काठमाडौं,कात्तिक १५
ललितपुरमा जारी साफ यु–१५ च्याम्पियनसिपको फाइनल प्रवेशका लागि आज आयोजक नेपाली टोलीले पाकिस्तानको सामना गर्दैछ ।खेल सातदोबाटोस्थित एन्फा कम्प्लेक्सको मैदानमा दिउसो २ः३० बजे शुरु हुनेछ ।
नेपाली टिमका प्रशिक्षक सनोज श्रेष्ठले पाकिस्तानलाई हराएर फाइनल पुग्ने नेपालको योजना रहेको बताएका छन् ।गतवर्षको उपविजेता बनेको नेपाल फाईनलमा भारतसँग पराजित भएको थियो ।
नेपालले यसपटकको प्रतियोगितामा पहिलो खेलमा माल्दिभ्सलाई ४–० ले हराएको थियो भने दोस्रो बंगलादेशसंग २–१ ले पराजित भएको थियो ।
पाकिस्तानले पनि नेपाललाई पराजित गर्दै फाइनल पुग्ने लक्ष्यसहित मैदान उत्रनेछ । पाकिस्तानले प्रतियोगितामा सोचेभन्दा पनि राम्रो प्रदर्शन गरिरहेको छ ।
उपाधिको बलियो दाबेदार मानिएको भारतलाई २–१ ले हराएको पाकिस्तानले अर्को खेलमा भुटानलाई ४–० ले पराजित गरेको थियो । च्याम्पियनसिपको पहिलो सेमिफाइनलमा भारतलाई हराउँदै बंगलादेश फाईनलमा प्रवेश गरेको छ ।
