बिराटनगर,कार्तिक १६
कानून, न्याय तथा संसदीय मामिला मन्त्री भानुभक्त ढकालले साझा सूचीमा रहेका कानुन निर्माणको क्रमलाई सरकारले चाँडो भन्दा चाँडो निकास दिने बताएका छन् ।
बिराटनगर विमानस्थलमा आज बिहान स्थानीय संचारकर्मीसंगको कुराकानीमा मन्त्री ढकालले बिषेश गरी प्रदेश र स्थानीय तहमा कर्मचारी संमायोजन र प्रहरी ऐन सम्बन्धी बिषयमा छिटो निकास दिन सरकारले आन्तरिक गृहकार्य शुरु गरिसकेको पनि जानकारी दिए ।
मन्त्री ढकालले भने ‘ प्रदेश सरकारको भावना र चहानालाई सरकारले बुझेको छ,’आवश्यक कानुन निर्माण गरी योथोचित समयमा प्रदेश सरकारको मागलाई सरकारले सम्बोधन गर्नेछ ।’उनले प्रदेश सरकारको माग र अहिलेको आवश्यकता अनुसार अतिरिक्त समस्याको रुपमा लिएर ती दुई बिषयलाई तत्काल समाधान गर्न लागि परेको जानकारी दिए ।
उनले संघले कानुन निर्माण नगरेको खण्डमा संविधानसंग बाँझिएर कुनैपनि कानुने निर्माण भएको खण्डमा भने स्वतः खारेज हुने बताए । मन्त्री ढकालले साझा सुचीमा रहेका अधिकारका कानुन निर्माणमा प्रदेश सरकारले संघलाई छिटो रुपमा कानुन निर्माण गर्न ध्यानाकर्षण गराएको मात्र जानकारी दिए ।
