विराटनगर : तीन महिने शिशुको उपचारमा लागेको १ लाख ७० हजार तिर्न नसक्दा सप्तरी भारदहका आमा छोरी विराटनगरको एक अस्पतालमै बन्धक भएका छन् ।
उपचारमा लागेको खर्च तिर्न नसक्दा विराटनगरको आर के चिल्ड्रेन हस्पिटलमा सप्तरी भारदह घर भएकी रेनुदेवी खड्गा र उनकी आमा सीतादेवी मण्डल बन्धक भएका हुन् ।, यो समाचार आजको उद्घोष दैनिकमा छापिएको छ ।
असोज ३१ गते तीन महिनाकी छोरी निशालाई उच्च ज्वरो आएपछि रेनुदेवीले विराटनगरको कोशी अञ्चल अस्पताल ल्याएका थिए । अञ्चल अस्पतालमा उपचार हुन नसकेपछि आरके चिल्ड्रेन हस्पिटल भर्ना गरिएको थियो ।
आरके चिल्ड्रेन हस्पिटलमा ११ दिनको उपचारपछि शिशुको आईतबार मृत्यु भएको थियो ।अस्पतालले ११ दिन भेन्टिलेटरमा राखेर उपचार गर्दा १ लाख ७० हजार हाराहारी बिल उठेको जानकारी दिएको छ । अस्पतालले मागेअनुसार शुल्क तिर्न नसक्दा आमा– छोरीलाई अस्पतालले रोकेर राखेको हो ।
शिशुका आफन्तले अस्पतालमा ६० हजार रुपैँया बुझाएका छन् । अब अस्पतालले १ लाख १० हजार तिर्न दबाब दिईरहेको छ । तर अस्पतालमा बुझाउने पैसा आफुहरुसँग नरहेको रेनुदेवीकी आमा सितादेवीले गुनासो गरिन् । अस्पताल ६० हजार र फार्मेसीमा २० हजार बुझाएका छौं’ सीतादेवीले भनिन्, ‘अझै १ लाख १६ हजार दिनुपर्छ भन्छन् ।’
