काठमाडौँ,असोज २६
आईसीसी विश्वकप टी–२० एसिया क्षेत्र छनोट ‘बी’ अन्तर्गत आज भएको फाईनल खेलमा सिंगापुरले नेपाललाई ८२ रनको सामान्य लक्ष्य दिएको छ ।
सन्दीप लामिछानेले घातक बलिङ गरेपछि सिंगापुर सस्तैमा समेटिएको हो । बायोमास ओभल क्रिकेट मैदानमा टस हारेर पहिला ब्याटिङ गरेको सिंगापुरले १७.३ ओभरमा अल आउट हुदैँ मात्र ८१ रन बनाउन सक्यो ।
सिंगापुरका लागि सुरेन्द्रन चन्द्रमोहनले सर्वाधिक २५ बनाए । बसन्त रेग्मीको १०.२ ओभरमा बोल्ड आउटको शिकार हुनु अघि उनले ३२ बलमा ३ चौकाको सहयोगमा २५ रन जोड्न सकेका हुन । त्यस्तै मनप्रीत सिंह र सिद्धान्तले समान १० रन जोड्न बाहेक अन्य कुनै पनि ब्याटम्यानले दोहोरो अंकमा रन जोड्न सकेनन् ।
त्यस्तै खेलमा सन्दिप लामिछानेले मात्र ३.३ ओभरमा १६ रन खर्चेर ४ विकेट लिए । सोमपाल कामी र करण केसीले समान २ विकेट लिदा बसन्त रेग्मी र ललित नारायण राजवंशीे समान १ विकेट लिए ।
आजको खेलसँगै सन्दीपले नयाँ कीर्तिमान बनाएका छन् । उनले एकै प्रतियोगितामा २४ विकेट लिने पहिलो नेपाली बलर बनेका हुन् । यस अघि विनोद दास र बसन्त रेग्मीको नाममा समान २१ विकेट रहेको थियो ।
