२६ असोज ,विराटनगर
बडादसैं अर्थात् नवरात्रको तेस्रो दिन आज शक्ति स्वरुपा चन्द्रघण्टाको पूजा आराधना गरिँदैछ । देशभरका शक्तिपीठहरुमा आजपनि बिहानैदेखि भक्तजनहरुको भीड लागेको छ ।
विराटनगरको कालीमन्दिर, रंगेलीको संसारीमाई स्थान, काठमाडौंको दक्षिणकाली, गोरखाको मनकामना, हेटौंडाको चुरियामाई र भुटनदेवीलगायतका भगवती मन्दिरहरुमा बिहानैदेखि भक्तजनहरुको ठूलो भीड लागेको हो । प्रतिपदादेखि पूर्णिमासम्म शक्ति स्वरुपा दुर्गा भवानीलाई शैलपुत्री, ब्रम्हचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र बुद्धिदात्रीका रुपमा पूजा गरिने भएकाले यो चाड दुर्गा पूजाको नामले पनि प्रचलित छ ।
यस्तै काठमाडौको भद्रकाली, संकटा, नक्साल भगवती, मैतिदेवी, दक्षिणकाली लगायतका शक्तिपीठमा पूजाआजा गर्न जानेहरुको बिहानैदेखि घुईंचो लागेको छ । घटस्थापनामा राखेको जमरा नवरात्रभरी पूजा आराधना गरेर विजया दशमीको दिन दुर्गा भवानीको प्रसादको रुपमा लगाउने चलन छ ।
घटस्थापनाको दिनदेखि नवमीसम्म घर तथा देवीका मन्दिरहरुमा भगवती दुर्गाको पूजा, आराधना र प्रार्थना गरिन्छ । यसै अवसरमा दुर्गा सप्तशती चण्डी पाठ गरिन्छ । नवरात्रमा व्रत बस्नाले मनोकांक्षा पूरा हुने धार्मिक विश्वास छ ।
