एजेन्सी,कात्तिक ५
साउदी अरेबियाले पत्रकार जमाल खसोग्जीको हत्या भएको स्वीकार गरेको छ । त्यसका लागि छाडा एजेन्टहरू जिम्मेवार भएको उसले बताएको छ ।
साउदी विदेशमन्त्री आदिल अल–जुबैरले त्यो भयङ्कर भूल भएको बताएका छन् । यद्यपि प्रभावशाली युवराजको निर्देशनमा खसोग्जी हत्या गराइएको आरोप भने उनले अस्वीकार गरेका छन् ।
पत्रकार खशोग्जीबारेको विषयमा सत्यतथ्य बाहिर ल्याउन साउदी अरेबियामाथि ठूलो दबाबमा छ । अक्टोबर २ मा टर्कीको इस्तानबुलस्थित साउदी वाणिज्य दूतावास प्रवेश गरेदेखि खशोग्जी बेपत्ता भएका थिए । आफ्नी पूर्वपत्नीसँग सम्बन्ध विच्छेद गरेको प्रमाणित गर्ने कागजात लिन उनी वाणिज्य दूतावास पुगेका थिए ।
वाणिज्य दूतावासभित्रै साउदी एजेन्टहरूले खशोग्जीको हत्या गरेको टर्कीका अधिकारीहरूको भनाइ छ । यसअघि साउदी अरेबियाले खसोग्गी वाणिज्य दूतावास भवनबाट त्यो दिन सकुशल बाहिरिएको बताउँदै आएको थियो । तर शुक्रवार पहिलो पटक उसले वाणिज्य दूतावासका कर्मचारीहरूसँग खसोग्गीको बाझाबाझले उनको मृत्युको घटना निम्त्याएको स्वीकार गरेको छ ।
आफ्ना पछिल्ला टिप्पणीमा साउदी विदेशमन्त्री अल–जुबैरले घटनालाई हत्याको रूपमा व्याख्या गरेका छन् । खशोग्जीको शव कहाँ छ भन्ने कुरा आफूहरूलाई थाहा नभएको पनि विदेशमन्त्री अलजुबैरले बताएका छन् ।
