एजेन्सी, कार्तिक १२
इन्डोनेसियाको जाकार्ताबाट पांकल पिनांग जान लागेको विमान दुर्घटनामा परेको छ । घरेलु यात्रु बोकेर उडेको विमान विमानस्थलबाट उडेको १३ मिनेटमा नै समुद्रमा खसेको हो ।
विमानमा १८८ जना सवार थिए । यात्रीको अवस्था भने अज्ञात रहेको छ । विमान दुर्घटनापछि यात्रुको अवस्थाको विषयमा भने जानकारी आउन बाँकी रहेको जनाइएको छ । इन्डोनेशियाको सर्च एण्ड रेस्क्यू एजेन्सीका प्रवक्ता यूसुफ लतीफले विमान दुर्घटनामा परेको पुष्टि गरेका छन् ।
हराएको विमान बोइंग–७३७ म्याक्स ८ हो । संसारभरको उडानको जानकारी राख्ने वेबसाइट फ्लाइटराडरको डाटामा लायन एयर फ्लाइट जेटी–६१० स्थानीय समयअनुसार बिहान करिब ६ः२० बजे विमानस्थलबाट उडेको करिब १३ मिनेटपछि समुद्रमा खसेको देखाएको छ । सिग्नल टुट्नु केहीबेर अघि विमान करिब ३६ सय ५० फिट उचाइमा थियो ।
