विराटनगर,असोज २७
ग्यास विक्रेता व्यवसायीहरुले तत्काल कमिसन वृद्धि नगरे कडा आन्दोलनमा उत्रिने सरकारलाई चेतावनी दिएका छन् ।
नेपाल ग्यास विक्रेता संघ मोरङले आज विराटनगरमा आयोजना गरेको बडादसंै, शुभदीपावली र छठ पर्वको शुभकामना आदानप्रदान कार्यक्रममा बोल्ने व्यवसायीहरुले तत्काल कमिसन वृद्धि नगरे ग्यास बिक्री बन्द गर्ने चेतावनी समेत दिए ।
कार्यक्रममा महासंघका प्रदेश नम्बर १ का अध्यक्ष सरलराज पोखरेलले अहिले एउटा सिलिन्डर ग्यास बिक्री गर्दा ३२ रुपैयाँ मात्रै कमिसन पाउने गरेको बताए ।
ग्यास बिक्रीबापत पाउने कमिसन कम हुँदा कोठाभाडा, कर्मचारी, बिजुली बत्ती, करलगायत तिर्न पनि नपुग्ने गरेको उनको गुनासो थियो । अध्यक्ष पोखरेलले कम्तीमा सिलिन्डरको ५ प्रतिशत कमिसन तोक्न माग गरे ।
यस्तै मोरङ अध्यक्ष विकास लालवानी लगानीका आधारमा कमिसन तोक्न आग्रह गरे । कार्यक्रममा रिजालको ग्यास उद्योगका सञ्चालक नवीन रिजाललगायतले शुभकामना मन्तव्य व्यक्त गरेका थिए ।
