विराटनगर,कार्तिक १०
नेपाली काग्रेस पार्टीमा देखिएको विवाद तल्लो तहबाटै हटाएर एकबद्ध भई अघि बढ्न कार्यकर्ताले कांग्रेस नेतृत्वलाई सुझाव दिएका छन् ।
नेपाली कांग्रेसको मोरङ क्षेत्र नम्बर ५ ले मोरङको धनपालथान शनिबार आयोजना गरेको शुभकामना आदान प्रदान कार्यक्रममा सहभागी केन्द्रीय नेताहरुलाई तल्लै तहबाट विवाद र गुटगत राजनीति त्यागेर विधान तथा विधि सम्मत राजनीति गर्न कार्यकर्ताहरुले सुझाव दिएका हुन् ।
कार्यक्रममा कांग्रेस संसदीय दलका उपनेता विजयकुमार गच्छदारसहितका सहभागी नेतालाई एकताको वास्तविक अनुभव दिलाउन सहभागीले आग्रह गरेका थिए ।
वडादसँै, तिहार, छठलगायत पर्वको सन्दर्भ पारेर गरिएको कार्यक्रममा गच्छदारले पार्टी अब एक ढिक्का भएर अघि बढ्ने बताउँदै अब नयाँ सोचका साथ अघि बढ्नुको विकल्प नभएकोमा जोड दिए ।
उनले कांग्रेसको साख र विगत अझै दह्रो रहेको समे चर्चा गरे । कांग्रेस केन्द्रीय सदस्य अमृत अर्यालले कांग्रेसको संगठनलाई सुदृढीकरण गर्न अब तल्लो तहसम्म अभियाननै चलाइने बताए । कार्यक्रममा सांसद डा. डिला संग्रौलाले पार्टी अब नयाँ हिसाबले अघि बढ्ने तर्खरमा रहेको बताइन ।
