काठमाडौं, कात्तिक १५
चिकित्सा शिक्षा विधेयकमा छलफल गर्न भनेर बोलाइएको शिक्षा स्वास्थ्य उपसमितिको बैठक गणपुरक संख्या (कोरम) नपुगेर स्थगित भएको छ ।
बैठक आगामी मंसिर २ गतेसम्म स्थगित भएको हो । बिहीबार बिहान १०ः२० बजे उपसमितिको बैठक बोलाइएको थियो । ११ बजेसम्म पर्याप्त सदस्यहरु उपस्थित नभएपछि बैठक स्थगित गरिएको समिति सचिवालयले जनाएको छ । मूल समितिको बैठक पनि मंसिर २ गते नै बस्ने तय भएको छ ।
बुधबार मात्रै मूल समितिले चिकित्सा शिक्षा विधेयक जतिसक्दो छिटो टुंगोमा र्पुयाउने निर्णय गर्दै उपसमितिलाई छिटो रायसहितको प्रतिवेदन बुझाउन भनेको थियो । उपसमिति संयोजक खगराज अधिकारीले पनि बिहीबारदेखि सीधै बिधेयकमा छलफल सुरु हुने बताएका थिए ।
यसअघि उपसमितिले विभिन्न सरोकारवालाहरुसँग छलफल गरेको थियो । सरोकारवालाहरुको रायसहित विधेयकम संशोधन दर्ता गर्ने र सांसदहरुसँग छलफल गरी विवाद टुंगोमा र्पुयाउने अधिकारीले बताएका थिए ।
