काठमाडौं, वैशाख ११
प्रधानमन्त्री केपी शर्मा ओलीले भूकम्पपछि निर्माण गरिएको काभ्रेको धुलिखेलस्थित सञ्जीवनी नमूना माध्यमिक विद्यालय भवनको उद्घाटन गरे । प्रधानमन्त्रीले भूकम्पपछिको पुनर्निर्माणको काम तिव्र गतिमा अघि बढेको बताए । अघिल्लो पटक आफू प्रधानमन्त्री भएका बेला गठन भएको प्राधिकरणले आफ्नो बहिरगमनसँगै काम गर्न नसकेको प्रधानमन्त्री ओलीले बताए ।
‘हामी सरकारबाट हटेपछि प्राधिकरणका प्रमुखलाई पनि हटाइयो । त्यसपछि पुनर्निर्माणभन्दा राजनीति गर्ने प्रमुखहरु ल्याइए’ प्रधानमन्त्री ओलीले भने, ‘जसले गर्दा पुनर्निमाणको गति एकदमै सुस्त भयो ।’ प्रधानमन्त्री ओलीले वर्तमान सरकार गठनसँगै प्राधिकरणले काममा गति बढाएको बताए ।
‘अब हाम्रा हरेक कामहरु यस्तै गतिशिल र तिव्र रुपमा हुनुपर्दछ’, प्रधानमन्त्री ओलीले भने, ‘हाम्रा संरचनाहरु सुरक्षित र भूकम्पप्रतिरोधी पनि हुनुपर्दछ ।’ प्रधानमन्त्री ओलीले शिक्षाले व्यक्तिलाई स्वरोजगारको अवसर दिनु पर्ने बताउँदै भने, ‘एमएम पढेको मान्छेले ध्वनीलाई लिपी र लिपीलाई ध्वनीमा परिणत मात्र गर्न सक्छ भने त्यसको के काम?,’ प्रधानमन्त्री ओलीले भने, ‘त्यसकारण साक्षर बनाउने मात्र होइन जीवन निर्वाह गर्न सिकउने शिक्षाको आवश्यकता छ ।’
प्रधानमन्त्री ओलीले सामुदायिक विद्यालयहरुले शैक्षिक गुणस्तर उठाउन सरकारले सहयोग गर्ने बताए । ‘सामुदायिक विद्यालयमा गुणस्तर कायम हुन नसक्दा निजीमा महंगो पैसा तिरेर छोराछोरी पढाउनु परेको छ,’ प्रधानमन्त्री ओलीले भने, ‘सामुदायिक विद्यालयका शिक्षकले पनि निजीसँग प्रतिष्पर्धा गर्न सक्ने गरीका विद्यार्थी उत्पादन गर्नुहोस । यसमा सरकारको साथ रहन्छ ।’
