विराटनगर : प्रदेश सरकारले स्थायी राजधानी र नामको विषयमा आन्तिरिक छलफल तीव्र गरेपछि राजधानी माग्दै पुर्वी नेपालका चार ठुला शहरले लबिङ सुरु गरेका छन् ।
स्थायी राजधानी माग्ने शहरमा अस्थायी राजधानी विराटनगर, इटहरी , धनकुटा र धरान छन् । मोरङको गोठगाउँमा पनि राजधाजी बनाउन आवश्यक जग्गा रहेको भन्दै सुन्दरहरैँचावासीले राजधानीको माग गरेका छन् । राजधानी माग्ने चार शहरलाई विराटनगर – रानी किमाङथाङ्का सडकको ९६ किलोमिटर खण्डमा छन् ।
राजधानी सार्ने वा विराटनगरलाई स्थायी कायम गर्ने भन्ने विषयमा मन्त्रीपरिषद् भित्र पनि विवाद छ । प्रदेश सरकारमा मुख्यमन्त्री शेरधन राई विराटनगरमा केही संरचना राखेर इटहरीमा प्रदेशसभा सार्ने पक्षमा छन् तर अन्य मन्त्रीले राजधानी विराटनगरमा नै हुनुपर्छ भन्ने पक्षमा छन् ।
राजधानी माग्दै आन्दोलन गर्ने शहरलाई सम्बोधन गर्न प्रदेशका प्रमुख प्रशासकीय संरचना विकेन्द्रीकरण गर्ने पक्षमा उभिएका मुख्यमन्त्री राई सत्तारुढ दल नेकपाकै साँसद्को विरोधका कारण पछि हटे ।
सरकार गठन भएको ९ महिना पुग्नै लाग्दा राजधानी टुङ्गो लगाउने निर्णय गरेको सरकारलाई औद्योगिक शहर विराटनगरदेखि पुर्वाञ्चल क्षेत्रको पुरानो केन्द्र धनकुटा र नयाँ शहर इटहरीले राजधानी माग गरिरहेका छन् ।
राजधानी माग गर्दै सुन्दरहरैँचा नगरपालिकाले पुर्वाञ्चल विश्वविद्यालयको गोठगाउँमा रहेको जग्गा प्रयोग गर्नुपर्ने बताउँदै आएको छ । ,यो समाचार आजको उद्घोष दैनिकको पहिलो पृष्ठमा छापिएको छ ,।
