गरेका बार्सिलोनाका फरवार्ड टोरेसले १०६औँ मिनेटमा नजिकैबाट गोल गर्दै युरोपेली च्याम्पियन स्पेनका लागि १–० को जित सुनिश्चित गरे । उक्त गोलका लागि निको विलियम्सले पेड्रो पोरोको क्रसलाई हेडरमार्फत टोरेसको दिशामा मिलाइदिएका थिए ।
जित पछि टोरेसले स्पेनको जनसंख्यालाई संकेत गर्दै भने – “यो ४ करोड ७० लाख मानिसहरूले गरेको गोल हो,“ । त्यतिबेलासम्म अर्जेन्टिना १० खेलाडीमा सीमित भइसकेको थियो। खेलको ९०औँ मिनेटमा कुबारसीविरुद्ध फाउल गरेपछि चेल्सीका मिडफिल्डर फर्नान्डेज मैदानबाट बाहिरिनुपरेको थियो ।
उक्त फाउलका कारण रेफ्री स्लाभको भिन्सिचसँग २०२२ को विश्वकप विजेता फर्नान्डेजलाई दोस्रो पहेँलो कार्ड र त्यसपछि रातो कार्ड देखाउनुबाहेक अर्को विकल्प थिएन। खेलको अन्तिम सिट्टीपछि मैदानमा दुवै टोलीका खेलाडीहरूबीच झडप समेत भएको थियो । जसमा अर्जेन्टिनाका मिडफिल्डर लिआन्ड्रो पारेडेसले रातो कार्ड पाएका थिए ।
अमेरिकाको न्यु जर्सीमा भएको खेलमा स्पेनले आफ्नो पकड जमाएको थियो र गोल गर्ने अनगिन्ती अवसरहरू सिर्जना गरे पनि तिनलाई गोलमा परिणत गर्न सकेन । अर्जेन्टिनाका गोलकिपर एमिलियानो मार्टिनेजले ११ पटक बल बचाए । जुन विश्वकपको फाइनलमा अहिलेसम्मकै सर्वाधिक सेभ गरेको गोल संख्या हो ।
स्पेनको दबदबा यति थियो कि खेलको ११७औँ मिनेटमा लियोनेल मेस्सीको प्रहार रोकिएपछि मात्र अर्जेन्टिनाले गोलका लागि आफ्नो पहिलो प्रयास गर्न सकेको थियो । ३९ वर्षीय मेस्सी—जो तीनवटा विश्वकप फाइनलको सुरुवाती टोलीमा पर्ने पहिलो पुरुष खेलाडी र फाइनल खेल्ने सबैभन्दा पाका ’आउटफिल्ड’ खेलाडी बने ।
उनले यो विश्वकपमा कुल आठ गोल गरे । ’गोल्डेन बुट’ को दौडमा उनी फ्रान्सका किलियन एम्बाप्पेभन्दा दुई गोलले पछि रहे । मेस्सीले अहिलेसम्म विश्वकपमा जित्न नसकेको व्यक्तिगत उपाधि पनि यही गोल्डेन बुट हो । जुन उनका लागि अधुरो सपना बनेर रहने भएको छ ।
आफ्नो भविष्यको योजनाबारे उनले अझै केही बताएका छैनन्, तर आठ पटक ’बालोन डी’ओर’ जितेका मेस्सीले विश्वकपमा अल टाइम गोल रेकर्ड २१ गोलका साथ सम्भवत आफ्नो विश्वकप करियर टुङ्ग्याएका छन् । उनी सर्वाधिक गोलकर्ताको सूचीमा एम्बाप्पेभन्दा एक गोलले पछि छन्।
१९६२ मा ब्राजिल पछि लगातार विश्वकप जित्ने पहिलो टोली बन्ने लक्ष्यमा रहेको अर्जेन्टिना स्पेनसँग बराबरी गर्न असमर्थ रह्यो । इन्टर मियामीका स्टार मेस्सीले पनि लुइस डे ला फुएन्टेको टोलीलाई समस्यामा पार्न पूर्णत असफल देखिए ।
र, स्पेनले २०१० मा दक्षिण अफ्रिकामा नेदरल्याण्ड्सलाई पराजित गरेर उपाधि जितको १६ बर्ष पछि आफ्नो देशमा विश्वकप भित्र्याउन सफल भएको छ ।
स्पेनीहरूले केवल एक मात्र गोलको साथ विश्वकप समाप्त गरे । जुन कुनै पनि अघिल्लो च्याम्पियन भन्दा बढी खेल (आठ) खेले तापनि विश्वकप विजेताको लागि सबैभन्दा कम हो । स्पेनले खेलभर मात्र एक गोल खानु आफैमा रोचक पक्ष रहयो । यो जितले ६५ वर्षीय डे ला फुएन्टेलाई विश्वकप उपाधि जिताउने सबैभन्दा पुरानो प्रशिक्षक बनायो।
