विराटनगर, चैत २३
शनिबार चट्याङ्ले लागेर १ नम्बर प्रदेशको झापा र मोरङमा २ जनाको मृत्यु भएको छ । मोरङको बुढीगंगा गाउँपालिका–३ मा चट्याङ लागेर १ बालिकाको मृत्यु भएको छ ।
दिउँसो पौने २ बजे घर नजिकै रहेको बारीमा गाईवस्तु फुकाउन जाने क्रममा चट्याङ लागेर सोही स्थान बस्ने १० वर्षीया आरधना राजवंशी गम्भीर घाइते भएकी थिईन् । चट्याङ लागेर घाइते भएकी बालिकालाई उपचारको लागि बिराट मेडिकल अस्पताल विराटनगर पठाईएकोमा उपचारको क्रममा बालिकाको मृत्यु भएको जिल्ला प्रहरी कार्यालय मोरङले जनाएको छ ।
त्यस्तै झापाको मेचीनगर–१५ ज्यामिरगढीमा चट्याङ लागेर १ जनाको मृत्यु भएको छ भने े २ जना घाइते भएका छन् ।बिहान ८ बजेको समयमा खेतमा काम गरिरहेको अवस्थामा चट्याङले लाग्दा सोही स्थान बस्ने ४० वर्षीय प्रकाश राउत, उनकी श्रीमती ३५ वर्षीया सुनिता राउत र भाउजु ३६ वर्षीया मञ्जु राउत घाइते भएका थिए ।
चट्याङ लागेर घाइते भएका तीनै जनालाई उपचारको लागि ओमसाइ पाथिभरा अस्पताल भद्रपुर पठाईएकोमा उपचारको क्रममा प्रकाश राउतको मृत्यु भएको जिल्ला प्रहरी कार्यालय झापाले जनाएको छ । घाईते २ जनाको अवस्था गम्भीर रहेको उक्त कार्यालयले जनाएको छ ।
