विराटनगर, कार्तिक ९
कानून, न्याय तथा संसदीय मामिला मन्त्री भानुभक्त ढकालले सरकारले लोकप्रियताका लागि मात्रै काम नगर्ने बताएका छन् । उनले अघिल्ला सरकारहरुले कहिले ढल्ने हो भन्ने चिन्तामा हतारमा लोकप्रिय हुन काम गर्ने गरेको बताउँदै उनले अहिले सरकारले लोकप्रियताका लागि मात्रै काम नगर्ने उल्लेख गरे ।
विराटनगरस्थित नेपाल कम्युनिष्ट पार्टी मोरङको पार्टी कार्यालयमा शुक्रबार आयोजित पार्टी प्रवेश कार्यक्रममा बोल्दै उनले यस्तो बताएका हुन । उनले सरकारले आफ्नो गतिमा काम गरिरहेको पनि बताए ।
दिगो सरकार नहुदा हचुवाका भरमा सस्तो लोकप्रियताका लागि कामहरु गरिने हुदा त्यसको परिणाम खासै राम्रो नहुने बताउँदै मन्त्री ढकालले अहिले सरकार दिगो विकासमा लागि परेको बताए ।
पाँच वर्ष स्थिर सरकार भएकाले छिटो लोकप्रिय हुन भन्दापनि सुविस्ताका साथ योजनाबद्ध ढंगबाट काम गरिने उनले बताए । निर्वाचनका बेला गरिएका प्रतिबद्धता भन्दापनि अझै प्रभावकारी ढंगबाट सरकारले काम गर्ने उनको भनाइ थियो ।
कार्यक्रममा मोरङको रतुवामाइ नगरपालिका वडा नम्बर चारका वडा अध्यक्ष भीमराज राजवंशी नेकपामा प्रवेश गरेका थिए । नेपाली कांग्रेसबाट विजयी भएका उनलाई कानुन मन्त्री ढकाल, नेकपाका केन्द्रीय महेश रेग्मी, नेकपाका नेता ऋषिकेष पोखरेल लगायतले पार्टीमा स्वागत गरेका थिए ।