“हामी विश्व च्याम्पियन हौं,“ डे ला फुएन्तेले भने। “हामीले एकजुट भएर नै यो सफलता हासिल गरेका हौं।“ दोस्रो विश्वकप उपाधि जित्नुका साथै, यस जितले स्पेनको अपराजित यात्रालाई सबै प्रतियोगिताहरूमा गरी ३८ खेल (२९ जित, ९ बराबरी, ० हार) सम्म लम्ब्याएको छ।
यससँगै उनीहरूले राष्ट्रिय टोलीद्वारा कायम गरिएको सर्वाधिक लामो अपराजित यात्राको कीर्तिमानमा इटाली (सन् २०१८–२१) सँगको बराबरी तोड्दै नयाँ कीर्तिमान बनाएका छन्। विश्वकप उपाधि जित्ने स्पेन युरोपेली च्याम्पियनका रूपमा रहेका तेस्रो टोली हो । यसअघि सन् २००८ मा युरो कप जितेको स्पेनले २०१० को विश्वकप उपाधि उठाएको थियो भने ।
सन् १९७२ मा युरो कपको उपाधि उठाएको तत्कालीन पश्चिम जर्मनीले १९७४ को विश्वकप उपाधि उठाएको थियो । यस्तै स्पेनले २०२४ को युरो कपको उपाधि उठाएपछि २०२६ को विश्वकपको उपाधि पनि उठाउन सफल भएको छ । अमेरिका, क्यानडा र मेक्सिकोमा आयोजित ४८ टोलीको सहभागिता रहेको यो अहिलेसम्मकै सबैभन्दा ठूलो विश्वकपको १०४औँ तथा अन्तिम खेल थियो।
अघिल्ला विश्वकपहरूभन्दा यसमा खेलहरूको संख्या बढी भएकाले गोलको संख्या पनि अन्य संस्करणहरूको तुलनामा बढी हुनु कुनै आश्चर्यको कुरा थिएन । सोमबार विहान खेल सुरु हुनुअघिसम्म कुल ३०७ गोल भइसकेका थिए। यो भव्य दृश्य केवल फुटबलमा मात्र सीमित थिएन। त्यहाँ विभिन्न क्षेत्रका चर्चित व्यक्तित्वहरूको उपस्थिति थियो।
खेल हेर्न पुगेका अभिनेताहरूमा ब्राड पिट, टम क्रुज र म्याट डेमन समावेश थिए। त्यहाँ ’अल–स्टार गेम’ नै आयोजना गर्न पुग्ने गरी पर्याप्त संख्यामा एनबीए का प्रतिभाहरू उपस्थित थिए । सहभागी खेलाडीहरूको सूचीमा स्टेफन करी, भिक्टर वेम्बान्यामा, शाई गिलजस–अलेक्जेन्डर, केभिन डुरान्ट र जेम्स हार्डन जस्ता खेलाडीहरू सामेल थिए।
टेनिस जगतका दिग्गजहरू सेरेना विलियम्स र कार्लोस अल्काराज पनि खेल हेर्दै थिए भने एनएफएलका इली म्यानिङ, प्याट्रिक महोम्स, ओडेल बेकह्याम जुनियर र साकोन बार्कली जस्ता नामहरू पनि त्यहाँ उपस्थित थिए। अमेरिकाका अहिलेसम्मकै उत्कृष्ट दुई स्की खेलाडीहरू—मिकाएला शिफ्रिन र लिन्डसे भोन—पनि खेलमा सहभागी थिए।
साथै, काका, डेभिड बेकह्याम, डिडियर ड्रोग्बा र जिनेदिन जिदान जस्ता फुटबलका हस्तीहरूका साथै सन् २०१० मा विश्वकप जितेको स्पेनिस टोलीको पुनर्मिलन पनि त्यहाँ देख्न पाइयो। समापन समारोहमा पोस्ट मालोन मुख्य कलाकारका रूपमा प्रस्तुत भए। यो समारोह फाइनल खेल सुरु हुनुभन्दा करिब ९० मिनेट अघि र मेस्सी तथा अर्जेन्टिनाको टोली रंगशालामा आइपुगेको केही मिनेटपछि सुरु भएको थियो।
फिफाको इतिहासमै पहिलो पटक आयोजना गरिएको ’हाफटाइम शो’ (खेलको मध्यन्तरको प्रस्तुति) २७ मिनेटको विश्रामको हिस्सा थियो। यसमा जस्टिन बिबर, म्याडोना, शाकिरा र बीटीएसका साथै बर्ना बोय, भेनेजुएलाका कन्डक्टर गुस्ताभो डुडामेल, कोल्डप्लेसँग ’पीएस २२ कोरस’ तथा ’सेसमी स्ट्रिट’ र ’मपेट्स’ का पात्रहरू समेत समावेश थिए। अमेरिकी राष्ट्रपति डोनाल्ड ट्रम्प पनि उपस्थित थिए र खेलको समाप्तिपछि उनैले विजेता टोली स्पेनलाई ट्रफी हस्तान्तरण गरेका थिए ।
